របាយការណ៍របស់អង្គការសហប្រជាជាតិចោទ ដាក់បន្ទុកសាជាថ្មីលើអ៊ីស្រាអែល
អាណានិគមកិច្ចរបស់អ៊ីស្រាអែល នៅលើទឹកដីប៉ាលីស្ទីន គឺប្រភពដើមចម នៃភាពតានតឹងម្តងហើយ ម្តងទៀត ហើយនិងអស្ថិរភាព ទាំងក្នុងទឹកដីប៉ាឡេស្ទីន និងអ៊ីស្រាអែល។ នេះជាការសន្និដ្ឋានរបស់គណៈកម្មការស៊ើបអង្កេតរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។ នៅក្នុងរបាយការណ៍កម្រាស១៨ទំព័រ ចេញផ្សាយកាលពីថ្ងៃអង្គារទី ៧ មិថុនា គណៈកម្មការស៊ើបអង្កេតរបស់អង្គការសហប្រជាជាតិដាក់បន្ទុកសាជាថ្មីលើភាគីអ៊ីស្រាអែល នៅក្នុងជម្លោះដ៏រ៉ាំរ៉ៃ ជាមួយប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
នៅក្នុងរបាយការណ៍របស់គណៈកម្មការស៊ើបអង្កេតអន្តរជាតិ ទាំងប្រជាជនប៉ាឡេស្ទីន និងប្រជាជនអ៊ីស្រាអែលមានគំនិតយល់ឃើញដូចគ្នា។ នោះ គឺ ការកាន់កាប់ទឹកដីប៉ាឡេស្ទីន ពីសំណាក់ អ៊ីស្រាអែលជាប្រភពឬសគល់នៃជម្លោះ ភាពតានតឹងដ៏រ៉ាំរ៉ៃ រវាងប៉ាឡេស្ទីន និងអ៊ីស្រាអែល។ អាណានិគមកិច្ចជារៀងរហូតរបស់អ៊ីស្រាអែល ទៅលើទឹកដីប៉ាឡេស្ទីនក៏ជាប្រភពនៃអស្ថិរភាព និងការអូសបន្លាយ ជម្លោះប្រដាប់អាវុធ នៅទឹកដីប៉ាឡេស្ទីន ដែលស្ថិតក្រោមការកាន់កាប់របស់អ៊ីស្រាអែល នៅជេរូសាឡឹមខាងកើត និងនៅទឹកដីអ៊ីស្រាអែលផ្ទាល់តែម្តង។
របាយការណ៍កម្រាស១៨ទំព័រ ជាលទ្ធផលនៃការស៊ើបអង្កេតរបស់គណៈកម្មការអន្តរជាតិ ដែលត្រូវបានបង្កើតឡើងជាពិសេសដោយក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅក្រោយជម្លោះប្រដាប់អាវុធ រវាងអ៊ីស្រាអែល និងក្រុមហាម៉ាស ប៉ាឡេស្ទីន កាលពីខែឧសភាឆ្នាំមុន។ នៅក្នុងសង្រ្គាម ១១ថ្ងៃ ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីន ២៦០នាក់ ចំណែកគ្រាប់រ៉ុកកែតរបស់ក្រុមហាម៉ាសបានសម្លាប់ប្រជាជនអ៊ីស្រាអែល ១៣នាក់។
សម្រាប់អ្នកសរសេររបាយការណ៍របស់គណៈកម្មការអន្តរជាតិ ការបិទបញ្ចប់នយោបាយអាណានិគមកិច្ចរបស់អ៊ីស្រាអែល ទៅលើទឹកដីប៉ាឡេស្ទីន ដែលឆ្លើយតបនឹងសេចក្តីសម្រេចរបស់ក្រុមប្រឹក្សាសន្តិសុខគឺជាដំណោះស្រាយដ៏សំខាន់ ដើម្បីបិទបញ្ចប់ អំពើហិង្សារវាងប៉ាឡេស្ទីន និងអ៊ីស្រាអែល។
គណៈកម្មការស៊ើបអង្កេតរបស់អង្គការសហប្រជាជាតិបានអះអាងថា គេបានផ្ញើរបាយការណ៍ខាងលើទៅឲ្យភាគីជម្លោះទាំងពីរ ប៉ាឡេស្ទីន និងអ៊ីសា្រអែល ប៉ុន្តែ គេមិនបានទទួលចម្លើយអ្វីពីខាងភាគីអ៊ីស្រាអែលនៅឡើយទេ។
នៅខែកុម្ភៈមុន រដ្ឋអ៊ីស្រាអែលបានអះអាងហើយថា ខ្លួននឹងមិនសហការជាមួយគណៈកម្មការដែលដឹកនាំដោយលោកស្រី Pillay ដែលមានជាសកម្មជនស្អប់ប្រឆាំងអ៊ីស្រាអែល។ អ៊ីស្រាអែលនៅធ្លាប់បានចោទប្រកាន់ គណៈកម្មការស៊ើបអង្កេតខាងលើថា មានគោលដៅ លាបពណ៌ ឲ្យគេជឿថា អ៊ីស្រាអែលជាប្រទេសបិសាចអាក្រក់។
នេះមិនមែនជាលើកទី១ ដែលអ៊ីស្រាអែលត្រូវគេដាក់បន្ទុកនៅក្នុងរបាយការណ៍របស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។ សម្រាប់ប្រធានគណៈកម្មការស៊ើបអង្កេត លោកស្រី Pillay អ៊ីស្រាអែល មិនចាប់អារម្មណ៍ពីអនុសាសន៍ ហើយក៏មិនខ្វល់ពីការអំពាវនាវរបស់គណៈកម្មការ ស្តីពីការរំលោភសិទ្ធិមនុស្សដ៏ធ្ងន់ធ្ងរ ទៅលើប្រជាជនប៉ាឡេស្ទីន។ ចំណែកក្រុមហាម៉ាសប៉ាឡេស្ទីននៅតែបន្តបាញ់គ្រាប់រ៉ុកកែត ដោយងងឹតងងល់ មិនខ្វល់ពីសុវត្ថិភាព អាយុជីវិតរបស់ប្រជាជនអ៊ីស្រាអែល។
“និទណ្ឌភាព ការបន្តធ្វើអាណានិគមកិច្ចរបស់អ៊ីស្រាអែល នៅលើទឹកដីប៉ាឡេស្ទីន ហើយនិងនយោបាយរើសអើងទៅលើប្រជាជនប៉ាឡេស្ទីន។ ទាំងនេះ ជាប្រភពដើមចមនៃជម្លោះគ្មានថ្ងៃចប់ រវាងប៉ាឡេស្ទីន និងអ៊ីស្រាអែល"៕ នេះជាការសន្និដ្ឋានចុងក្រោយរបស់គណៈកម្មការស៊ើបអង្កេតរបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ