អារ៉ាប៊ីសាអូឌីតរៀបចំបុណ្យសាសនាដ៏ធំបំផុតលើកដំបូង ក្រោយកូវីដ
រលកចម្លងកូវីដចាប់មានសន្ទុះ ជាថ្មី នៅស្ទើរគ្រប់ទិសទី។ ជាង២០ម៉ឺននាក់ ក្នុងមួយថ្ងៃទី៥កក្កដា នៅប្រទេសបារាំង។ ស៊ីអាន់ ក្រុងដ៏ធំរបស់ចិននៅភាគកណ្តាលប្រទេស បានបិទខ្ទប់តាំងពីថ្ងៃទី ៥កក្កដាមក សម្រាប់យ៉ាងហោចមួយសប្តាហ៍ សៀងហៃក្រុងពាណិជ្ជកម្មដ៏សំខាន់ ត្រៀមដាក់វិធានការតឹងរឹងជាថ្មី ប្រឈមនឹងរលកចម្លងមេរោគកូវីដបំប្លែងអូមីក្រុង។ ប៉ុន្តែនៅអារ៉ាប៊ីសាអូឌីត រាជាណាចក្រ កំពុងរៀបចំទទួលដំណើរស្វែងបុណ្យរបស់សាសនាអ៊ីស្លាម ដ៏ធំបំផុតមួយ ចាប់ពីថ្ងៃពុធទី៦កក្កដានេះទៅ ដោយមានអ្នកចូលរួមរាប់ទៅវាល់លាននាក់ និងដោយគ្មានពាក់ម៉ាសទេ។
ចុះផ្សាយនៅថ្ងៃ៖
ស្តាប់ - ០១:៤៨
បន្ទាប់ពីសង្រួមកម្មវិធីអស់ពីរឆ្នាំដោយហេតុមានជំងឺរាតត្បាតសកលកូវីដ១៩មក នៅឆ្នាំ២០២២នេះ អ្នកកាន់សាសនាអ៊ីស្លាមប្រមាណមួយលាននាក់ ក្នុងនោះ៨៥០០០០នាក់ មកពីបណ្តាប្រទេសអ៊ីស្លាមលើពិភពលោក ដែលបានចាក់វ៉ាក់សាំងកូវីដរួច និងមានលទ្ធផលតេស្តអវិជ្ជមាន កាលពី៧២ម៉ោងមុន បានទទួលការអនុញ្ញាតឱ្យចូលរួមក្នុងពិធីបុណ្យសាសនាដ៏ធំ នៅវិហារដ៏សក្តិសិទ្ធិ La Mecque ក្នុងភាគខាងលិចប្រទេសអារ៉ាប៊ីសាអូឌីត។ ការជ្រើសរើសអ្នកចូលរួមក្នុងដំណើរស្វែងបុណ្យប្រព្រឹត្តទៅដោយការចាប់ឆ្នោត និងមានអាយុក្រោម៦៥ឆ្នាំ។
ជាការប្រមូលផ្តុំដ៏ធំខ្លាំងណាស់ បើប្រៀបទៅឆ្នាំ២០២០ និង២០២១ តែតិចជាងកាលពីឆ្នាំ២០១៩ច្រើន។ វិធីបុណ្យសាសនាមួយនេះ តែងប្រមូលអ្នកកាន់សាសនាអ៊ីស្លាមនៅលើពិភពលោក ដល់ទៅជាង២លាននាក់កន្លះកាលពីមុនកូវីដ។
តាំងពីផ្ទុះជំងឺរាតត្បាតកូវីដ១៩មក អារ៉ាប៊ីសាអូឌីត រាប់ឃើញមានអ្នកឆ្លងសរុបជាង៧សែន៩ម៉ឺន៥ពាន់នាក់ និងស្លាប់ជាង៩ពាន់នាក់។ ក្រៅអំពីទាមទារឱ្យអ្នកចូលរួមធ្វើតេស្តកូវីដនៅ៧២ម៉ោងមុនបន្ថែមពីលើការចាក់វ៉ាក់សាំង អាជ្ញាធរអារ៉ាប៊ីសាអូឌីតបានរៀបចំមណ្ឌលសុខភាព និងគ្លីនិកចល័ត ជាច្រើនកន្លែងក្នុងរង្វង់ធ្លានៃវិហារ La mecque ដ៏ធំធេង ព្រមទាំងគ្រូពេទ្យស្រីសម្រាប់ធ្វើអន្តរាគមន៍ឱ្យបានឆាប់រហ័ស។
ឆ្នាំនេះពិធីបុណ្យសាសនាមានបង្កប់អត្ថន័យនយោបាយដ៏ជ្រាលជ្រៅមួយ ព្រោះនាឱកាសនេះ រាជាណាចក្រមហាអភិរក្ស ចង់បង្ហាញអំពីការវិវឌ្ឍនៃសង្គមអារ៉ាប៊ីសាអូឌីត ដែលរងការចោទប្រកាន់ជាច្រើនពីបទរំលោភសិទ្ធិមនុស្ស។ ជាលើកទីមួយ (តាំងពីឆ្នាំ២០២១មក) អារ៉ាប៊ីសាអូឌីតបានអនុញ្ញាតឱ្យស្រ្តីអ៊ីស្លាមអាចចូលរួមក្នុងពិធីសាសនា តែម្នាក់ឯង ដោយមិនចាំបាច់មានសមាជិកគ្រួសារភេទប្រុសជូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ