នុយក្លេអ៊ែរអ៊ីរ៉ង់៖ អាមេរិកលើកឡើងថា អ៊ីរ៉ង់បានសុខចិត្តទទួលយកលក្ខខណ្ឌធំៗមួយចំនួន
ការចរចាដើម្បីសង្គ្រោះកិច្ចព្រមព្រៀងនុយក្លេអ៊ែរអ៊ីរ៉ង់ បានចាប់ផ្តើមឡើងវិញ កាលពីដើមខែសីហានេះ។ បើតាមការបញ្ជាក់ ពីប្រភពមន្ត្រីអាមេរិក បានឲ្យដឹងថា ភាគីអ៊ីរ៉ង់ បានសុខចិត្តដកថយ យល់ព្រមទទួលយកនូវលក្ខខណ្ឌធំៗមួយចំនួន តួយ៉ាងគឺអ៊ីរ៉ង់ បានសុខចិត្តឲ្យមានឡើងវិញ នូវយន្តការត្រួតពិនិត្យ របស់មន្ត្រីជំនាញ នៃទីភ្នាក់ងារថាមពលនុយក្លេអ៊ែរអន្តរជាតិ។ នេះគឺជាដំណឹងល្អមួយ បើទោះបីពេលនេះ ភាគីអាមេរិកអះអាងថា ខ្លួននៅមិនទាន់យល់ព្រមជាផ្លូវការ លើសំណើលក្ខខណ្ឌ របស់ភាគីអ៊ីរ៉ង់ក៏ដោយ។
ចុះផ្សាយនៅថ្ងៃ៖
ស្តាប់ - ០២:២៥
យោងតាមមន្ត្រីអាមេរិក ដោយសុំមិនបញ្ចេញឈ្មោះ គឺភាគីអ៊ីរ៉ង់ បានយល់ព្រមទទួលយកលក្ខខណ្ឌ រៀបចំឡើងវិញនូវប្រព័ន្ធត្រួតពិនិត្យតាមដាន យ៉ាងម៉ដ្ឋចត់បំផុតលើកម្មវិធីនុយក្លេអ៊ែរអ៊ីរ៉ង់ ដែលការត្រួតពិនិត្យនេះ នឹងត្រូវអនុវត្តដោយមន្ត្រីជំនាញរបស់ទីភ្នាក់ងារថាមពលនុយក្លេអ៊ែរអន្តរជាតិ AIEA។ បន្ថែមពីនេះ យន្តការត្រួតពិនិត្យតាមដាននេះ នឹងនៅជាធរមានដោយគ្មានពេលកំណត់បញ្ចប់ឡើយ។
ដោយឡែក ភាគីអ៊ីរ៉ង់បានទាមទារ ឲ្យទីភ្នាក់ងារថាមពលនុយក្លេអ៊ែរអន្តរជាតិ ត្រូវតែបិទបញ្ចប់ការស៊ើបអង្កេត ទាក់ទិននឹងស្ថានីយនុយក្លេអ៊ែរ ដែលគ្មានឈ្មោះក្នុងបញ្ជី ហើយដែលគេអះអាងថាបានរកឃើញ ស្លាកស្នាមនៃសារធាតុអ៊ុយរ៉ានីញ៉ូម។
គួររំលឹកថា កន្លងមកភាគីអ៊ីរ៉ង់ធ្លាប់បានដកថយម្តងរួចហើយ ដោយបានឈប់ទាមទារឲ្យសហករដ្ឋអាមេរិក ត្រូវលុបឈ្មោះ កងកម្លាំងឆ្មាំបដិវត្តអ៊ីរ៉ង់ ចេញពីបញ្ជីឈ្មោះក្រុមភេរវកម្ម។ ការទាមទារនេះ ត្រូវបានភាគីអាមេរិកប្រកែកបដិសេធជាដាច់ខាត ថាមិនអាចធ្វើតាមបាន។
សូមបញ្ជាក់ដែរថា ការចរចាដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ បានចាប់ផ្តើមឡើងវិញ ជិត២ឆ្នាំមកហើយ តែគ្មានលទ្ធផលជាដុំកំភួនសោះ។ ទើបតែពេលនេះ គេឃើញមានសញ្ញាណវិជ្ជមានខ្លះ។ តែយ៉ាងណា ប្រភពពីមន្ត្រីអាមេរិកបានអះអាងថា នៅមានដំណើរវែងឆ្ងាយ និងឧបសគ្គច្រើនទៀត ប្រសិនបើអ៊ីរ៉ង់ចង់ឲ្យអាមេរិកទទួលយល់ព្រមសង្គ្រោះកិច្ចព្រមព្រៀងនេះ។ ជាក់ស្តែង គឺអ៊ីរ៉ង់មិនអាចចម្រាញ់ធាតុអ៊ុយរ៉ានីញ៉ូម លើសពីកម្រិត ៣,៦៧%បានទេ ហើយក៏មិនអាចស្តុកទុកវា ឲ្យលើសពី៣០០គីឡូក្រាមដែរ ក្នុងរវាងពីពេលនេះ ដល់ឆ្នាំ២០៣១។ បន្ថែមពីនេះ ប្រព័ន្ធបំពង់ចម្រាញ់អ៊ុយរ៉ានីញ៉ូមរាប់ពាន់បំពង់ គឺត្រូវតែរុះរើគាស់រំលើងចោល។
ដោយឡែក ភាគីសហរដ្ឋអាមេរិក បានបដិសេធមិនទទួលស្គាល់ ថាខ្លួនបានធ្វើសម្បទាន លើចំណុចទាមទារអ្វីខ្លះ របស់អ៊ីរ៉ង់ទេ។ ភាគីអាមេរិក បន្តនៅស្ងាត់ស្ងៀម មិននិយាយអ្វីច្រើនទេ បើទោះបីរដ្ឋបាលលោកចូបៃដិន ធ្លាប់បានអះអាងថា ចង់វិលត្រលប់មកចូលរួមក្នុងកិច្ចព្រមព្រៀងនុយក្លេអ៊ែរវិញ។ ក្នុងករណីអាមេរិក យល់ព្រមទទួលយកលក្ខខណ្ឌរបស់អ៊ីរ៉ង់ មានន័យថា អាមេរិកត្រូវដកចេញនូវទណ្ឌកម្មសេដ្ឋកិច្ចពីអ៊ីរ៉ង់ ហើយក៏មានន័យថាអ៊ីរ៉ង់អាចលក់ប្រេងនៅលើទីផ្សារអន្តរជាតិបានឡើងវិញដែរ។ ក្នុងបរិបទវិបត្តិថាមពល ប្រេងឡើងថ្លៃដោយសារតែគ្មានប្រេងរុស្ស៊ី វត្តមានរបស់អ៊ីរ៉ង់នៅក្នុងទីផ្សារប្រេងឡើងវិញ អាចជាដំណឹងល្អមួយ សម្រាប់គ្រប់ៗគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ