អាមេរិកដាក់ទណ្ឌកម្មហិរញ្ញវត្ថុ លើអ្នកផ្គត់ផ្គង់សម្ភារៈផលិតមីស៊ីលបាលីស្ទីកអ៊ីរ៉ង់
កាលពីថ្ងៃពុធ ៣០មីនា រដ្ឋាភិបាលអាមេរិក បានសម្រេចដាក់ទណ្ឌកម្មហិរញ្ញវត្ថុ លើក្រុមហ៊ុននិងអ្នកទទួលខុសត្រូវ ដែលផ្គត់ផ្គង់សម្ភារៈ ឲ្យអ៊ីរ៉ង់ផលិតមីស៊ីលបាលីស្ទិក។ ជាការឆ្លើយតបរបស់អាមេរិក បន្ទាប់ពីកងទ័ពឆ្មាំបដិវត្ដរបស់អ៊ីរ៉ង់ បានវាយប្រហារទៅលើទីតាំងមួយកន្លែង នៅតំបន់គួកឌីស្ថានអ៊ីរ៉ាក់ និងបន្ទាប់ពីក្រុមហ៊ូទីយេមែន ដែលជាកូនចៅអ៊ីរ៉ង់ បានវាយប្រហារកាន់តែខ្លាំងឡើង ទៅលើអារ៉ាប៊ីសាអូឌីត ដែលជាសម្ព័ន្ធមិត្តអាមេរិក។
ចុះផ្សាយនៅថ្ងៃ៖
ទណ្ឌកម្មថ្មីនេះ គឺសំដៅលើជនជាតិអ៊ីរ៉ង់ម្នាក់ ឈ្មោះ Mohammad Ali Hossein ព្រមទាំងបណ្ដាញរបស់ជននេះ ដែលត្រូវអាមេរិក ដឹងថា ជាអ្នកផ្គត់ផ្គង់សម្ភារៈ និងវត្ថុធាតុដើម ដើម្បីឲ្យអ៊ីរ៉ង់ យកទៅផលិតមីស៊ីលបាលីស្ទីក។ ភាគហ៊ុន និងទ្រព្យសម្បត្តិរបស់ជននេះ នឹងត្រូវបង្កក ហើយមិនអាចធ្វើប្រតិការ នៅលើទីផ្សារហិរញ្ញវត្ថុអាមេរិកបានទេ។
យោងតាម លោក Brian Nelson អនុរដ្ឋលេខាធិការក្រសួងហិរញ្ញវត្ថុអាមេរិក វិធានការនេះ គឺជាការឆ្លើយតប ចំពោះការវាយប្រហាររបស់កងទ័ពឆ្មាំបដិវត្តអ៊ីរ៉ង់ មកលើទីតាំងមួយនៅតំបន់គួកឌីស្ថានអ៊ីរ៉ាក់ កាលពីថ្ងៃទី១៣មីនា។ មន្ត្រីអាមេរិករូបនេះ អះអាងថា អាមេរិកនឹងធ្វើការជាមួយប្រទេសក្នុងតំបន់ដើមបូព៌ា ដើម្បីធ្វើយ៉ាងណា ពិន័យអ៊ីរ៉ង់ឲ្យយល់ថា អំពើឈ្លានពានអធិបតេយ្យភាពរបស់ប្រទេសក្បែរខាង វាជាអំពើខុសច្បាប់។
ដោយឡែក ភាគីអ៊ីរ៉ង់ បានអះអាងថា ការវាយប្រហារទៅលើតំបន់គួកឌីស្ថានអ៊ីរ៉ាក់ គឺខ្លួនបានវាយសំដៅលើទីតាំងសម្ងាត់មួយរបស់អ៊ីស្រាអែល។ ក្រោយរងទណ្ឌកម្មថ្មីបន្ថែមរបស់អាមេរិកនេះ អ្នកនាំពាក្យក្រសួងការបរទេសអ៊ីរ៉ង់ បានលើកឡើងថា ទណ្ឌកម្មថ្មីនេះ គឺមកបញ្ជាក់បន្ថែមថា អាមេរិកតែងតែមានចេតនាអាក្រក់ ធ្វើបាបប្រជាជនអ៊ីរ៉ង់ជានិច្ច។
យោងតាមលិខិតប្រកាសរបស់ក្រសួងហិរញ្ញវត្ថុអាមេរិក បានបញ្ជាក់បន្ថែមថា ការសម្រេចដាក់ទណ្ឌកម្ម គឺមានន័យថា អាមេរិកនឹងមិនញញើតឡើយ ក្នុងការដាក់ទណ្ឌកម្មប្រឆាំងនឹងកម្មវិធីមីស៊ីលបាលីស្ទីករបស់អ៊ីរ៉ង់ បើទោះបីជាពេលនេះ ការចរចាស្តីពីកិច្ចព្រមព្រៀងនុយក្លេអ៊ែរជាមួយអ៊ីរ៉ង់ បានឈានទៅមុខល្អប្រសើរខ្លាំងក៏ដោយ។
គួរគត់សំគាល់ដែរថា វិធានការទណ្ឌកម្មរបស់អាមេរិកនេះ ក៏អាចជាការឆ្លើយតប វាយសំពងអ៊ីរ៉ង់ដែរ បន្ទាប់ពី ក្រុមហ៊ូទីយេម៉ែន ដែលជាកូនចៅអ៊ីរ៉ង់ បានវាយប្រហារជាច្រើនលើក មកលើអារ៉ាប៊ីសាអ៊ីឌីត ដែលជាសម្ព័ន្ធមិត្តអាមេរិក។ ការវាយប្រហារដែលបានសំដៅមកលើហេដ្ឋារចនាសម្ព័ន្ធផលិតប្រេង របស់អារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ