មហាអំណាចអឺរ៉ុប បង្ហាញការបារម្ភទាក់ទិននឹងឆន្ទៈពិតប្រាកដរបស់អ៊ីរ៉ង់ ក្នុងការគោរពកិច្ចព្រមព្រៀងនុយក្លេអ៊ែរ
ទាក់ទិននឹងការស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ បន្ទាប់ពីបានជួបប្រជុំគ្នាជាច្រើនលើកច្រើនសារ ក្តីសង្ឃឹមហាក់កាន់តែរលាយសាបសូន្យទៅ។ កាលពីថ្ងៃសៅរ៍ម្សិលមិញ ក្រុមប្រទេសមហាអំណាចអឺរ៉ុប ទាំង៣ មានបារាំង អាល្លឺម៉ង់ និងអង់គ្លេស ដែលជាប្រទេសហត្ថលេខីនៃកិច្ចព្រមព្រៀងនេះ បានចេញលិខិតប្រកាសរួមគ្នា ដោយបានលើកឡើងថា គេមានការបារម្ភខ្លាំងណាស់ ទាក់ទិននឹងឆន្ទៈពិតប្រាកដរបស់អ៊ីរ៉ង់ ក្នុងការគោរពកាតព្វកិច្ចរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:២២
កាលពីដើមខែសីហា ក្រុមការងារចរចា នៅទីក្រុងវីយែន បានសម្រេចកំណត់យកអត្ថបទព្រាងចុងក្រោយ ដែលគេសង្ឃឹមថា នឹងអាចដាក់ស្នើឲ្យគ្រប់ភាគីទាំងអស់ចុះហត្ថលេខាទទួលយក។ កិច្ចព្រមព្រៀងគ្រប់គ្រងនុយក្លេអ៊ែរអ៊ីរ៉ង់ អាចនឹងត្រូវបានស្រោចស្រង់ឡើងវិញ អ៊ីរ៉ង់អាចនឹងត្រលប់មកគោរពកាតព្វកិច្ចខ្លួន ហើយសហរដ្ឋអាមេរិក អាចនឹងត្រឡប់មកចូលរួមក្នុងកិច្ចព្រមព្រៀងនេះវិញ។
ក៏ប៉ុន្តែរហូតមកទល់ពេលនេះ ក្តីសង្ឃឹមហាក់កំពុងតែរលាយ។ ក្រសួងការបរទេសបារាំង អាល្លឺម៉ង់ និងអង់គ្លេសបានចេញលិខិតរួមគ្នា ដោយបានបង្ហាញអំពីការមិនទុកចិត្តកាន់តែខ្លាំងឡើង ចំពោះឆន្ទៈពិតប្រាកដ របស់ភាគីអ៊ីរ៉ង់ ក្នុងការស្រោចស្រង់កិច្ចព្រមព្រៀងនុយក្លេអ៊ែរ។ យោងតាមមហាអំណាចទាំង៣ គេសង្កេតឃើញថា អ៊ីរ៉ង់នៅតែចចេស បន្តមិនគោរពកាតព្វកិច្ចខ្លួន ដែលមានចែងក្នុងក្របខណ្ឌកិច្ចព្រមព្រៀង ក៏ដូចជាសន្ធិសញ្ញាមិនរីកសាយភាយនុយក្លេអ៊ែរ តាមរយៈការចំរាញ់ធាតុអ៊ុយរ៉ានីញ៉ូម ដែលលើសហួសខ្លាំងឡើងៗ ពីកម្រិតប្រើប្រាស់ក្នុងវិស័យស៊ីវីល។
គួរបញ្ជាក់ដែរថា ការលើកឡើងរបស់ក្រុមប្រទេសអឺរ៉ុបនេះ គឺបន្ទាប់ពីភាគីអ៊ីរ៉ង់ បានដាក់លក្ខខណ្ឌឲ្យទីភ្នាក់ងារថាមពលនុយក្លេអ៊ែរអន្តរជាតិ AIEA ត្រូវឈប់ស៊ើបអង្កេតអង្កេតទាក់ទិននឹង ការប្រទះឃើញស្លាកស្នាមធាតុអ៊ុយរ៉ានីញ៉ូម នៅស្ថានីយនុយក្លេអ៊ែរអ៊ីរ៉ង់ចំនួន៣ទីតាំង ដែលមិនមានចុះនៅក្នុងបញ្ជី។ ការទាមទារ ដែលលោក Rafael Grossi អគ្គនាយកទីភ្នាក់ងារថាមពលនុយក្លែអ៊ែរអន្តរជាតិ បានបដិសេធ មិនព្រមធ្វើតាម។ យ៉ាងណាមិញ ការទាមទារលក្ខខណ្ឌរបស់អ៊ីរ៉ង់នេះ ត្រូវបានលោកអង់តូនី ប្លីងកិន លើកឡើងកាលពីថ្ងៃសុក្រកន្លងទៅ ថាជាការឈានជើងដើរថយក្រោយរបស់អ៊ីរ៉ង់។
គួរកត់សំគាល់ដែរថា នៅក្នុងលិខិតប្រកាសរបស់ បារាំង អង់គ្លេស និងអាល្លឺម៉ង់ បានលើកឡើងថា គោលជំហររបស់គេគឺច្បាស់ណាស់ គឺអ៊ីរ៉ង់ត្រូវតែសហការដោយស្មោះត្រង់ ឲ្យបានពេញលេញ និងជាបន្ទាន់បំផុត ជាមួយទីភ្នាក់ងារថាមពលនុយក្លេអ៊ែរអន្តរជាតិ។ ក្នុងករណី ដែលអ៊ីរ៉ង់ មិនទទួលយកកិច្ចព្រមព្រៀង បារាំង អង់គ្លេស អាល្លឺម៉ង់ នឹងនិយាយពិភាក្សាជាមួយសម្ព័ន្ធមិត្តអន្តរជាតិ ឈានទៅដាក់ចេញនូវវិធានការឲ្យបានសមស្របបំផុត ដើម្បីឆ្លើយតបទៅនឹងមហិច្ឆតានុយក្លេអ៊ែររបស់អ៊ីរ៉ង់ ព្រមទាំងកង្វះកិច្ចសហការរបស់អ៊ីរ៉ង់ ជាមួយទីភ្នាក់ងារថាមពលនុយក្លេអ៊ែរអន្តរជាតិ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ