អ៊ីរ៉ង់៖ មេធាវីការពារអ្នកកាសែតដែលចុះផ្សាយការស្លាប់របស់ Masha Amini ត្រូវសមត្ថកិច្ចចាប់ខ្លួន ខណៈបាតុកម្មតវ៉ាឈានចូលដល់ខែទី៤
មេធាវីការពារក្តីឲ្យអ្នកកាសែតអ៊ីរ៉ង់២នាក់ ដែលបានផ្សព្វផ្សាយព័ត៌មានដំបូងគេ ស្តីពីករណីស្លាប់របស់ស្ត្រីឈ្មោះ Masha Amini ត្រូវបានសមត្ថកិច្ចអ៊ីរ៉ង់ ចាប់ខ្លួនកាលពីថ្ងៃពុធសប្តាហ៍កន្លងទៅ។ នេះបើផ្អែកតាមការចុះផ្សាយរបស់បណ្តាញព័ត៌មានអ៊ីរ៉ង់ កាលពីថ្ងៃសៅរ៍ម្សិលមិញ។ ជាការចាប់ខ្លួន ដែលនឹងបង្កើតឲ្យមានការតវ៉ាបន្ថែមទៀត ខណៈចលនាបាតុកម្មរបស់ប្រជាជនអ៊ីរ៉ង់ ទើបតែបានបោះជំហានឈានចូលដល់ខែទី៤ ហើយនៅតែមានសន្ទុះខ្លាំងដដែល។
ចុះផ្សាយនៅថ្ងៃ៖
ស្តាប់ - ០២:៣៤
លោក Mohammed Ali Kamfirouzi ត្រូវបានគេស្គាល់ថា គឺជាមេធាវីដែលតែងតែចេញមុខការពារក្តី ឲ្យអ្នកកាសែត សកម្មជននានា ដែលត្រូវបានសមត្ថកិច្ចអ៊ីរ៉ង់ ចាប់ដាក់ឃុំ។ គឺលោកមេធាវីរូបនេះហើយ ដែលបានការពារក្តីជូនស្ត្រីអ្នកកាសែត២នាក់ ដែលបានចុះផ្សាយដំបូងគេបង្អស់ ស្តីពីករណីស្លាប់របស់ស្ត្រីឈ្មោះ Masha Amini កាលពីថ្ងៃទី១៦កញ្ញា ក្រោយត្រូវបាននគរបាលសីលធម៌ចាប់ខ្លួន ដោយចោទថាទទូលក្រណាត់មិនជិតក្បាល។
បច្ចុប្បន្ន អ្នកកាសែតទាំង២នាក់នេះ ដែលមានឈ្មោះ Elaheh Mohammadi អាយុ៣៥ឆ្នាំ និង Niloufar Hemedi អាយុ៣០ឆ្នាំ កំពុងស្ថិតនៅក្នុងឃុំ។ ការចុះផ្សាយព័ត៌មាន ព្រមទាំងរូបថតរបស់អ្នកកាសែតទាំង២នេះ បានញ៉ាំងឲ្យផ្ទុះចលនាបាតុកម្មទូទាំងប្រទេស ដើម្បីប្រឆាំងនឹងអំណាចកៀបសង្កត់ នៃរបបអ៊ីស្លាមផ្តាច់ការអ៊ីរ៉ង់។
យោងតាម ការចុះផ្សាយរបស់បណ្តាញព័ត៌មានអ៊ីរ៉ង់ Ham Mihan លោកមេធាវី Mohammed Ali Kamfirouzi ដែលការពារក្តីឲ្យអ្នកកាសែតទាំង២ ក៏ត្រូវបានសមត្ថកិច្ចអ៊ីរ៉ង់ចាប់ខ្លួនដែរ នៅថ្ងៃពុធទី១៤ធ្នូ។ លោក Mohammad Ali Bagherpour មេធាវីម្នាក់ទៀតដែលការពារលោក បានអះអាងថា លោក Mohammed Ali Kamfirouzi ត្រូវបានគេចាប់ខ្លួនភ្លាមៗ ដោយគ្មានបង្ហាញលិខិត ឬដីការចាប់ខ្លួនអ្វីឡើយ។
គួររំលឹកថា កាលពីចុងខែតុលា អ្នកកាសែត និងអ្នកថតរូបអ៊ីរ៉ង់ជាង៣០០នាក់ បានរួមគ្នាធ្វើលិខិតចំហ ទាមទារឲ្យអាជ្ញាធររដ្ឋាភិបាលអ៊ីរ៉ង់ ត្រូវតែឈប់ចាប់ខ្លួនអ្នកកាសែត ឬក៏រារាំងការអនុវត្តសិទ្ធិរបស់អ្នកកាសែតតទៅទៀត។ លិខិតនេះ បានទាមទារផងដែរ ថាអ្នកកាសែតជាប់ឃុំទាំងអស់ ត្រូវតែមានសិទ្ធិទទួលបានការការពារពីមេធាវី។
សូមបញ្ជាក់ថា យោងតាមកាសែត Ham Mihan ក្រៅពីបាតុករ និងអ្នកកាសែតជាច្រើននាក់ យ៉ាងហោចណាស់ មានមេធាវីចំនួន២៥នាក់ហើយ ដែលត្រូវបានសមត្ថកិច្ចអ៊ីរ៉ង់ចាប់ឃាត់ខ្លួន បើគិតចាប់ពីថ្ងៃដែលផ្ទុះបាតុកម្មធំ ពាក់កណ្តាលខែកញ្ញារហូតដល់ពេលនេះ។ បាតុកម្មដែលបានឈានចូលដល់ខែទី៤ហើយ ហើយដែលនៅតែមានសន្ទុះខ្លាំងក្លាដដែល បើទោះបីជាយុវជនអ៊ីរ៉ង់ ប្រឈមនឹងការបង្ក្រាបក៏ដូចជាការចាប់ខ្លួនក៏ដោយ។ ជាងនេះទៀត របបអ៊ីស្លាមផ្តាច់ការអ៊ីរ៉ង់ បានប្រើប្រាស់ទោសប្រហារជីវិត ដើម្បីសំឡុតបំភ័យបាតុករឲ្យបាក់ស្បាត។ កាលពីថ្ងៃទី៨ និងទី១២ធ្នូកន្លងទៅ របបម៉ូឡាអ៊ីស្លាមឈីអ៊ីតនេះ បានព្យួរក កាត់ទោសប្រហារជីវិតអ្នកទោសភេទប្រុស អាយុ២៣ឆ្នាំ ចំនួន២នាក់ ដោយចោទថាបានចូលរួមធ្វើបាតុកម្ម បង្កអសន្តិសុខសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ