អ៊ីស្រាអែលមានរដ្ឋាភិបាលថ្មី ជារដ្ឋាភិបាលស្តាំនិយមខ្លាំងបំផុតក្នុងប្រវត្តិសាស្ត្រ
កាលពីព្រឹកថ្ងៃទី២៩ធ្នូ លោក បេនយ៉ាមីន ណេតាន់យ៉ាហ៊ូ បានដាក់ស្នើសមាសភាពរដ្ឋាភិបាលថ្មី ដែលលោកនឹងដឹកនាំ ទៅកាន់រដ្ឋសភាអ៊ីស្រាអែល ដើម្បីបោះឆ្នោតផ្តល់សេចក្តីទុកចិត្ត។ រដ្ឋាភិបាលចម្រុះថ្មីរបស់អ៊ីស្រាអែលនេះ ត្រូវបានគេមើលឃើញថា មានទំនោរស្តាំនិយមខ្លាំងបំផុត ក្នុងប្រវត្តិសាស្ត្រអ៊ីស្រាអែល។ ទំនោរស្តាំនិយមជ្រុល ដែលនឹងរឹងរឹតតែបង្កបញ្ហា ភាពតានតឹងក្នុងសង្គម ព្រមទាំងការប្រឈមមុខដាក់គ្នាកាន់តែខ្លាំង ជាមួយប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០៣:០៨
បន្ទាប់ពីបានស្ថិតនៅក្នុងបក្សប្រឆាំងមួយរយៈតូច លោកបេនយ៉ាមីន ណេតាន់យ៉ាហ៊ូ បានត្រលប់មកកាន់អំណាចវិញ ជាមួយនឹងរដ្ឋាភិបាលថ្មី ដែលលោកបានប្រឹងប្រែងប្រមូលក្រុមបក្សស្តាំនិយមជ្រុលជាច្រើន ឲ្យចូលរួមជាមួយលោក រហូតទាល់តែបានគ្រប់សំឡេងភាគច្រើនក្នុងសភាក្នេសេត។ នៅចំពោះមុខសភា លោកណេតាន់យ៉ាហ៊ូ បានថ្លែងថា រដ្ឋាភិបាលថ្មីរបស់លោក មានកម្មវត្ថុធំមួយ គឺរារាំងទប់ស្កាត់មិនឲ្យអ៊ីរ៉ង់មានអាវុធនុយក្លេអ៊ែរ ហើយនិងពង្រឹងភាពនាំមុខនៃកម្លាំងការពារជាតិ ក៏ដូចជាគ្រឿងសព្វាវុធរបស់អ៊ីស្រាអែល។
រដ្ឋាភិបាលចម្រុះថ្មីនេះ មានការចូលរួមពីគណបក្សលីគូតរបស់លោកណេតាន់យ៉ាហ៊ូ ព្រមទាំងក្រុមចលនានយោបាយស្តាំសាសនាជ្វីហ្វនិយមជ្រុលច្រើនក្រុមផ្សេងទៀត។ នៅក្នុងសមាសភាពរដ្ឋាភិបាលនេះ លោកណេតាន់យ៉ាហ៊ូ បានដាក់ លោក Eli Cohen អតីតរដ្ឋមន្ត្រីក្រសួងចារកិច្ច ឲ្យធ្វើជារដ្ឋមន្ត្រីការបរទេស។ ចំណែកលោក Yoav Gallant អតីតមេបញ្ជាការទ័ព ដែលស្គាល់ថាមនុស្ស គាំទ្រជំរុញការដាក់អាណានិគមក្នុងទឹកដីប៉ាឡេស្ទីននោះ ត្រូវលោកណេតាន់យ៉ាហ៊ូ ប្រគល់កៅអីរដ្ឋមន្ត្រីក្រសួងការពារជាតិ។ រីឯលោក Ben Gvir ដែលគេស្គាល់ថាជាមនុស្សតែងតែថ្លែងការណ៍បែបស្អប់ខ្ពើម រើសអើងប្រឆាំងប្រជាជនអារ៉ាប់ប៉ាឡេស្ទីនខ្លាំងបំផុត នោះ នឹងមកកាន់ក្រសួងសន្តិសុខផ្ទៃក្នុង។
គួរបញ្ជាក់ថា ការចូលរូមរបស់ក្រុមចលនានយោបាយស្តាំនិយមជ្រុល និងសាសនាងប់ងល់ នៅក្នុងរដ្ឋាភិបាលថ្មីនេះ បានធ្វើឲ្យមានការព្រួយបារម្ភជាខ្លាំង ស្តីអំពីភាពតានតឹងទាំងឡាយ។ ចលនាស្តាំនិយមជ្រុលទាំងនេះ សុទ្ធតែធ្លាប់បានអះអាង ថាចង់ពង្រីកដែនដីអាណានិគមនៅតំបន់ស៊ីហ្សកដានី របស់ប៉ាឡេស្ទីន ឲ្យកាន់តែរីកធំថែមទៀត។ ការប្រឈមមុខដាក់គ្នា រវាងអ៊ីស្រាអែលនិងប៉ាឡេស្ទីន ប្រាកដជាកាន់តែតានតឹងខ្លាំង ជាមួយនឹងគោលនយោបាយស្តាំនិយមជ្រុល។
លោក Yohana Plesner អគ្គនាយកវិទ្យាស្ថានប្រជាធិបតេយ្យអ៊ីស្រាអែល បានលើកឡើងថា រដ្ឋាភិបាលថ្មីរបស់ណេតាន់យ៉ាហ៊ូនេះ គឺជាក្តីស្រម៉ៃរបស់ពួកសាសនាជ្វីហ្វជ្រុលនិយម ដែលមានទំនោរតឹងតែង ស្អប់ខ្ពើមប៉ាឡេស្ទីន។ ដោយឡែក លោកស្រីGali Baharav-Miara អគ្គអយ្យការអ៊ីស្រាអែល បានថ្លែងការបារម្ភថា រដ្ឋាភិបាលស្តាំនិយមជ្រុលថ្មីនេះ អាចនឹងចេញច្បាប់កាត់បន្ថយអំណាច ព្រមទាំងឯករាជ្យភាពរបស់ចៅក្រម ក៏ដូចជាប្រព័ន្ធតុលាការ ហើយនឹងអាចរំលោភបំពាន លើគោលការណ៍នីតិរដ្ឋថែមទៀតផង។ ជាងនេះទៀត គេជឿថាលោកណេតាន់យ៉ាហ៊ូ សុខចិត្តធ្វើគ្រប់យ៉ាងឲ្យតែបានកាន់អំណាច ដើម្បីមានអភ័យឯកសិទ្ធិគេចផុតពីសំណុំរឿងពុករលួយទាំងឡាយដែលពាក់ព័ន្ធនឹងលោក នៅឯតុលាការ។
គួរកត់សំគាល់ដែរថា នៅក្នុងពេលដែលសភាក្នេសេត បើកការប្រជុំផ្តល់សេចក្តីទុកចិត្តដល់រដ្ឋាភិបាលថ្មី ក្រុមសកម្មជនជាច្រើនពាន់នាក់ បានជួបជុំគ្នានៅខាងមុខរដ្ឋសភា ដើម្បីសំដែងការតវ៉ា ប្រឆាំងទៅនឹងរដ្ឋាភិបាលថ្មីនេះ។ បាតុករបានសំដែងការបារម្ភខ្លាំង ចំពោះអនាគតសង្គមអ៊ីស្រាអែល ដែលនឹងកាន់តែបាក់បែកគ្នា គ្មានសន្តិភាព ដោយសារតែទ្រឹស្តីស្តាំនិយមជ្រុល រើសអើងជាតិសាសន៍ ប្រកាន់បក្សពួកសាសនា និងស្អប់ខ្ពើមអ្នកស្រលាញ់ភេទដូចគ្នាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ