អ៊ីរ៉ង់ចាប់ផ្តើមចម្រាញ់ធាតុអ៊ុយរ៉ានីញ៉ូម ក្នុងកម្រិត៦០% នៅស្ថានីយ៍ Fordo
អ៊ីរ៉ង់ហាក់កំពុងតែដើរចាកឆ្ងាយកាន់តែខ្លាំង ពីកាតព្វកិច្ចដែលមានចែងក្នុងកិច្ចព្រមព្រៀងនុយក្លេអ៊ែរ។ អង្គភាពថាមពលនុយក្លេអ៊ែរអ៊ីរ៉ង់ បានប្រកាសថា ខ្លួនបានចាប់ផ្តើមផលិត អ៊ុយរ៉ានីញ៉ូចម្រាញ់ធាតុ ក្នុងកម្រិត៦០% នៅឯស្ថានីយ៍ Fordo ។ ជាការសម្រេច ដើម្បីជាប្រតិកម្មឆ្លើយតប ចំពោះសេចក្តីសម្រេចចិត្តនៃទីភ្នាក់ងារថាមពលនុយក្លេអ៊ែរអន្តរជាតិ ដែលបានរិះគន់អ៊ីរ៉ង់។ សូមបញ្ជាក់ថា ដើម្បីអាចផលិតគ្រាប់បែកបរមាណូបាន គឺត្រូវការអ៊ុយរ៉ានីញ៉ូមចម្រាញ់ធាតុ ក្នុងកម្រិត៩០%។
ចុះផ្សាយនៅថ្ងៃ៖
ស្តាប់ - ០២:៥៣
លោក Mohammad Eslami ប្រធានអង្គភាពថាមពលនុយក្លេអ៊ែរអ៊ីរ៉ង់ បានបញ្ជាក់ឲ្យដឹងថា សកម្មភាពចម្រាញ់ធាតុអ៊ុយរ៉ានីញ៉ូម ក្នុងកម្រិត៦០% ត្រូវបានចាប់ផ្តើមដំណើរការហើយ ចាប់ពីថ្ងៃចន្ទទី២១វិច្ឆិកា នៅឯស្ថានីយ៍ Fordo។ នេះបើផ្អែកតាមការចុះផ្សាយ របស់បណ្តាញព័ត៌មានអ៊ីរ៉ង់ Isna។ ប្រភពដដែលបានលើកឡើងថា ប្រធានអង្គភាពអ៊ីរ៉ង់រូបនេះ បានអះអាងថា ការដាក់សំពាធនយោបាយគឺគ្មានប្រយោជន៍អ្វីនោះទេ ហើយអ៊ីរ៉ង់ធ្លាប់បានប្រាប់ហើយ ថានឹងឆ្លើយតបទៅវិញយ៉ាងម៉ឹងម៉ាត់បំផុត ចំពោះសំដីរិះគន់ទាំងឡាយ របស់ទីភ្នាក់ងារថាមពលនុយក្លេអ៊ែរអន្តរជាតិ AIEA។
សូមរំលឹកថា កម្រិតចម្រាញ់ធាតុអ៊ុយរ៉ានូញ៉ូម ដល់ទៅ៦០% ដែលអ៊ីរ៉ង់ទើបតែប្រកាសនេះ គឺវាលើសច្រើនខ្លាំងសម្បើមណាស់ ទៅនឹងកម្រិតអតិបរមាដែលមានចំនួនតែ ៣,៦៧% ចែងនៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ JCPAO ចុះឆ្នាំ២០១៥។ គឺដោយយោងតាមកិច្ចព្រមព្រៀងនេះហើយ ដែលអ៊ីរ៉ង់បានសន្យាបិទរោងចក្រនុយក្លេអ៊ែរ Fordo ដែលជាស្ថានីយ៍ចម្រាញ់ធាតុអ៊ុយរ៉ានីញ៉ូម ស្ថិតនៅក្រោមដី ចំងាយប្រមាណ១៨០គីឡូម៉ែត្រ ខាងត្បូងទីក្រុងតេហេរ៉ង់ ជាថ្នូរនឹងការដកទណ្ឌកម្មសេដ្ឋកិច្ចចេញពីអ៊ីរ៉ង់។
ក៏ប៉ុន្តែ បន្ទាប់ពីរដ្ឋាភិបាលអាមេរិក ដឹកនាំដោយលោកដូណាល់ ត្រាំ បានដកខ្លួនឈប់នៅក្នុងកិច្ចព្រមព្រៀង ហើយបានដាក់បន្ថែមទណ្ឌកម្មលើអ៊ីរ៉ង់ អ៊ីរ៉ង់បានផ្តើមឈប់អនុវត្តកាតព្វកិច្ចរបស់ខ្លួន បន្តិចម្តងៗ។ កាលពីខែមករា ឆ្នាំ២០២១ អ៊ីរ៉ង់បានចាប់ផ្តើមចម្រាញ់ធាតុអ៊ុយរ៉ានីញ៉ូម ក្នុងកម្រិត២០% នៅស្ថានីយ៍ Fordo។ ហើយនៅខែមេសាឆ្នាំដដែល អ៊ីរ៉ង់បានចម្រាញ់ធាតុអ៊ុយរ៉ានីញ៉ូម ដល់ទៅ៦០% នៅស្ថានីយ៍Natanz។ ជាកម្រិតដែលកាន់តែកើនខ្ពស់ ក្បែរ ៩០% ដើម្បីអាចឈានទៅផលិតគ្រាប់បែកបរមាណូបាន។
កាលពីថ្ងៃព្រហស្បតិ៍សប្តាហ៍កន្លងទៅ ទីភ្នាក់ងារថាមពលនុយក្លេអ៊ែរអន្តរជាតិ AIEA ដែលមានតួនាទីតាមដានពិនិត្យការគោរពកាតព្វកិច្ចរបស់អ៊ីរ៉ង់ បានចេញសេចក្តីសម្រេចចិត្តមួយរិះគន់ធ្ងន់ៗ ចំពោះអាកប្បកិរិយាអ៊ីរ៉ង់ ដែលមិនសហការ ហើយមិនផ្តល់ចម្លើយបច្ចេកទេស ដែលគួរឲ្យទុកចិត្ត ទាក់ទិននឹងស្លាកស្នាមសាធាតុអ៊ុយរ៉ានីញ៉ូមចម្រាញ់ធាតុ ដែលគេប្រទះឃើញនៅស្ថានីយ៍ចំនួន៣ ដែលគ្មានឈ្មោះក្នុងបញ្ជី។
យោងតាម AIEA គិតត្រឹមចុងខែតុលា អ៊ីរ៉ង់មានអ៊ុយរ៉ានីញ៉ូមចម្រាញ់ធាតុ២០% ចំនួន ៣៨៦,៤គីឡូក្រាម និងអ៊ុយរ៉ានីញ៉ូមចម្រាញ់ធាតុ៦០% ចំនួន៦២,៣គីឡូក្រាម។ ជាទំហំដែលកើនឡើងជាលំដាប់ ដែលធ្វើឲ្យគេបារម្ភថាអ៊ីរ៉ង់កំពុងតែឈានទៅមានលទ្ធភាពផលិតគ្រាប់បែកបរមាណូ។ ទន្ទឹមគ្នានេះ ការចរចានៅទីក្រុងវីយែន ដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ គឺកាន់តែរលត់ក្តីសង្ឃឹមទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ