អ៊ីរ៉ង់បានឆ្លើយតបទៅនឹងសំណើកិច្ចព្រមព្រៀងនុយក្លេអ៊ែរចុងក្រោយរបស់សហភាពអឺរ៉ុប
ថ្ងៃចន្ទនេះអ៊ីរ៉ង់បាន ផ្តល់ការឆ្លើយតបរបស់ខ្លួនចំពោះសេចក្តីព្រាងចុងក្រោយ នៃកិច្ចព្រមព្រៀងនុយក្លេអ៊ែរដែលបានធ្វើឡើងកាលពីឆ្នាំ ២០១៥ ដោយមានការសម្របសម្រួលពីសហភាពអឺរ៉ុប ជាមួយប្រទេសមហាអំណាចនៅទីក្រុងវីយែន។ យោងតាមទីភ្នាក់ងារសារព័ត៌មានផ្លូវការរបស់អ៊ីរ៉ង់ ការឆ្លើយតបនេះត្រូវបានដាក់ជាលាយលក្ខណ៍អក្សរ ហើយអ៊ីរ៉ង់ជឿជាក់ថា កិច្ចព្រមព្រៀងនុយក្លេអ៊ែរនេះនឹងអាចទទួលយកបានពីគ្រប់ភាគី បើសហរដ្ឋអាមេរិកមានការបត់បែនខ្លះ ដោយមើលទៅលើស្ថានភាពពិតបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
បន្ទាប់ពីបានផ្អាកការពិភាក្សាអស់រយៈពេលជាច្រើនខែមក ប្រទេសមហាអំណាចមានដូចជា អង់គ្លេស ចិន បារាំង អាឡឺម៉ង់ អ៊ីរ៉ង់ និងរុស្ស៊ី ក៏ដូចជាអាមេរិក ក៏បានបន្តកិច្ចពិភាក្សាស្តីពីកិច្ចព្រមព្រៀងនុយក្លេអ៊ែររបស់អ៊ីរ៉ង់ កាលពីដើមខែសីហានេះ ដោយការចុះកិច្ចព្រមព្រៀងនេះសំខាន់ណាស់ក្នុងការស្តារសេដ្ឋកិច្ចពិភពលោក។
ការដាក់ទណ្ឌកម្មសេដ្ឋកិច្ចលើប្រទេសរុស្ស៊ី បន្ទាប់ពីមានការឈ្លានពានទៅលើប្រទេសអ៊ុយក្រែន បានធ្វើឲ្យការផ្គត់ផ្គង់ប្រេងមានការខ្វះខាតរុញឲ្យតម្លៃប្រេងកើនឡើងជាខ្លាំង។ ការកើនឡើងនៃតម្លៃប្រេងនេះ គឺជាកត្តាជំរុញដ៏ធំមួយដែលធ្វើឲ្យអតិផរណាជុំវិញពិភពលោកបានកើនឡើងដល់កម្រិតខ្ពស់ដូចសព្វថ្ងៃនេះ។
បើគិតទៅលើស្ថានភាពទីផ្សារពិភពលោកដែរកំពុងធ្លាក់ចុះក្នុងពេលឥឡូវនេះ លទ្ធផលនៃការចុះកិច្ចព្រមព្រៀងនេះ មានសារៈសំខាន់ខ្លាំងដើម្បីឈានទៅដល់ការដកទណ្ឌកម្មសេដ្ឋកិច្ច ដែលសហរដ្ឋអាមេរិកបានដាក់លើការផលិត និងនាំចេញប្រេងរបស់ប្រទេសអ៊ីរ៉ង់។ ជាក់ស្តែងអ៊ីរ៉ង់អាចមានសមត្ថភាពផលិតប្រេងបានរហូតទៅដល់ ២.៥ លានធុងក្នុងមួយថ្ងៃឯណោះ។ នេះអាចជួយសម្រាលដល់បរិមាណផ្គត់ផ្គង់នៅលើទីផ្សា ធ្វើឲ្យតម្លៃប្រងធ្លាក់ចុះវិញ។
ការពិតគ្រាន់តែមានការរំពឹងទុកថានឹងអាចមាន ចុះកិច្ចព្រមព្រៀងនុយក្លេអ៊ែនេះបានធ្វើឲ្យ តម្លៃប្រេងនៅលើទីផ្សារពិភពលោកបានធ្លាក់ចុះរួចទៅហើយ ដែលប្រេងរបស់សហរដ្ឋអាមេរិកអាចបានធ្លាក់ចុះជិត ៣ ភាគរយដល់ត្រឹម៩០ដុល្លារក្នុងមួយធុង។
ម្យ៉ាងទៀត ទិន្នន័យសេដ្ឋកិច្ចមិនអំណោយផលបស់ប្រទេសចិន ដែរបណ្តាលមកពីការរឹតបណ្តឹងទប់ទល់ជាមួយជំងឺ Covid-19 ក៏ជាកត្តាមួយទៀតដែរអាចធ្វើអោយមានការធ្លាក់ចុះសេដ្ឋកិច្ចជាសកលផងដែរ ហើយដើម្បីស្តារ សេដ្ឋកិច្ចជាតិ ប្រទេសចិនដែលជាទីផ្សាប្រេងធំមួយ ក៏បានកាត់បន្ថយការទិញចូលប្រេងរបស់ខ្លួន។
អ្នកនាំពាក្យរបស់ប្រធានផ្នែកការទូតសហភាពអឺរ៉ុប ដែលបានសម្របសម្រួលកិច្ចចរចានេះបាននិយាយថា ការឆ្លើយតបរបស់អ៊ីរ៉ង់ត្រូវបានទទួលកាលពីល្ងាចថ្ងៃចន្ទ ហើយសហភាពអឺរ៉ុបកំពុងសិក្សា និងត្រៀមធ្វើការពិភាក្សាជាមួយភាគីទាំងអស់រួមមានសហរដ្ឋអាមេរិកដែរ ទៅលើបញ្ហានេះ។
អ្នកការទូតអ៊ីរ៉ង់ម្នាក់បាននិយាយថា សំណើរបស់សហភាពអឺរ៉ុបនេះនឹងអាចទទួលយកបាន ប្រសិនបើមាន ការធានាដល់ប្រទេសលោករបស់ លើការដកទណ្ឌកម្មសេដ្ឋកិច្ច និងការការពារសុវត្តិភាព ក៏ដូចជាបញ្ហាមួយចំនួនដែរទាក់ទងនិងទីភ្នាក់ងារថាមពលបរមាណូអន្តរជាតិ។
អ្នកនាំពាក្យក្រសួងការបរទេសអាមេរិកវិញបានបញ្ជាក់ថា អាមេរិកបដិសេធមិនទទួលយកការទាមទារណាដែលនៅក្រៅទំហំ និងវិសាលភាពនៃការចរចាដំបូងនោះឡើយ ហើយបានសង្កត់ថា អ្វីដែលអាចចរចាបាន ក៏បានចរចារួចទៅហើយ ឥឡូវនេះគឺអាស្រ័យលើអ៊ីរ៉ង់ទេ ក្នុងការទទួលយកកិច្ចព្រមព្រៀងចុងក្រោយនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ