ប្រមុខការទូតអឺរ៉ុប ទៅអ៊ីរ៉ង់ដើម្បីរកវិធីស្រោចស្រង់កិច្ចព្រមព្រៀងនុយក្លេអ៊ែរ ដែលកំពុងតែជិតក្ស័យ
លោក ហ្សូហ្សែពវ បូរែល ប្រមុខការទូតអឺរ៉ុប បានទៅដល់រដ្ឋធានីតេអេរ៉ង់ កាលពីល្ងាចថ្ងៃសុក្រ ទី២៤មិថុនាម្សិលមិញ។ ជាទស្សនកិច្ច ដែលប្រមុខការទូតអឺរ៉ុប មានបំណងជួបចរចា ជាមួយភាគីអ៊ីរ៉ង់ ដើម្បីរកវិធីស្រោចស្រង់កិច្ចព្រមព្រៀងនុយក្លេអ៊ែរ។ បច្ចុប្បន្ននេះ ការចរចាដើម្បីសង្គ្រោះកិច្ចព្រមព្រៀងនេះ កំពុងស្ថិតនៅជាប់គាំង ជាងនេះទៀត យោងតាមទីភ្នាក់ងារថាមពលនុយក្លេអ៊ែរអន្តរជាតិ គឺអ៊ីរ៉ង់កំពុងតែដើរចាកកាន់តែឆ្ងាយ ពីកាតព្វកិច្ចរបស់ខ្លួន ដែលមានចែងក្នុងកិច្ចព្រមព្រៀង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
មុននឹងឡើងយន្តហោះ ឆ្ពោះទៅកាន់តេអេរ៉ង់ លោក Josep Borrell ប្រមុខការទូតអឺរ៉ុប បានសរសេរលើទំព័រ Twitter ថា « ការចរចាផ្លូវការទូត គឺជាមធ្យោបាយតែមួយគត់ ដើម្បីឈានទៅ បិទបញ្ចប់ភាពតានតឹងនាពេលបច្ចុប្បន្ននេះ ហើយត្រលប់ទៅកាន់ការអនុវត្តយ៉ាងពេញលេញឡើងវិញ នូវកិច្ចព្រមព្រៀងនុយក្លេអ៊ែរអ៊ីរ៉ង់។
ក្រសួងការបរទេសអ៊ីរ៉ង់ បានលើកឡើងថា ទស្សនកិច្ច២ថ្ងៃ របស់ប្រមុខការទូតអឺរ៉ុបនៅតេអេរ៉ង់ គឺធ្វើឡើងក្នុងក្របខណ្ឌនៃទំនាក់ទំនងទ្វេភាគី អឺរ៉ង់-សហភាពអឺរ៉ុប ព្រមទាំងផ្តោតទៅលើសំណុំរឿងតំបន់និងអន្តរជាតិ និងស្តីអំពីដំណើរវិវ្ឍន៍នៃការចរចា ទាក់ទិននឹងការដកចេញនូវទណ្ឌកម្មសេដ្ឋកិច្ចលើអ៊ីរ៉ង់។
ដោយឡែក ប្រភពពីសហភាពអឺរ៉ុបវិញ បានឲ្យដឹងថា កម្មវត្ថុនៃដំណើររបស់លោក Josep Borrell គឺដើម្បីព្យាយាមផ្តល់សន្ទុះឡើងវិញ ដល់ការចរចានៅទីក្រុងវីយែន ដើម្បីសង្គ្រោះកិច្ចព្រមព្រៀងនុយក្លេអ៊ែរ។ គួរកត់សំគាល់ថា ប៉ុន្មានខែចុងក្រោយនេះ ភាពតានតឹងមានកាន់តែខ្លាំង រវាងអ៊ីរ៉ង់ និងទីភ្នាក់ងារថាមពលអន្តរជាតិ AIEA ។ ដើមខែមិថុនា អ៊ីរ៉ង់ បានដកខ្សែកាម៉េរ៉ាសុវត្ថិភាព ដែលទីភ្នាក់ងារ AIEA ដាក់នៅតាមស្ថានីយ៍នុយក្លេអ៊ែរអ៊ីរ៉ង់ ដើម្បីតាមដានសកម្មភាព។ ជាងនេះទៀត យោងតាមរបាយការណ៍របស់ AIEA អ៊ីរ៉ង់បានចម្រាញ់ធាតុអ៊ុយរ៉ានីញ៉ូម ក្នុងកម្រិតភាគរយខ្ពស់ បានកាន់តែច្រើន
កាលពីល្ងាចថ្ងៃព្រហស្បតិ៍ គេឃើញលោក Josep Borrell បានពិសារបាយល្ងាច ជាមួយលោក Enrique Mora តំណាងក្រុមចរចារបស់អឺរ៉ុប និងលោក Robert Malley ប្រេសិតពិសេសរបស់រដ្ឋាភិបាលអាមេរិក ទទួលបន្ទុកកិច្ចការអ៊ីរ៉ង់។ គួរបញ្ជាក់ថា រដ្ឋាភិបាលលោកចូ បៃដិនបានបង្ហាញជំហរចង់ត្រលប់មកចូលរួម ក្នុងកិច្ចព្រមព្រៀងនេះវិញ ដោយបានចាប់ផ្តើម ចូលរួមដោយប្រយោលនៅទីក្រុងវីយែន។ តែយ៉ាងណា អាមេរិកបានទាមទារឲ្យអ៊ីរ៉ង់ត្រូវតែបែមកគោរពកាតព្វកិច្ចខ្លួនជាមុនសិន។ ផ្ទុយទៅវិញ ភាគីអ៊ីរ៉ង់បានលើកឡើងថាខ្លួនបានគោរពកាតព្វកិច្ចមករហូត តែអាមេរិកទេ ដែលបានដកខ្លួនចេញដោយអត្តនោម័ត។ អ៊ីរ៉ង់នៅតែបន្តទាមទារថា អាមេរិកត្រូវដកទណ្ឌកម្មសេដ្ឋកិច្ចទាំងអស់ ដែលដាក់លើអ៊ីរ៉ង់ជាមុននសិន ទើបខ្លួនយល់ព្រមបន្តគោរពកិច្ចព្រមព្រៀងឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ