ទីភ្នាក់ងារថាមពលនុយក្លេអ៊ែរអន្តរជាតិ អះអាងថា អ៊ីរ៉ង់ចម្រើនធាតុអ៊ុយរ៉ានីញ៉ូម កាន់តែច្រើនឡើងៗ
ក្នុងរវាងប៉ុន្មានខែចុងក្រោយនេះ អ៊ីរ៉ង់បានធ្វើការចម្រាញ់ធាតុអ៊ុយរ៉ានីញ៉ូម កាន់តែច្រើនឡើង ដែលឈានទៅជិតដល់កម្រិត ដែលអាចឲ្យអ៊ីរ៉ង់ អាចផលិតអាវុធនុយក្លេអ៊ែរបាន។ នេះបើផ្អែកតាមការសន្និដ្ឋាន នៅក្នុងរបាយការណ៍របស់ទីភ្នាក់ងារថាមពលនុយក្លេអ៊ែរអន្តរជាតិ ហៅកាត់ថា AIEA កាលពីថ្ងៃចន្ទ ទី៣០ឧសភា ម្សិលមិញ។ បន្ថែមពីនេះ AIEA បានលើកឡើងថា អ៊ីរ៉ង់មិនបានផ្តល់ព័ត៌មានលំអិត អំពីស្ថានីយ៍នុយក្លេអ៊ែរ ដែលគ្មានការប្រកាសទទួលស្គាល់ជាផ្លូវការថែមទៀត។
ចុះផ្សាយនៅថ្ងៃ៖
ស្តាប់ - ០២:៤២
ចំនួនស្តុកនៃសារធាតុអ៊ុយរ៉ានីញ៉ូម ដែលអ៊ីរ៉ង់បានចម្រាញ់បាន បានកើនឡើងលើសកម្រិត ដែលមានកំណត់នៅក្នុងកិច្ចព្រមព្រៀងឆ្នាំ២០១៥ ដល់ទៅ៨ដង។ នេះគឺជាការលើកឡើង នៅក្នុងរបាយការណ៍របស់ ទីភ្នាក់ងារថាមពលនុយក្លេអ៊ែរអន្តរជាតិ ហៅកាត់ថា AIEA ចេញផ្សាយនៅថ្ងៃចន្ទ ទី៣០ឧសភា។
យោងតាមទីភ្នាក់ងារព័ត៌មានបារាំង AFP ដែលបានអានលំអិតរបាយការណ៍នេះ នៅខែកុម្ភៈ អ៊ីរ៉ង់មានសារធាតុអ៊ុយរ៉ានីញ៉ូមក្នុងស្តុក សរុបប្រមាណ ៣១៩៧,១គីឡូក្រាម តែនៅពាក់កណ្តាលខែឧសភា ស្តុកនេះបានឡើង ដល់ ៣៨០៩,៣គីឡូក្រាម។ ពោលគឺវាលើសស្តុក កំណត់ត្រឹម៣០០គីឡូក្រាម ដែលអ៊ីរ៉ង់ធ្លាប់បានសន្យាក្នុងកិច្ចព្រមព្រៀង។ បន្ថែមពីនេះ អ៊ីរ៉ង់បានបន្ថែមកម្រិតស្តុកនៃ អ៊ុយរ៉ានីញ៉ូមចម្រើនធាតុ២០% ពី១៨២,១គីឡូក្រាម ឡើងដល់ ២៣៨,៤គីឡូក្រាម។ តាមធម្មតាកិច្ចព្រមព្រៀងបានកំណត់ អនុញ្ញាត តែអ៊ុយរ៉ានីញ៉ូមចម្រើនធាតុអ៊ីសូតូប (Isotope) មិនឲ្យលើសពី ៣,៦៧%ទេ ដែលជាកម្រិតចាំបាច់ សម្រាប់ប្រើក្នុងវិស័យវេជ្ជសាស្ត្រ ព្យាបាលជំងឺមហារីកជាដើម។
ជាងនេះទៀត យោងតាមរបាយការណ៍ ចំនួនស្តុកនៃសារធាតុអ៊ុយរ៉ានីញ៉ូមចម្រើនធាតុអ៊ីសូតូប កម្រិត៦០% របស់អ៊ីរ៉ង់ គឺបានកើនពី ៣៣,២គីឡូក្រាម ទៅ ៤៣,១គីឡូក្រាម។ មន្ត្រីជំនាញអះអាងថា អ៊ីរ៉ង់កាន់តែឈានចូលជិតដល់ដំណាក់កាល សារធាតុអ៊ុយរ៉ានីញ៉ូមចម្រើនធាតុក្នុងកម្រិត៩០% ដែលអាចយកទៅប្រើ ដើម្បីផលិតជាគ្រាប់បែបបរមាណូ។
ដោយឡែកនៅក្នុងរបាយការណ៍មួយទៀត AIEA បានលើកឡើងថា អ៊ីរ៉ង់មិនបានផ្តល់ព៍ត៌មានលំអិត គួរជាទីទុកចិត្តទេ ទាក់ទិននឹង នូវស្លាកស្នាមសារធាតុអ៊ុយរ៉ានីញ៉ូមចម្រើនធាតុ ដែលគេបានប្រទះឃើញនៅស្ថានីយ៍នុយក្លេអ៊ែរ៣ទីតាំង ហើយដែលស្ថានីយ៍ទាំង៣នោះ គ្មានក្នុងបញ្ជីដែលអ៊ីរ៉ង់ប្រកាសជាផ្លូវការទេ។
តែយ៉ាងណា អ្នកនាំពាក្យក្រសួងការបរទេសអ៊ីរ៉ង់បានលើកឡើងថា របាយការណ៍ចុងក្រោយ របស់ AIEA នេះ គឺមានលក្ខណៈលំអៀង មិនត្រឹមត្រូវយុត្តិធម៌ទេ។ ភាគីអ៊ីរ៉ង់អះអាងថា ស្លាកស្នាមសារធាតុអ៊ុយរ៉ានីញ៉ូមចម្រើនធាតុ ដែលគេប្រទេះឃើញនោះ គឺជាស្នាដៃរបស់ក្រុមធ្វើវិទ្ធង្សនា ដែលមានចេតនាបង្កាច់បង្ខូចអ៊ីរ៉ង់តែប៉ុណ្ណោះ។ ក្រៅពីបានចោទថា AIEA ទទួលសំពាធពីអ៊ីស្រាអែល អ៊ីរ៉ង់បានអះអាងបានប្រគល់ព័ត៌មានលំអិតទៅឲ្យ AIEA រួចហើយ ដើម្បីបញ្ចប់មន្ទិលសង្ស័យ ទាក់ទិននឹងស្ថានីយ៍ដែលគ្មានក្នុងបញ្ជីប្រកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ