ប៉ាឡេស្ទីនប្រគល់គ្រាប់កាំភ្លើង ដែលបានសម្លាប់ស្ត្រីអ្នកកាសែត Al Jazeera ទៅឲ្យអ្នកជំនាញអាមេរិកធ្វើកោសលវិច័យ
អាជ្ញាធរប៉ាឡេស្ទីន បានប្រគល់គ្រាប់កាំភ្លើងដែលបានសម្លាប់ ស្ត្រីអ្នកកាសែតអាមេរិក ដើមកំណើតប៉ាឡេស្ទីន ឈ្មោះ ហ្ស៊ីរីន អាប៊ូ អាក្លេហ (Shireen Abu Akleh) ទៅឲ្យអ្នកជំនាញអាមេរិក ដើម្បីធ្វើកោសវិច័យ។ ស្ត្រីអ្នកកាសែតដែលធ្វើការឲ្យទូរទស្សន៍ Al Jazeera បានស្លាប់កាលពីថ្ងៃទី១១ឧសភា ក្នុងពេលចុះទៅយកព័ត៌មានស្តីពីប្រតិបត្តិការបង្ក្រាបរបស់សមត្ថកិច្ចអ៊ីស្រាអែល នៅតំបន់ស៊ីហ្សកដានី។ អាជ្ញាធរអ៊ីស្រាអែលបន្តអះអាងថា ស្ត្រីអ្នកកាសែតរូបនេះ មិនមែនស្លាប់ដោយសារគ្រាប់កាំភ្លើងរបស់អ៊ីស្រាអែលនោះទេ។
ចុះផ្សាយនៅថ្ងៃ៖
ស្តាប់ - ០២:៤១
លោករដ្ឋអាជ្ញាប៉ាឡេស្ទីន Akram Al-Khatib បានប្រាប់អ្នកយកព័ត៌មានបារាំងថា គ្រាប់កាំភ្លើងដែលបានផ្តាច់ជីវិត ស្ត្រីអ្នកកាសែត ហ្ស៊ីរីន អាប៊ូ អាក្លេហ កាលពីថ្ងៃទី១១ឧសភា ត្រូវបានប្រគល់ទៅឲ្យភាគីសហរដ្ឋអាមេរិកហើយ។ លោកបញ្ជាក់ថា គ្រាប់កាំភ្លើងនេះ ជាប្រភេទគ្រាប់ទំហំ ៥.៥៦មីលីម៉ែត្រ បាញ់ចេញពីកាំភ្លើងពាក់កណ្តាលអូតូម៉ាទិក ប្រភេទ Ruger Mini-14។ លោករដ្ឋអាជ្ញាបានអះអាងថា ភាគីអាមេរិកបានសន្យាថានឹងប្រគល់ត្រលប់មកវិញ បន្ទាប់ពីធ្វើកោសលវិច័យចប់សព្វគ្រប់។
ដោយឡែក ប្រភពពីមន្ត្រីប៉ាឡេស្ទីននៅតក្រុងរ៉ាម៉ាឡា គឺការធ្វើកោសលវិច័យលើគ្រាប់កាំភ្លើងនេះ នឹងត្រូវធ្វើនៅស្ថានទូតសហរដ្ឋអាមេរិក នៅទីក្រុងហ្សេរុយសាឡឹម។
គួរបញ្ជាក់ថា ស្ត្រីអ្នកកាសែតឈ្មោះ ហ្ស៊ីរីន អាប៊ូ អាក្លេហ ធ្វើការឲ្យទូរទស្សន៍ Al Jazeera បានរងគ្រាប់កាំភ្លើងចំក្បាល ស្លាប់នៅតំបន់ស៊ីហ្សកដានី ក្នុងពេលដែលគាត់បានចុះទៅយកព័ត៌មាន ស្តីពីប្រតិបត្តិការតាមចាប់ភេរវជនប៉ាឡេស្ទីន របស់សមត្ថកិច្ចអ៊ីស្រាអែល។ ការស្លាប់របស់ស្ត្រីអ្នកកាសែតអាមេរិកដើមកំណើតប៉ាឡេស្ទីនរូបនេះ បានបង្កឲ្យមានបាតុកម្ម និងការប្រឈមមុខដាក់គ្នាដោយហិង្សាជាច្រើនថ្ងៃ រវាងប្រជាជនប៉ាឡេស្ទីន និងអាជ្ញាធរអ៊ីស្រាអែល។
ទាំងអាជ្ញាធរប៉ាឡេស្ទីន ទាំងទូរទស្សន៍ Al Jazeera និងប្រទេសកាតាផង បានសន្និដ្ឋានចោទប្រកាន់ភ្លាមៗ ថាគឺកងទាហានអ៊ីស្រាអែល ដែលបានបាញ់គ្រាប់កាំភ្លើង បណ្តាលឲ្យស្លាប់ស្ត្រីអ្នកកាសែតរូបនេះ។ កាលពីថ្ងៃទី២៤មិថុនា លោក Ravina Shamdasani អ្នកនាំពាក្យនៃឧត្តមស្នងការសិទ្ធិមនុស្ស អង្គការសហប្រជាជាតិ បានសន្និដ្ឋានដែរ ដោយផ្អែកលើព័ត៌មានដែលប្រមូលបាន ទាំងខាងអ៊ីស្រាអែលនិងប៉ាឡេស្ទីនផង គឺពិតជាគ្រប់កាំភ្លើងរបស់សមត្ថកិច្ចអ៊ីស្រាអែល ដែលបានសម្លាប់ស្ត្រីអ្នកកាសែត ហ្ស៊ីរីន អាប៊ូ អាក្លេហ ព្រមទាំងបានធ្វើឲ្យរបួសសហសេវិកម្នាក់ទៀតរបស់ស្ត្រីនេះ នៅថ្ងៃកើតហេតុ។ យ៉ាងណាមិញអ្នកនាំពាក្យរូបនេះ បានសម្តែងការខកចិត្តដែល ភាគីអ៊ីស្រាអែលមិនព្រមបើកការស៊ើបអង្កេត។
តែយ៉ាងណា ខាងភាគីអ៊ីស្រាអែល បានអះអាងថា គេមិនអាចសន្និដ្ឋានឲ្យច្បាស់ប្រាកដបានទេ ថាគ្រាប់កាំភ្លើងនេោះ ត្រូវបានបាញ់ដោយទាហានអ៊ីស្រាអែល ឬក៏អាចបាញ់ដោយជនប៉ាឡេស្ទីន ដែលបានបាញ់រះតដៃ ដោយមិនរើសមុខនៅថ្ងៃកើតហេតុ។ លោក Benny Gantz រដ្ឋមន្ត្រីការពារអ៊ីស្រាអែល បានចាត់ទុក ការស៊ើបអង្កេតរបស់ឧត្តមស្នងការសិទ្ធិមនុស្ស ថាជារឿងគ្មានមូលដ្នាន។
សូមបញ្ជាក់ដែរថា ភាគីអ៊ីស្រាអែល បានទាមទារយកគ្រាប់កាំភ្លើងទៅពិនិត្យ តែភាគីបា៉ាឡេស្ទីនបានបដិសេធ ដោយមិនទុកចិត្ត។ ការប្រគល់គ្រាប់កាំភ្លើងទៅឲ្យភាគីអាមេរិក ជាអ្នកធ្វើកោសលវិច័យនេះ គឺគាប់ជួនចំពេលដែលលោក ចូ បៃដិន នឹងទៅធ្វើទស្សនកិច្ចនៅអ៊ីស្រាអែល និងនៅតំបន់ស៊ីសហ្សកដានី នៅរវាងជាង១០ថ្ងៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ