អ៊ីស្រាអែល ប្រកាសកម្ចាត់បានមេដឹកនាំយោធាជីហាតអ៊ីស្លាមនៅហ្កាហ្សា
ចូលដល់ថ្ងៃទី បី នៃប្រតិបត្តិការវាយប្រហារលើតំបន់ហ្កាហ្សា អ៊ីស្រាអែលបន្តបាញ់យ៉ាងសន្ធាប់លើដែនដីមួយដុំរបស់ប៉ាឡេស្ទីន។ ចំណែកក្រុមយោធាជីហាតអ៊ីស្លាម បានតបត ដោយបាញ់សំដៅក្រុងហ្សេរុយសាឡិម។ គ្មានសញ្ញាថមថយសោះ។ តុល្យការនៃជនរងគ្រោះនៅតំបន់ហ្កាហ្សា កាន់តែធ្ងន់ធ្ងរជាលំដាប់។ មានស្លាប់យ៉ាងហោចណាស់ ៣១នាក់ ក្នុងនោះ៦នាក់ជាកុមារ។ មេបញ្ជាការក្រុមជីហាតអ៊ីស្លាមនៅហ្កាហ្សាក៏ត្រូវកម្ចាត់បានដែរ។
ចុះផ្សាយនៅថ្ងៃ៖
ស្តាប់ - ០២:០៩
ភាពតានតឹងមានកាន់តែខ្លាំងនិងរំកិលទៅដល់ក្រុងប្រវត្តិសាស្ត្រដ៏ចំណាស់។ ជាលើកទីមួយ ក្រុមជីហាតអ៊ីស្លាម បានបាញ់រ៉ុកកែតសំដៅក្រុងហ្សេរុយសាឡិម នៅថ្ងៃអាទិត្យទី ៧ សីហា ដែលត្រូវជាថ្ងៃ Tisha Beav របស់ជនជាតិជ្វីហ្វ ដោយជាថ្ងៃតមអាហារ និងជាថ្ងៃខួបនៃការបំផ្លាញវិហារពីរនៃទីលាននៅក្រុងសក្តិសិទ្ធិ ដែលមានវិហារAl Aqsa ជាទីគោរពបូជាទីបីរបស់សាសនាអ៊ីស្លាមតាំងនៅដែរ។ អ៊ីសា្រអែលបានដាក់ពង្រាយប៉ូលិសក្នុងក្របខ័ណ្ឌនៃវិធានការពិសេស និងបាញ់ស្ទាក់រ៉ុកកែតប៉ាឡេស្ទីនបានប្រមាណ៩៧%។
នៅលើសមរភូមិហ្កាហ្សាវិញ យោធាអ៊ីស្រាអែល បានបន្តវាយប្រហារតាមផ្លូវអាកាស ដោយផ្ចង់ទិសដៅលើមេបញ្ជាការរបស់ក្រុមជីហាតអ៊ីស្លាម។ ជាលទ្ធផល មេដឹកនាំយោធា ភាគខាងត្បូងហ្កាហ្សាKhaled Mansour បានស្លាប់។ នេះបើតាមសេចក្តីប្រកាសរបស់យោធាអ៊ីស្រាអែល ដែលបញ្ជាក់ថាពិតដោយអង្គការយោធាប៉ាឡេស្ទីនជីហាតអ៊ីស្លាម។
នាយករដ្ឋមន្ត្រីអ៊ីស្រាអែល បានចាត់ទុកការស្លាប់របស់ Khaleh Mansour ថាជាជោគជ័យដ៏អស្ចារ្យ និងសន្យាជាថ្មីថាអ៊ីស្រាអែលនឹងមិនខ្លាចនឹងចំណាយពេលវែងដ៏ចាំបាច់ដើម្បីបន្តប្រតិបត្តិការកម្ចាត់ពួកជីហាតអ៊ីស្លាម នៅហ្កាហ្សាទេ។
តើពួកជីហាតអ៊ីស្លាមនៅហ្កាហ្សាជានរណា ? ជាចលនាប៉ាឡេស្ទីនប្រឆាំងនឹងយោធាអ៊ីស្រាអែល ដែលបង្កើតឡើងដោយក្រុមនិស្សិតសាកលវិទ្យាល័យអ៊ីស្លាមនៅហ្កាហ្សា កាលពីឆ្នាំ១៩៨១។ ស្និទ្ធនឹងចលនាហាម៉ាស ចលនាជីហាតអ៊ីស្លាមមានសកម្មភាពជាចម្បងនៅតំបន់ហ្កាហ្សា និងសកម្មភាពខ្លះដែរនៅតំបន់ស៊ីហ្សកដានី ដែលស្ថិតក្រោមអាណានិគមកិច្ចអ៊ីស្រាអែលតាំងពីឆ្នាំ១៩៦៧មក។
ដូចហាម៉ាស ចលនាជីហាតអ៊ីស្លាមត្រូវបានអ៊ីស្រាអែល សហរដ្ឋអាមេរិក និងសហភាពអឺរ៉ុបចាត់ទុកក្រុមភេរវនិយម តែគាំទ្រដោយអ៊ីរ៉ង់។ គ្រាន់តែឃើញប្រតិបត្តិការអ៊ីស្រាអែលភ្លាម ប្រមុខដឹកនាំយោធាឆ្មាំបដិវត្តអ៊ីរ៉ង់ បានប្រកាសថា ប៉ាឡេស្ទីនមិនតស៊ូតែម្នាក់ឯងប្រឆាំងនឹងអ៊ីស្រាអែលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ