អ៊ីរ៉ង់៖ បាតុកម្មពុះកញ្ជ្រោល នៅថ្ងៃចុងក្រោយនៃរយៈពេលកាន់ទុក្ខ សព Mahsa Amini
ស្ថានភាពនៅអ៊ីរ៉ង់ នៅតែតានតឹងខ្លាំង ដោយការធ្វើបាតុកម្មតវ៉ារបស់ប្រជាជន ព្រមទាំងការបង្ក្រាបយ៉ាងហិង្សាពីសំណាក់អាជ្ញាធរ។ ថ្ងៃពុធទី២៦តុលានេះ គឺជាថ្ងៃទី៤០ និងជាថ្ងៃចុងក្រោយ នៃរយៈពេលកាន់ទុក្ខ សពស្ត្រីអ៊ីរ៉ង់ ឈ្មោះ Mahsa Amini ដែលស្លាប់បន្ទាប់ពីនគរបាលសិលធម៌អ៊ីរ៉ង់ចាប់ឃាត់ខ្លួន ដោយចោទថាស្លៀកពាក់ និង រំក្បាលមិនបានត្រឹមត្រូវតាមច្បាប់។ យុវជន សិស្សនិស្សិត ដែលនៅតែបន្តធ្វើបាតុកម្ម ប្រឆាំងនឹងអំណាចកៀបសង្កត់នៃរបបអ៊ីស្លាមផ្តាច់ការអ៊ីរ៉ង់ មានគម្រោងចូលរួមបាតុកម្មដ៏ធំ នៅទីកន្លែងកប់សព របស់ស្ត្រី Mahsa Amini បើទោះបីជាអាជ្ញាធរ បានហាមឃាត់ក្រុមគ្រួសារសព មិនឲ្យរៀបចំកម្មវិធីបុណ្យអ្វីទាំងអស់។
ចុះផ្សាយនៅថ្ងៃ៖
នៅក្នុងវីដេអូផ្សព្វផ្សាយតាមបណ្តាញសង្គម ដែលបណ្តាញAFP បានត្រួតពិនិត្យប្រភពត្រឹមត្រូវ គេឃើញនិស្សិតអ៊ីរ៉ង់ នៅសកលវិទ្យាល័យ Shahid Chamran នៅក្រុងAhvaz បន្តធ្វើបាតុកម្ម ដោយស្រែកថា “និស្សិតទាំងអស់សុខចិត្តស្លាប់ តែមិនសុខចិត្តឲ្យរបបផ្តាច់ការម៉ាក់ងាយបានឡើយ”។ រូបភាពផ្សេងៗទៀត ដែលត្រូវបានគេចែកចាយតៗគ្នាតាមបណ្តាញសង្គម បានបង្ហាញឲ្យឃើញ ក្រុមសមត្ថកិច្ចអ៊ីរ៉ង់ ដេញវាយបំបែកសិស្សសាលា ដែលភាគច្រើនសុទ្ធតែសិស្សស្រី ដែលចូលរួមធ្វើបាតុកម្ម ខាងមុខសកលវិទ្យាល័យមួយចំនួន ក្នុងក្រុងតេហេរ៉ង់។ យប់ថ្ងៃចន្ទ បាតុករ បានចុះផ្លូវជួបជុំគ្នា ដុតកង់ឡាន ដុតធុងសំរាម ក្នុងទីក្រុងតេហេរ៉ង់។ បាតុករខ្លះបានស្រែក ថា “មេដឹកនាំផ្តាច់ការត្រូវតែស្លាប់” “កងទ័ពឆ្មាំបដិវត្តត្រូវតែស្លាប់”។
យោងតាមប្រភពពីអង្គការ Hengaw ក្រុមសមត្ថកិច្ចអ៊ីរ៉ង់ បានដាក់ពង្រាយកម្លាំង នៅតាមផ្លូវឆ្ពោះទៅកាន់ ក្រុង Saqqez តំបន់កួកឌីស្ថានអ៊ីរ៉ង់ ដែលជាស្រុកកំណើតរបស់ស្ត្រី Mahsa Amini។ ប្រភពដដែលអះអាងថា កំពូលកីឡាករបាល់ទាត់អ៊ីរ៉ង់២នាក់ កំពុងស្ថិតនៅទីនោះ ដើម្បីចូលរួមបាតុកម្មធំ នៅទីកន្លែងបញ្ចុះសព របស់ស្ត្រីឈ្មោះ Mahsa Amini។
គួរបញ្ជាក់ថា ថ្ងៃពុធទី២៦តុលា គឺជាថ្ងៃទី៤០ក្រោយការស្លាប់របស់ Mahsa Amini។ តាមទំនៀបទំលាប់ ថ្ងៃទី៤០ គឺជាថ្ងៃចុងក្រោយនៃរយៈពេលកាន់ទុក្ខ ដែលត្រូវមានរៀបចំកម្មវិធីបុណ្យ។ កាលពីល្ងាចថ្ងៃអង្គារ ទី២៥តុលា ទីភ្នាក់ងារព័ត៌មានផ្លូវការអ៊ីរ៉ង់ បានផ្សព្វផ្សាយលិខិតប្រកាសមួយ ដែលអះអាងថាធ្វើដោយក្រុមគ្រួសារសព។ លិខិតនោះបានលើកឡើងថា នឹងគ្មានកម្មវិធីបុណ្យអ្វីទាំងអស់ ដើម្បីបញ្ចៀសកុំឲ្យមានកើតរឿងរ៉ាវជាអកុសលណាមួយ។
ក៏ប៉ុន្តែ យោងតាមក្រុមបាតុករ គឺលិខិតប្រកាសនេះ ត្រូវបានធ្វើឡើង បន្ទាប់ពីក្រុមគ្រួសាររបស់ Mahsa Amini បានទទួលរងសំពាធយ៉ាងខ្លាំងពីអាជ្ញាធរ។ ក្រុមបាតុករ បានអះអាងថា ជាច្រើនថ្ងៃមកនេះ អាជ្ញាធរអំណាចផ្តាច់ការអ៊ីរ៉ង់ បានគំរាមសំឡុតក្រុមគ្រួសារសព រហូតថែមទាំងគំរាមនឹងសម្លាប់កូនប្រុសម្នាក់ទៀតរបស់ក្រុមគ្រួសារ Mahsa Amini ថែមទៀត ប្រសិនបើគ្រួសារនេះនៅតែចចេស រៀបចំកម្មវិធីបុណ្យសពនៅថ្ងៃទី២៦តុលា។
យោងតាមអង្គការ Iran Human Rights គិតត្រឹមពេលនេះ ការបង្ក្រាបយ៉ាងហិង្សារបស់អាជ្ញាធរ បានធ្វើឲ្យបាតុករស្លាប់យ៉ាងហោច ១៤១នាក់។ គិតចាប់ពីថ្ងៃផ្ទុះបាតុកម្មមក នៅតេហេរ៉ង់ អាជ្ញាធរក្រសួងយុត្តិធម៌ បានចោទប្រកាន់និស្សិតចំនួនយ៉ាងហោច៣០០នាក់ ដែលក្នុងនោះមាន៤នាក់ ដែលអាចជាប់ទោសប្រហារជីវិត។
ដោយឡែក នៅក្រុង Zehedan ខេត្ត Sistan-Baloutchistan ដែលជាខេត្តក្រីក្រមួយរបស់អ៊ីរ៉ង់ឯណោះវិញ មានករណីបាតុកម្មហិង្សាមួយ បានផ្ទុះឡើងកាលពីថ្ងៃ៣០កញ្ញា ដោយប្រជាពលរដ្ឋចោទថានគរបាលម្នាក់ បានចាប់រំលោភក្មេងស្រីអនីតិជនម្នាក់។ ការបង្ក្រាបបាតុកម្មនេះ បានបណ្តាលឲ្យស្លាប់មនុស្សប្រមាណ៩៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ