នាយករដ្ឋមន្ត្រីអ៊ីស្រាអែល ប្រកាសរំលាយសភា ដើម្បីបោះឆ្នោតម្តងទៀត នៅខែតុលា
វិបត្តិនយោបាយអ៊ីស្រាអែល កំពុងតែលេចរូបរាងកាន់តែច្បាស់។ លោកនាយករដ្ឋមន្ត្រី ណាហ្វតាលី បេននែត បានប្រកាសនៅតាមបណ្តាញទូរទស្សន៍អ៊ីស្រាអែល កាលពីល្ងាចថ្ងៃចន្ទ ទី២០មិថុនា ថាលោកនឹងសម្រេចស្នើរំលាយសភា ដើម្បីបោះឆ្នោតសាជាថ្មី នៅខែតុលាខាងមុខ។ យោងតាមកិច្ចព្រមព្រៀងរដ្ឋាភិបាលចម្រុះ លោក យ៉ាអៀរ ឡាពីដ នឹងត្រូវឡើងមកធ្វើជានាយករដ្ឋមន្ត្រីបណ្តោះអាសន្ន ក្នុងអំឡុងពេលនេះ ទំរាំដល់មានរដ្ឋាភិបាលថ្មី។
ចុះផ្សាយនៅថ្ងៃ៖
ស្តាប់ - ០២:២៦
មិនទាន់បានមួយឆ្នាំស្រួលបួលផង ក្រោយការបង្កើតរដ្ឋាភិបាលចម្រុះ លោកនាយករដ្ឋមន្ត្រី ណាហ្វតាលី បេននែត បានប្រកាសថាលោកនឹងស្នើឲ្យរំលាយសភា។ នៅតាមកញ្ចក់ទូរទស្សន៍អ៊ីស្រាអែល លោកណាហ្វតាលី បេននែត បានសន្យាថាលោក យ៉ាអៀរ ឡាពីដ នឹងឡើងមកធ្វើជានាយករដ្ឋមន្ត្រីបណ្តោះអាសន្ន រហូតដល់មានរដ្ឋាភិបាលថ្មី ក្រោយការបោះឆ្នោត នៅថ្ងៃទី២៥តុលាខាងមុខ។
គួររំលឹកថា លោកយ៉ាអៀរ ឡាពីដ និងលោកណាហ្វតាលី បេននែត បានរួមគ្នាបង្កើតរដ្ឋាភិបាលចម្រុះ កាលពីខែមិថុនា ឆ្នាំ២០២១ ជាមួយនឹងក្រុមគណបក្សជាច្រើន ទាំងឆ្វេង ទាំងស្តាំ និងកណ្តាលនិយម។ ជារដ្ឋាភិបាលចម្រុះ លើកទីមួយក្នុងប្រវត្តិសាស្ត្រអ៊ីស្រាអែល ហើយដែលមានកម្មវត្ថុ រុញច្រានលោក ប៊ីនយ៉ាមីន ណេតាន់យ៉ាហ៊ូ ឲ្យចាកចេញពីអំណាច បន្ទាប់ពីបានដឹកនាំរដ្ឋាភិបាល អស់រយៈពេល១២ឆ្នាំ។
តែយ៉ាងណា ឆ្លងកាត់មួយឆ្នាំមកនេះ រដ្ឋាភិបាលចម្រុះនេះ បានបង្ហាញភាពប្រេះស្រាំ បាក់បែកសមាគ្គី។ សមាជិកសភាខ្លះ បានប្រកាសឈប់គាំទ្ររដ្ឋាភិបាលចម្រុះ ហើយបានដកខ្លួនចេញ ឈប់នៅក្នុងសម្ព័ន្ធបក្សសំឡេងភាគច្រើនក្នុងសភា បន្ទាប់ពីរដ្ឋាភិបាលរបស់លោក ណាហ្វតាលី បេននែត បានព្យាយាមអនុម័តច្បាប់ ផ្តល់ « សិទ្ធិជាពលរដ្ឋ » ឲ្យទៅក្រុមអាណានិគមជនអ៊ីស្រាអែល រស់នៅក្នុងដែនដីស៊ីហ្សកដានី។
ជាងនេះទៀត ក្រុមបក្សរបស់លោក ណេតាន់យ៉ាហ៊ូ ដែលជាបក្សប្រឆាំងក្នុងសភា បានគំរាមថា នឹងស្នើរំលាយសភានេះចោលដែរ ដើម្បីបោះឆ្នោតសាជាថ្មី ព្រោះរដ្ឋាភិបាលចម្រុះបច្ចុប្បន្ននេះ ជារដ្ឋាភិបាលគ្មានសមត្ថភាពដឹកនាំប្រទេស។ គឺនៅក្នុងបរិបទនេះ បានជាលោក លោកយ៉ាអៀរ ឡាពីដ និងលោកណាហ្វតាលី បេននែត បានរួមគ្នាសម្រេចស្នើរំលាយសភា ឲ្យបានមុនក្រុមរបស់លោកណេតាន់យ៉ាហ៊ូ។
គួរបញ្ជាក់ថា តាមច្បាប់កំណត់ ការស្នើរំលាយសភាពីសំណាក់រដ្ឋាភិបាល នឹងត្រូវយកទៅឲ្យសមាជិកសភាខ្លួនឯង បោះឆ្នោតយល់ព្រម។ ចំណែកការបោះឆ្នោតជ្រើសរើសសមាជិកសភាថ្មី នឹងត្រូវធ្វើ ក្នុងរវាង៣ខែបន្ទាប់ពីការប្រកាសរំលាយសភា។
បើតាមការវិភាគ ក្រុមបក្សរបស់លោកណេតាន់យ៉ាហ៊ូ កំពុងតែព្យាយាមឃោសនា ដើម្បីអាចវិលត្រលប់ចូលសភា ហើយសង្ឃឹមថាអាចមានសំឡេងភាគច្រើន លើស៦០អាសនៈ។ លោក Yohanan Plesner ប្រធានវិទ្យាស្ថានប្រជាធិបតេយ្យអ៊ីស្រាអែល បានលើកឡើងថា ការរំលាយសភា ដែលទើបតែចូលធ្វើការបានតែមួយឆ្នាំនេះ គឺជាសញ្ញាបង្ហាញយ៉ាងច្បាស់ថា រដ្ឋាភិបាលចម្រុះ មិនបានបិទបញ្ជប់វិបត្តិនយោបាយអ៊ីស្រាអែលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ