លោកម៉ាក្រុង ចូលគាល់ស្តេចហ្សកដានី និយាយអំពីសំណុំរឿងអ៊ីស្រាអែល-ប៉ាឡេស្ទីន
បន្ទាប់ពីបានចូលរួមកាលពីថ្ងៃអង្គារ ក្នុងសន្និសីទតំបន់ដើមបូព៌ា នៅរាជធានីអាំម៉ាន់ ប្រទេសហ្សកដានី លោកម៉ាក្រុង ប្រធានាធិបតីបារាំង បានចូលទៅគាល់ព្រះចៅអាប់ដាឡាទី២ ព្រះមហាក្សត្រហ្សកដានី កាលពីថ្ងៃពុធម្សិលមិញ។ ក្នុងជំនួបជាលក្ខណៈទ្វេភាគីនេះ មេដឹកនាំទាំង២ បានលើកយកសំណុំរឿងជម្លោះរាំង អ៊ីស្រាអែល-ប៉ាឡេស្ទីន មកនិយាយ។ សំណុំរឿងដែលកាន់តែទ័លច្រកខ្លាំង ហើយដែលភាគីហ្សកដានី បានសំដែងការបារម្ភបំផុត។
ចុះផ្សាយនៅថ្ងៃ៖
ស្តាប់ - ០២:១៨
សំណុំរឿងធំទីមួយ ដែលលោកម៉ាក្រុង នឹងនិយាយជាមួយព្រះចៅអាប់ដាឡាទី២ គឺការប្រយុទ្ធប្រឆាំងនឹងក្រុមភេរវកម្ម នៅតំបន់ដើមបូព៌ា។ ហ្សកដានីគឺជាសម្ព័ន្ធមិត្តដ៏សំខាន់មួយរបស់បារាំង ប្រចាំតំបន់នេះ។ មូលដ្ឋានទ័ពអាកាសមួយរបស់បារាំង ស្ថិតនៅក្នុងទឹកដីហ្សកដានី ហើយដែលបារាំងប្រើប្រាស់ដើម្បីបើកប្រតិបត្តិការបង្ក្រាបចលនាភេរវកម្មជីហាតអ៊ីស្លាម។
យោងតាមប្រភពពីមន្ត្រីការទូត ព្រះចៅអាប់ដាឡាទី២ ប្រាកដជាលើកយកសំណុំរឿងអ៊ីស្រាអែល-ប៉ាឡេស្ទីន មកនិយាយជាមួយលោកម៉ាក្រុង ខណៈរដ្ឋាភិបាលថ្មីអ៊ីស្រាអែល មានទំនោរស្តាំនិយមជ្រុល នឹងចូលមកកាន់អំណាចក្នុងពេលដ៏ខ្លីខាងមុខ។ លោករដ្ឋមន្ត្រីក្រសួងការបរទេសហ្សកដានី បានអះអាងថា សំណុំរឿងប៉ាឡេស្ទីន គឺនៅតែជាអាទិភាពធំមួយរបស់ហ្សកដានីជានិច្ច។ លោកសង្កត់បន្ថែមថា អ្វីដែលរដ្ឋាភិបាលហ្សកដានីបានសង្កេតឃើញ គឺថាស្ថានភាពកាន់តែធ្លាក់ដុនដាប ឈានដល់ចំណុចមួយទ័លច្រក។
សូមបញ្ជាក់ថា ផ្អែកតាមការវិភាគ របស់លោក Jean-Paul Chagnollaud ប្រធានវិទ្យាស្ថានស្រាវជ្រាវ និងសិក្សាតំបន់ម៉េឌីទែរ៉ាណេ-ដើមបូព៌ា (liReMMO) គឺភាគីហ្សកដានី ចង់សំណូមពរ ឲ្យបារាំងលូកដៃចូលឲ្យបានសកម្មជាងនេះ ដើម្បីអន្តរាគមន៍ជួយត្រួសត្រាយផ្លូវ ឲ្យអ៊ីស្រាអែលងាកមកចរចាកសាងសន្តិភាពជាមួយប៉ាឡេស្ទីន។ អ្នកវិភាគរូបនេះ អះអាងថា កន្លងមកក្នុងអាណត្តិទី១របស់លោកម៉ាក្រុង គឺបារាំងមិនសូវជាសកម្មប៉ុន្មានទេ ពោលគឺលើកយកបញ្ហាអ៊ីស្រាអែល-ប៉ាឡេស្ទីនមកនិយាយ តែនៅពេលណា មានករណីសោកនាដកម្មកើតឡើងតែប៉ុណ្ណោះ។
លោក Jean-Paul Chagnollaud បន្ថែមថា កាលៈទេសៈពេលនេះ មានលក្ខណៈគួរឲ្យបារម្ភ ព្រោះរដ្ឋាភិបាលស្តាំនិយមជ្រុលអ៊ីស្រាអែល នឹងចូលមកកាន់អំណាច ហើយអាចបិទផ្លូវចរចាទាំងស្រុងជាមួយប៉ាឡេស្ទីន។ អ្នកនយោបាយអ៊ីស្រាអែលម្នាក់ ឈ្មោះ Itamar Ben Gvir ដែលគេស្គាល់ថាជាអ្នករើសអើងប្រកាន់ពូជសាសន៍ ស្អប់សហគមន៍ជនជាតិអារ៉ាប់បំផុតនោះ នឹងក្លាយជារដ្ឋមន្ត្រីក្រសួងសន្តិសុខជាតិអ៊ីស្រាអែល។ ដែលមានន័យថា កំដៅជម្លោះប្រកាន់ពូជាសាសន៍រវាងលោកអ៊ីស្រាអែល និងប៉ាឡេស្ទីន នឹងកាន់តែឆេះខ្លាំងឡើង។
លោក Jean-Paul Chagnollaud បានលើកឡើងថា បារាំងត្រូវតែប្រកាន់ជំហរ ឲ្យបានម៉ឺងម៉ាត់ ចូលរួមដាក់សម្ពាធការទូតលើអ៊ីស្រាអែល ដើម្បីឈានទៅបិទបញ្ចប់ការរំលោភច្បាប់អន្តរជាតិ ហើយត្រួសត្រាយផ្លូវកសាងសន្តិភាព ជួបប្រជាជនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ