ហេតុអ្វីមរណភាពរបស់ស្រ្តីម្នាក់ បង្កឲ្យមានកំហឹងធ្វើបាតុកម្មប្រឆាំងនៅអ៊ីរ៉ង់ ?
នៅអ៊ីរ៉ង់ មរណភាពរបស់ស្រ្តីវ័យក្មេងម្នាក់ នៅក្នុងអំឡុងពេលឃាត់ខ្លួនរបស់ប៉ូលិសសីលធម៌បានបង្កឲ្យមានបាតុកម្មប្រឆាំង នៅតាមទីក្រុងមួយចំនួនរបស់អ៊ីរ៉ង់ ដែលនៅក្នុងនោះ មានផងដែរ រដ្ឋធានី តេហេរ៉ង់។ នៅថ្ងៃចន្ទម្សិលមិញ និស្សិតរបស់សកលវិទ្យាល័យជាច្រើន នៅតេហេរ៉ង់បានចុះថ្នល់ធ្វើបាតុកម្មបរិហារអាជ្ញាធរអ៊ីរ៉ង់។ តាមទីភ្នាក់ងារព័ត៌មានក្នុងស្រុកFars ស្រ្តីបាតុករមួយចំនួនបានដោះគ្រវែងក្រណាត់ទទូរក្បាលរបស់ពួកគេ ដើម្បីសំដែងការប្រឆាំងនឹងច្បាប់សីលធម៌របស់រដ្ឋអ៊ីស្លាមអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១១
បាតុកម្ម សំដែងក្តីខឹងសម្បារ បរិហារិះគន់ប៉ូលិសអ៊ីរ៉ង់ បានផ្ទុះ រីករាលដាល នៅតាមបណ្តាក្រុង និងនៅរដ្ឋធានីតេហេរ៉ង់តាំងពីថ្ងៃសុក្រទី ១៣កញ្ញា រហូតដល់ថ្ងៃចន្ទ នៅបន្ទាប់ពីអាជ្ញាធរប្រកាសថា ស្រ្តីវ័យ ២២ឆ្នាំ ម្នាក់ ស្លាប់នៅក្នុងអំឡុងពេលឃាត់ខ្លួនរបស់ប៉ូលិសសីលធម៌រ។
Mahsa Amini ដើមកំណើតគួដ ត្រូវបានប៉ូលិសសីលធម៌អ៊ីរ៉ង់ចាប់ឃាត់ខ្លួន កាលពីថ្ងៃទី ១៣ កញ្ញា នៅសួនច្បារមួយ ក្នុងទីក្រុងតេហេរ៉ង់ នៅក្នុងបទចោទប្រកាន់ ស្លៀកពាក់ មិនសមរម្យ ទៅតាមការចែងរបស់ច្បាប់សាសនាអ៊ីស្លាម នៅអ៊ីរ៉ង់។ តាមប្រធានប៉ូលិសក្រុងតេហេរ៉ង់ Mahsa Aminiត្រូវចាប់ខ្លួន ព្រោះនាងពាក់ក្រណាត់ទទូរក្បាលមិនត្រឹមត្រូវ នៅទីសាធារណៈ។
នៅខេត្តប៉ែក ពាយ័ព្យប្រទេសដែលជាទីកំណើតរបស់នាង Mahsa Amini ប្រជាជនយ៉ាងតិច ៥០០នាក់បានចុះថ្នល់ធ្វើបាតុកម្មប្រឆាំង ប៉ូលិស តាំងពីថ្ងៃសុក្រ។ តាមអង្គការការពារសិទ្ធិមនុស្សក្នុងស្រុកអ៊ីរ៉ង់ Hengaw នៅខេត្តប៉ែកពាយ័ព្យដែលសំបូរជនជាតិគួដរស់នៅ យ៉ាងហោច បាតុករ៥នាក់ស្លាប់នៅក្នុងការបង្រ្កាបហិង្សាររបស់ប៉ូលិសកាលពីថ្ងៃចន្ទ។
នៅទីក្រុងតេហេរ៉ង់វិញ ទីភ្នាក់ងារព័ត៌មានអ៊ីរ៉ង់ ឈ្មោះ Fars បានចុះផ្សាយថា នៅយប់ថ្ងៃចន្ទ ប៉ូលិសបានបាញ់ទឹក ផ្សែងបង្ហូរទឹកភ្នែក និងប្រើដំបងដែកឆក់ ដើម្បីបង្រ្កាបក្រុមបាតុករនិស្សិត ដែលធ្វើបាតុកម្ម បរិហារប៉ូលិសសីលធម៌ និងទាមទារឲ្យអាជ្ញាធរអ៊ីរ៉ង់ បន្ធូរច្បាប់អ៊ីស្លាមស្តីពីការពាក់ក្រណាត់ទទូរក្បាល។
នៅក្រោមអាណត្តិដឹកនាំ របស់ប្រធានាធិបតីអ៊ីរ៉ង់ បច្ចុប្បន្ន ដែលមាននិន្នាការអភិរក្សនិយមជ្រុលនិយម ប៉ូលិសសីលធម៌បានទទួលបញ្ជាឲ្យពង្រឹងការស្លៀកពាក់របស់ស្រ្តី នៅទីសាធារណៈ ទៅការចែងរបស់ច្បាប់អ៊ីស្លាម ដែលត្រូវបានអនុវត្ត តាំងពីមានបដិវត្ត នៅអ៊ីរ៉ង់ នៅ ឆ្នាំ ១៩៧៩។ តាមច្បាប់អ៊ីស្លាម ស្រ្តីអ៊ីរ៉ង់ ត្រូវមានក្រណាត់ទទូរក្បាលជាប់ជានិច្ច នៅពេលចេញទៅក្រៅ នៅទីសាធារណៈ។ ស្រ្តីអ៊ីរ៉ង់ត្រូវហាមផងដែរ មិនឲ្យស្លៀកខោរឹបខ្លួន ស្លៀកខោខូវប៊យ ឬសំលៀកបំពាក់ណាមានពណ៌ស្រស់ឆើតឆាយ ឬដែលបញ្ចេញក្បាលជង្គង់។
នៅក្នុងសន្និសីទកាសែតកាលពីថ្ងៃ ចន្ទ ប្រធានប៉ូលិសក្រុងតេហេរ៉ង់ បានបដិសេធ ទាត់ចោលការទទួលខុសត្រូវ លើមរណភាពរបស់ស្រ្តីរងគ្រោះ ព្រោះថា ប៉ូលិសមិនបានប៉ះពាល់លើរាងកាយរបស់នាងសូម្បីបន្តិច។ ដើម្បីបញ្ជាក់អំណះអំណាងរបស់ខ្លួន ប៉ូលិសអ៊ីរ៉ង់បានបញ្ចេញវីដេអូមួយដែលបង្ហាញ វត្តមានរបស់នាង Mahsa Amini នៅក្នុងបន្ទប់ឃុំរបស់ប៉ូលិសសីលធម៌។ នៅក្នុងរូបភាព វីដេអូ Mahsa Aminiដួលសន្លប់ នៅពេលកំពុងជជែកវែកញ៉ែកជាមួយស្រ្តីប៉ូលិសសីលធម៌។ តាម ប៉ូលិសអ៊ីរ៉ង់ នាងMahsa Amini បានដាច់ខ្យល់ស្លាប់ នៅមន្ទីរពេទ្យ កាលពីថ្ងៃសុក្រ បន្ទាប់ពីសន្លប់ លែងដឹងខ្លួន ៣ថ្ងៃ។ ប៉ូលិស អ៊ីរ៉ង់បានលើកឡើងពីជម្ងឺគាំងបេះដូង និងថា នាងMahsa Amini ធ្លាប់វះកាត់ខួរក្បាល កាលពីនៅអាយុ ៥ឆ្នាំ។
ប៉ុន្តែ ឪពុករបស់ស្រ្តីរងគ្រោះ អះអាងថា ការលើកឡើងរបស់ប៉ូលិសមិនមែនជាការពិត ព្រោះកូនស្រីរបស់លោកមានសុខភាពល្អ មិនដែលមានការវះកាត់ខួរក្បាល។ គ្រួសាររបស់នាង នាងMahsa Aminiនៅបានបន្ទោស ប៉ូលិសថា យឺតយ៉ាវ មិនប្រញាប់បញ្ជូនកូនរបស់គាត់ទៅព្យាបាលនៅមន្ទីរពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ