« សង្គ្រាមព័ត៌មានវិទ្យា » រវាងអ៊ីរ៉ង់ និង អ៊ីស្រាអែល ចាប់ផ្តើមកំរើកសាជាថ្មី
អ៊ីរ៉ង់ និងអ៊ីស្រាអែល គឺជាសត្រូវប្តូរស្លាប់ប្តូររស់នឹងគ្នា នៅតំបន់ដើមបូព៌ា។ បើទោះជាមិនធ្លាប់បានប្រើអាវុធប្រយុទ្ធគ្នាដោយផ្ទាល់ តែគូសត្រូវទាំង២នេះ បានធ្វើសង្គ្រាមមួយបែបទៀត ដោយប្រើបច្ចេកវិទ្យាព័ត៌មានវិទ្យា វាយប្រហារទៅលើហេដ្ឋរចនាសម្ព័ន្ធរដ្ឋ យោធា និងស៊ីវីលផងដែរ។ ប៉ុន្មានថ្ងៃចុងក្រោយនេះ សង្គ្រាមព័ត៌មានវិទ្យារវាងប្រទេសទាំង២នេះ បានចាប់ផ្តើមកំរើកឡើងវិញយ៉ាងសកម្ម។
ចុះផ្សាយនៅថ្ងៃ៖
ស្តាប់ - ០២:១២
លើកនេះ គឺចោរព័ត៌មានវិទ្យារបស់អ៊ីរ៉ង់ ដែលបានវាយប្រហារមកលើក្រុមហ៊ុនទេសចរណ៍អ៊ីស្រាអែល ចំនួនជាង២០ក្រុមហ៊ុន។ យោងតាមប្រភពពីអាជ្ញាធរអ៊ីស្រាអែល យ៉ាងហោចណាស់ មានជនជាតិអ៊ីស្រាអែលចំនួន ប្រមាណ៣សែននាក់ ដែលបានរងគ្រោះដោយការវាប្រហារនេះ។ ចោរព័ត៌មានវិទ្យាអ៊ីរ៉ង់ បានចូលមកលួចប្រមូលទិន្នន័យផ្ទាល់ខ្លួន មានដូចជាលេខទូរស័ព្ទ អាស័យដ្ឋានស្នាក់នៅ លេខបណ្ឌធនាគារ និងទិន្នន័យសុខភាពថែមទៀតផង។
គួរបញ្ជាក់ថា ការវាយប្រហារនេះ ត្រូវបានស្រាវជ្រាវដឹង ដោយនាយកដ្ឋានជាតិសន្តិសុខព័ត៌មានវិទ្យាអ៊ីស្រាអែល ដែលអះអាងថាគឺជាស្នាដៃរបស់អ៊ីរ៉ង់។ ការវាយប្រហាររបស់អ៊ីរ៉ង់ ដែលទំនងជាការសងសិកមកលើអ៊ីស្រាអែលវិញ។ កាលពីប៉ុន្មានថ្ងៃមុន រោងចក្រដែកថែបដ៏ធំមួយរបស់អ៊ីរ៉ង់ ត្រូវបានឆាបឆេះដោយអគ្គីភ័យ ដែលអាចបណ្តាលមកពីបញ្ហាបច្ចេកទេសព័ត៌មានវិទ្យា។ ភាគីអ៊ីស្រាអែល មិនបានទទួលស្គាល់ជាផ្លូវការ ថាស្នាដៃខ្លួនមែន តែមន្ត្រីធំរបស់អ៊ីស្រាអែលជាច្រើននាក់ បានព្រលយពាក្យថា អ៊ីស្រាអែល មិនមែនមិនធ្លាប់ធ្វើរឿងបែបនេះទៅលើអ៊ីរ៉ង់ទេ។
គួរកត់សំគាល់ថា កន្លងមក ទោះមិនបានប្រកាសពីប្រតិបត្តិការក៏ដូចជាស្នាដៃរបស់ខ្លួន តែអ៊ីស្រាអែល ត្រូវគេដឹងថាតែងតែបានបើកការវាយប្រហារ ទៅលើអ៊ីរ៉ង់ ចំចំណុចគោលដៅមួយចំនួន សំដៅបំផ្លាញឬរំខានកម្មវិធីនុយក្លេអ៊ែររបស់អ៊ីរ៉ង់។ អ្វីដែលជាការបារម្ភបំផុតរបស់អ៊ីស្រាអែល គឺខ្លាចអ៊ីរ៉ង់មានអាវុធនុយក្លេអ៊ែរ ដែលអាចបាច់កម្ទេចអ៊ីស្រាអែលឲ្យរលាយ។ អ៊ីស្រាអែលបានបង្កើតក្រុមប្រតិបត្តិការជំនាញពិសេសមួយ ឈ្មោះក្រុម៨២០០ ដែលមានតួនាទីបើកប្រតិបត្តិការវាយប្រហារ តាមប្រព័ន្ធបច្ចេកវិទ្យាព័ត៌មានវិទ្យា ទៅលើអ៊ីរ៉ង់។ គឺក្រុមនេះហើយ ដែលបានវាយប្រហារ ធ្វើឲ្យខូចប្រព័ន្ធចម្រាញ់ធាតុអ៊ុយរ៉ានីញ៉ូម នៅរោងចក្រនុយក្លេអ៊ែរ Natanz នៅភាគខាងត្បូងអ៊ីរ៉ង់។
ដោយឡែក ការវាយប្រហារ ក៏អាចធ្វើទៅលើហេដ្ឋារចនាសម្ព័ន្ធស៊ីវីលដែរ។ ក្រុមប្រតិបត្តិការ៨២០០ របស់អ៊ីស្រាអែល ធ្លាប់បានធ្វើឲ្យខូចប្រព័ន្ធព័ត៌មានវិទ្យារបស់កំពង់ផែអ៊ីរ៉ង់ Bandar Abbas កើតជាបញ្ហាកកស្ទះ យ៉ាងធ្ងន់ធ្ងរនៅកំពង់ផែនេះ។ ជាការសងសិកវិញ អ៊ីរ៉ង់ធ្លាប់បានវាយប្រហារ ទៅលើប្រព័ន្ធព័ត៌មានវិទ្យា នៃបណ្តាញចែកចាយទឹកស្អាតនៅអ៊ីស្រាអែល ហើយថ្មីៗនេះ ចោរព័ត៌មានវិទ្យាអ៊ីរ៉ង់បានបន្លំចូល ក្នុងទូរស័ព្ទរបស់ Benny Gantz រដ្ឋមន្ត្រីក្រសួងការពារជាតិអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ