ប្រធានាធិបតីតួកគី ទៅអារ៉ាប៊ីសាអូឌីត ដើម្បីស្តារទំនាក់ទំនងឡើងវិញ
គិតចាប់តាំងពីមានព្រឹត្តិការណ៍ឃាតកម្មសម្លាប់អ្នកកាសែត ខាស្ហូហ្ស៊ី នៅស្ថានកុងស៊ុលអារ៉ាប៊ីសាអូឌីត ប្រចាំទីក្រុង អ៊ីស្តង់ប៊ូល ឆ្នាំ២០១៨មក នេះជាលើកទីមួយ ដែលលោក អ៊ែរដូហ្កាន ប្រធានាធិបតីតួកគី អញ្ជើញទៅបំពេញទស្សនកិច្ចនៅប្រទេសអារ៉ាប៊ីសាអូឌីត។ កម្មវត្ថុចម្បង គឺស្តារនិងអភិវឌ្ឍទំនាក់ទំនងល្អក់កកររវាងប្រទេសទាំងពីរ ឱ្យបានប្រសើរឡើងវិញ។ នេះបើតាមភ្នាក់ងារសារព័ត៌មានរដ្ឋអារ៉ាប៊ីសាអូឌីត SPA។
ចុះផ្សាយនៅថ្ងៃ៖
ស្តាប់ - ០២:២២
លោកប្រធានាធិបតីតួកគី និងរាជបុត្រស្នងរាជអារ៉ាប៊ីសាអូឌីត បានពិភាក្សាគ្នាអំពីទំនាក់ទំនងតួកគី-អារ៉ាប៊ីសាអូឌីត និងបានស្វែងរកមធ្យោបាយអភិវឌ្ឍន៍ទំនាក់ទំនងទ្វេភាគីលើគ្រប់វិស័យ។ មុនចាកចេញពីប្រទេស លោក អ៊ែរដូហ្កាន បានបង្ហើបក្តីសង្ឃឹមថា ទស្សនកិច្ចនេះ ជាការបើកទំព័រសករាជថ្មីនៃទំនាក់ទំនងរបស់ប្រទេសទាំងពីរ ដោយមានទាំងការពង្រឹងកិច្ចសហប្រតិបត្តិការក្នុងវិស័យការពារជាតិ ហិរញ្ញវត្ថុ ដើម្បីនាំប្រយោជន៍ដល់គ្នាទៅវិញទៅមកផង។
ទស្សនកិច្ចរបស់លោកអ៊ែរដូហ្កាន ដែលក៏បានចូលជួបព្រះមហាក្សត្រ សាល់ម៉ានទៀត ប្រព្រឹត្តទៅជួនចំពេលប្រទេសតួកគីកំពុងប្រឈមនឹងវិបត្តិសេដ្ឋកិច្ចយ៉ាងធ្ងន់ធ្ងរ ដោយរូបិយបណ្ណតួកគី បានធ្លាក់ថ្លៃអស់៤៤% នៅចំពោះមុខប្រាក់ដុល្លារ នៅឆ្នាំ២០២១ និងមានវិបត្តិអតិផរណាឡើងខ្ពស់ដល់ទៅ៦១,១% នៅខែមីនា។ ស្ថានភាពនេះបានរុញច្រានឱ្យលោកប្រមុខរដ្ឋតួកគី បន្ទាន់ជំហរ ជាមួយអតីតគូប្រជែងនិងសត្រូវដូចយ៉ាង អេហ្ស៊ីប ឬអ៊ីស្រាអែល និងជាពិសេសជាមួយក្រុមប្រទេសរាជាណាចក្រប្រេងកាត ក្នុងតំបន់ឈូងសមុទ្ទពែក្ស មានជាអាទិ៍ អេមីរ៉ាត់អារ៉ាប់រួម និង អារ៉ាប៊ីសាអូឌីត។
ទំនាក់ទំនងជាមួយអារ៉ាប៊ីសាអូឌីត ដែលដុនដាបស្រាប់ បានធ្លាក់ស្ទើរដល់ដី តាំងពីឆ្នាំ២០១៨មក ដោយហេតុតែអ្នកកាសែតវ៉ាស៊ីនតោនប៉ុស្តិ៍ ដើមកំណើតអារ៉ាប៊ីសាអូឌីត បានរងការធ្វើឃាតស្លាប់នៅក្នុងស្ថានកុងស៊ុលអារ៉ាប៊ីសាអូឌីតប្រចាំក្រុងអ៊ីស្តង់ប៊ូលប្រទេសតួកគី។ កាលណោះ ប្រធានាធិបតីតួកគីបានចោទមន្ត្រីជាន់ខ្ពស់អារ៉ាប៊ីសាអូឌីត ស្និទនឹងរាជបុត្រស្នងរាជដ៏មានឥទ្ធិពល ថាជាអ្នកនៅពី ក្រោយឃាតកម្ម។ តុលាការតួកគីបានកាត់ទោសដាក់ទោសប្រហារជីវិត ជនជាតិអារ៉ាប៊ីសាអូឌីត៥នាក់ និង៨នាក់ទៀតឱ្យជាប់ពន្ធនាគារ តែក្រោយមក នៅខែដើមខែមេសាតុលាការតួកគីបានសម្រេចបញ្ជូនសំណុំរឿងខាស្ហូហ្ស៊ីនេះ ទៅអាជ្ញាធរអារ៉ាប៊ីសាអូឌីតវិញ។
ក្នុងន័យនេះ បើតាមប្រភពមិនបញ្ចេញឈ្មោះ ប្រធានាធិបតីតួកគីនឹងមិនធ្វើសេចក្តីប្រកាសផ្លូវការអ្វីនាអំឡុងពេលទស្សនកិច្ចនេះទេ។ ទស្សនកិច្ចដែលបើតាមអ្នកវិភាគអារ៉ាប៊ីសាអូឌីត គឺជាជោគជ័យ ព្រោះប្រទេសទាំងពីរអាចបើកទំព័រទំនាក់ទំនងថ្មីនឹងគ្នា ៖ តួកគីត្រូវការលំហូរពាណិជ្ជកម្មនិងទេសចរណ៍មកពី អារ៉ាប៊ីសាអូឌីត។ ឯរីយ៉ាដ ត្រូវការតួកគីដើម្បីដោះស្រាយសំណុំរឿងតំបន់ជាច្រើន និងអាចឈានដល់ការទិញអាវុធពីតួកគីទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ