ប្រមុខការទូតអ៊ីស្រាអែល អាមេរិក ម៉ារ៉ុក អេមីរ៉ាត់អារ៉ាប់រួម អេហ្ស៊ីប និងបារ៉ែន ជួបប្រជុំ"ជាប្រវត្តិសាស្ត្រ"
ថ្ងៃអាទិត្យទី ២៧មីនា រដ្ឋមន្ត្រីការបរទេសអ៊ីស្រាអែល ដឹកនាំការប្រជុំជាប្រវត្តិសាស្ត្រ នៅអ៊ីស្រាអ៊ែល ដោយមានការចូលរួម ពីលោករដ្ឋមន្ត្រីការបរទេសអាមេរិក និងប្រមុខការទូតប្រទេសអារ៉ាប់ ដូចជា ម៉ារ៉ុក បារ៉ែន អេមៀរ៉ាត់អារ៉ាប់រួម និងអេហ្ស៊ីបជាដើម។ ប្រទេសអារ៉ាប់ទាំងនេះ ទើបតែបានស្តារទំនាក់ទំនង ជាមួយអ៊ីស្រាអែលឡើងវិញ ហើយវត្តមានរបស់អាមេរិកនៅក្នុងកិច្ចប្រជុំនេះ គឺដើម្បីបញ្ជាក់ថា អាមេរិកមិនបោះបង់ចោលតំបន់ដើមបូព៌ាឡើយ បើទោះបីជារវល់ជាប់ដៃ ជាមួយចិន និងរុស្ស៊ីនាពេលនេះ។
ចុះផ្សាយនៅថ្ងៃ៖
ស្តាប់ - ០២:១៣
លោក Yaïr Lapid រដ្ឋមន្ត្រីការបរទេសអ៊ីស្រាអែល បានហៅកិច្ចប្រជុំនេះ ថាកិច្ចប្រជុំជាប្រវត្តិសាស្ត្រ ដោយលើកសរសើរ ពីជោគជ័យនៃនយោបាយការបរទេសអ៊ីស្រាអែល ដែលបានប្រឹងប្រែងស្តារទំនាក់ទំនង ជាមួយប្រទេសអារ៉ាប់ បានកាន់តែច្រើន។ ទំនាក់ទំនងល្អ ដែលអ៊ីស្រាអែល បានទទួលយ៉ាងលំបាក ប្រមាណ៧០ឆ្នាំមកនេះ ដោយសារតែបញ្ហាសាសនា និងសង្គ្រាមដែនដីជាមួយប៉ាឡេស្ទីន។
ក្រៅពីលោក អង់តូនីប្លីងកិន រដ្ឋមន្ត្រីការបរទេសអាេមរិក កិច្ចប្រជុំនេះ មានការចូលរួមជាលើកទីមួយ ពីរដ្ឋមន្ត្រីការបរទេសម៉ារ៉ុក អេមីរ៉ាត់អារ៉ាប់រួម អេហ្ស៊ីប និងបារ៉ែន។ មានសំណុំរឿងជាច្រើន ដែលគេនឹងលើកមកនិយាយគ្នា រាប់ទាំងសំណុំរឿងសេដ្ឋកិច្ច ពាណិជ្ជកម្ម សន្តិសុខតំបន់ និងជាពិសេសនោះ គឺបញ្ហានុយក្លេអ៊ែរអ៊ីរ៉ង់។ វិបត្តិសង្គ្រាមនៅអ៊ុយក្រែន ក៏នឹងត្រូវគេលើកមកនិយាយដែរ ដោយសហរដ្ឋអាមេរិក អាចនឹងព្យាយាមបញ្ចុះបញ្ចូល ឲ្យក្រុមប្រទេសតំបន់ឈូងសមុទ្រពែក្ស ត្រូវនៅឲ្យឆ្ងាយពីរុស្ស៊ី។
បន្ទប់ពីជួបជាមួយលោកនាយករដ្ឋមន្ត្រីអ៊ីស្រាអែល Naftali Bennett លោកអង់តូនី ប្លីងកិន នឹងបន្តដំណើរទៅជួបលោក ម៉ាហមូដ អាបាស ប្រមុខដឹកនាំអាជ្ញាធរប៉ាឡេស្ទីន នៅក្រុងរ៉ាម៉ាឡា តំបន់ស៊ីហ្សកដានី។ ភាគីប៉ាឡេស្ទីន បានបង្ហាញការព្រួយបារម្ភថាអាមេរិក លែងចាប់អារម្មណ៍ និងសំណុំរឿងខ្លួន ដោយងាកទៅចាប់អារម្មណ៍ តែបញ្ហានុយក្លេអ៊ែរអ៊ីរ៉ង់។ យោងតាមលោកស្រី Yael Lempert មន្ត្រីក្រសួងការបរទេសអាេមរិក គឺលោកអង់តូនី ប្លីងលិន អាចនឹងនិយាយជាមួយលោកម៉ាហមូដ អាបាស អំពីការបង្កើតអគ្គកុងស៊ុលអាមេរិក ប្រចាំនៅស៊ីហ្សកដានី។
គួរកត់សំគាល់ថា នយោបាយការបរទេសអាមេរិក កំពុងតែវាយសំរុកយ៉ាងសកម្ម នៅគ្រប់ទិសទាំងអស់ ដើម្បីបង្ហាញថា អាមេរិកអាណត្តិរបស់លោកចូ បៃដិន គឺមិនមែនខ្វល់ខ្វាយតែពីបញ្ហាចិនមួយនោះឡើយ។ គួរបញ្ជាក់ផងដែរថា ដំណើររបស់លោកអង់តូនី ប្លីងកិន ទៅដល់អ៊ីស្រាអែល នេះ គឺជួនចំពេលដែល ការចរចាដើម្បីសង្គ្រោះកិច្ចព្រមព្រៀងនុយក្លេអ៊ែរ បានដល់ដំណាក់កាលចុងក្រោយ តែដោយមានសង្ឃឹមតិចណាស់ ថាអាចមានលទ្ធផលវិជ្ជមាន។ យ៉ាងណាមិញ ភាគីអ៊ីស្រាអែល បានលើកឡើងថា គេបារម្ភណាស់ ថាកិច្ចព្រមព្រៀងអាចនឹងស្រាលជ្រុល ធ្វើឲ្យអ៊ីរ៉ង់មានប្រៀប ហើយមិនអាចរារាំងអ៊ីរ៉ង់ កុំឲ្យមានអាវុធនុយក្លេអ៊ែរបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ