ប្រជាជនអ៊ីស្រាអ៊ែល ធ្វើបាតុកម្មប្រឆាំងរដ្ឋាភិបាលសាសនាស្តាំនិយមជ្រុល របស់លោកណេតាន់យ៉ាហ៊ូ
កាលពីយប់ថ្ងៃសៅរ៍ ទី១៤មករា ប្រជាជនអ៊ីស្រាអែល ជាច្រើនម៉ឺននាក់ បានជួបជុំគ្នាធ្វើបាតុកម្ម នៅតាមទីក្រុងធំៗ ដើម្បីប្រឆាំងនឹងរដ្ឋាភិបាល សាសនាស្តាំនិយមជ្រុល ដឹកនាំដោយលោកណេតាន់យ៉ាហ៊ូ។ គំរោងធ្វើកំណែទម្រង់ លើវិស័យតុលាការ ដែលរដ្ឋាភិបាលនេះចង់ធ្វើ បានធ្វើឲ្យប្រជាជនអ៊ីស្រាអែល មានការព្រួយបារម្ភ ថារបបប្រជាធិបតេយ្យអ៊ីស្រាអែល នឹងរង្គោះរង្គើ ព្រោះនាយករដ្ឋមន្ត្រីនឹងក្តាប់អំណាចពេញដៃ។ ជាងនេះទៀត រដ្ឋាភិបាលស្តាំនិយមជ្រុលនេះ ត្រូវបានមតិប្រជាជនគិតថា មានគោលនយោបាយ រើសអើងជាតិសាសន៍ បែងចែកសង្គម និងបង្កជម្លោះជាមួយប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:២៨
ក្រុមប្រជាជនបានមកជួបជុំគ្នា នៅវេលាម៉ោង៩យប់ នៅទីលាន Habima កណ្តាលក្រុងទែលអាវីវ។ មនុស្សភាគច្រើនមកទាំងគ្រួសារ មានកូនតូចៗផង ដៃទទូលឆ័ត្រ ក្រោមដំណក់ទឹកភ្លៀងជោកជាំ។ នេះបើផ្អែកតាមការបញ្ជាក់ពីអ្នករាយការណ៍ព័ត៌មានបារាំង AFP ដែលនៅទីតាំងផ្ទាល់។
យោងតាមប្រភពពីនគរបាលអ៊ីស្រាអែល នៅទែលអាវីវ មានប្រជាជនយ៉ាងហោច ៨ម៉ឺននាក់ បានមកចូលរួមធ្វើបាតុកម្ម។ ការជួបជុំធ្វើបាតុកម្មក៏មានផងដែរ នៅទីក្រុងហ្សេរុយសាឡឹម ខាងមុខនិវេសនដ្ឋាន លោកប្រធានាធិបតី Issac Herzog និងមុខផ្ទះលោកណាតាន់យ៉ាហ៊ូ នាយករដ្ឋមន្ត្រីអ៊ីស្រាអែល។
សូមបញ្ជាក់ថា ចលនាបាតុកម្មដ៏ធំកក្រើកនេះ ត្រូវបានបំផុសបំផុលដោយ អង្គការប្រឆាំងអំពើពុករលួយ ដោយមានការចូលរួមពីក្រុមគណបក្សនយោបាយកណ្តាល និងឆ្វេងនិយមអ៊ីស្រាអែល។ លោកអតីរដ្ឋមន្ត្រីការពារជាតិ Benny Gantz និងលោកអតីតរដ្ឋមន្ត្រីការបរទេស Tzipi Livni ក៏មានវត្តមានចូលរួមដែរ។ សំណេរលើផ្ទាំងបដា អំពាវនាវឲ្យស្រោចស្រង់លទ្ធិប្រជាធិបតេយ្យអ៊ីស្រាអែល ត្រូវបានគេសរសេរព្រោងព្រាត ។ បាតុករខ្លះ បានទាមទារឲ្យលោកណេតាន់យ៉ាងហ៊ូ ដែលប្រឡាក់ប្រឡូសដោយរឿងអាស្រូវពុករលួយ ត្រូវតែចុះចេញពីតំណែង។
លោកស្រី Ayala Procaccia អតីតចៅក្រមតុលាកំពូលអ៊ីស្រាអែល បានកាន់មីក្រូហ្វូន ថ្លែងទៅកាន់ក្រុមបាតុករថា ប្រជាជនអ៊ីស្រាអែល មិនអាចទទួលយកបានជាដាច់ខាត នូវការបំផ្លាញរបបនយោបាយប្រជាធិបតេយ្យ ដែលមានតាំងតែពីឆ្នាំ១៩៤៨។ កាលៈទេសៈពេលនេះ គឺជាពេលដែលពលរដ្ឋ ត្រូវរួមគ្នាការពារតម្លៃមនសិកា របស់អ៊ីស្រាអែល។
គួររំលឹកថា នៅអ៊ីស្រាអែលគ្មានរដ្ឋធម្មនុញ្ញទេ។ ដូច្នេះ គឺអំណាចតុលាការ ដែលជាបង្អែកធំ ក្នុងការរក្សាតុល្យភាពអំណាច ទប់មិនឲ្យអំណាចនីតិប្រតិបត្តិប្រើអំណាចផ្តាច់ការ។ ក៏ប៉ុន្តែ កាលពីថ្ងៃទី៤មករា រដ្ឋាភិបាលចម្រុះស្តាំនិយមជ្រុល ដឹកនាំដោយលោកណេតាន់យ៉ាហ៊ូ បានបង្ហាញគម្រោងធ្វើកំណែទម្រង់ ប្រព័ន្ធតុលាការ ដែលក្រុមអ្នករិះគន់បានហៅថា ជាផែនការប្រមូលអំណាចក្តាប់ក្នុងដៃ តាមរយៈការកាត់បន្ថយតួនាទី និងអំណាចរបស់ប្រព័ន្ធយុត្តិធម៌។ ក្រុមបាតុករ ចាត់ទុករដ្ឋាភិបាលលោកណេតាន់យ៉ាហ៊ូ មានទំនោរកាន់តែផ្តាច់ការ រើសអើសផ្លូវភេទ បែងចែកសង្គម។ ជាពិសេសនោះ រដ្ឋាភិបាលស្តាំនិយមជ្រុលនេះ ត្រូវប្រជាជនភាគច្រើន ចោទថាបានធ្វើសកម្មភាពដាក់អាណានិគមលើដែនដីប៉ាឡេស្ទីន បង្កជម្លោះជាតិសាសន៍និងសាសនា ធ្វើឲ្យអ៊ីស្រាអែល និងប៉ាឡេស្ទីន គ្មានថ្ងៃមានសន្តិភាពនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ