តួកគីរងគ្រោះរញ្ជួយដីធ្ងន់ធ្ងរផ្ទួនៗគ្នា ស្លាប់មនុស្សជាច្រើនរយនាក់
នៅថ្ងៃចន្ទទី ៦កុម្ភៈ២០២៣នេះ តួកគីបានរងគ្រោះរញ្ជួយដី ផ្ទួនៗគ្នាតែម្តង។ ការរញ្ជួយដីបានសម្លាប់ជីវិតមនុស្សអស់យ៉ាងហោចណាស់ ៥៩២នាក់ ក្នុងនោះជាង២២០នាក់ នៅខាងតំបន់គ្រប់គ្រងដោយពួកឧទ្ទាម និងរបួសជិត២ពាន់នាក់ នៅភាគខាងជើងប្រទេសស៊ីរី។ ចំណែកនៅខាងតួកគីវិញ មានស្លាប់យ៉ាងហោចណាស់ ៩១២នាក់ និងរបួសជាង៦ពាន់នាក់ ព្រមទាំងការខូចខាតជាសម្ភារៈយ៉ាងធ្ងន់ធ្ងរ។ នេះបើតាមតួលេខផ្តល់ដោយប្រធានាធិបតីតួកគី ដោយបញ្ជាក់បន្ថែមថា នេះតុល្យការបណ្តោះអាសន្នតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣៩
តំបន់ការ៉ាម៉ាន់ម៉ារ៉ាស Kahramanmaras ប្រទេសតួកគី ដែលនៅចម្ងាយប្រមាណតែ៦០គីឡូម៉ែត្រពី ព្រំប្រទល់ប្រទេសស៊ីរី ជាចំណុចស្នូលនៃការរញ្ជួយដីពីរ។ ការរញ្ជួយដីទីមួយ កំរិត៧,៨វ៉ិចទ័រ កើតឡើងនៅក្នុងស្រទាប់ដីជម្រៅ ប្រមាណ ១៧,៩ នៅវេលាម៉ោង១និង១៧ភ្លឺម៉ោងសកល ត្រូវជាម៉ោង៤និង១៧នាទីម៉ោងក្នុងស្រុក និង វាយប្រហារយ៉ាងខ្លាំងលើ៧ខេត្តរបស់តួកគីនិងប្រទេសស៊ីរី។ អមដោយរលករញ្ជួយតូច៥០បន្ថែមទៀតនៅតួកគី កម្លាំងនៃការរញ្ជួយដីបានអង្រួនភាគអាគ្នេយ៍តួកគីទាំងមូល និងរង្គើរហូតដល់ប្រទេសលីបង់ កោះស៊ីប ព្រមទាំងតំបន់ហ្កូអេនឡង់ផង បើតាមការបញ្ជាក់របស់ភ្នាក់ងារភូគព្ភសាស្ត្រាដាណឺម៉ាក។ ប៉ុន្មានក្រោយមកទៀត នៅវេលាម៉ោង១០និង២៤នាទីម៉ោងសកល វិទ្យាស្ថានអាមេរិកបានជូនដំណឹងអំពីការរញ្ជួយទីពីរ កំរិត ៧,៥វ៉ិចទ័រ នៅក្រុងអេគីណូហ្សូ Ekinozu។
ការរញ្ជួយដី បានបង្កឱ្យមានជនរងគ្រោះច្រើនខ្លាំង នៅតួកគី និងនៅស៊ីរី។ អាជ្ញាធរទាំងពីរប្រទេស បានផ្តល់តុល្យការ ជាបន្តបន្ទាប់ ជាលក្ខណៈបណ្តោះអាសន្នរហូត។ ចំនួនជនរងគ្រោះស្លាប់ និងរបួសបន្តកើនឡើងជាលំដាប់ ព្រោះការរញ្ជួយដីនេះបានផ្តួលអគារអស់ជិត១៨០០ឱ្យស្រុតរលំ។ ឯការសង្គ្រោះកំពុងចាប់ផ្តើមប៉ុណ្ណោះ។
ក្រុមសង្គ្រោះតួកគី និងក្រុមការពារស៊ីវិល ព្រមទាំងក្រុមពន្លត់អគ្គីភ័យស៊ីរី កំពុងសស្រាក់សស្រាំរុករកក្រែងឃើញជនរងគ្រោះជាប់កុនក្នុងគំនរបំណែកថ្ម-ដីបែកបាក់ នៅមានជីវិត។ ប្រជាពលរដ្ឋក៏បានចូលរួមជួយកម្លាំងដៃទទេដែរ។ ប្រឈមនឹងគ្រោះមហន្តរាយដ៏ធំធេងនេះ រដ្ឋមន្ត្រីក្រសួងមហាផ្ទៃតួកគីបាន ប្រកាសអាសន្នកំរិតខ្ពស់បំផុត និងបានអំពាវនាវសុំជំនួយអន្តរជាតិ។ អាហ្សែរបៃហ្សង់ បានបញ្ជូនក្រុមសង្គ្រោះចំនួន ៣៧០នាក់មកជួយភ្លាមមុនគេ។ សហរដ្ឋអាមេរិក បារាំង អ៊ីតាលី អ៊ីស្រាអែល រាប់ទាំងអ៊ុយក្រែនផង ... សរុប៤៧ប្រទេសបានប្រកាសផ្តល់ជំនួយសង្គ្រោះដល់តួកគី។
បើតាមប្រសាសន៍របស់លោកប្រធានាធិបតីតួកគី នេះគឺជាគ្រោះមហន្តរាយរញ្ជួយដីដ៏ខ្លាំងក្លាបំផុតសម្រាប់តួកគី គិតចាប់តាំងពីឆ្នាំ១៩៣៩មក។ តួកគី មានទីតាំងនៅចំតំបន់រញ្ជូយដីដ៏សកម្មជាងគេបំផុតមួយនៅលើផែនដី។ កាលពីចុងខែវិច្ឆិកា មានការរញ្ជួយដីកំរិត៦,១វ៉ិចទ័រ តែមិនបង្កឱ្យមានអ្នកស្លាប់។ នៅឆ្នាំ២០២០ រញ្ជួយដីនៅភាគខាងកើតប្រទេសបានផ្តាច់ជីវិតមនុស្ស៤០នាក់ខែមករា និង១១៤នាក់ នាខែតុលាឆ្នាំដដែល។ នៅឆ្នាំ១៩៩៩ ដីបានរញ្ជួយសម្លាប់មនុស្សអស់ជាង១៧០០០នាក់ ក្នុងនោះជាងមួយពាន់នៅក្រុងអ៊ីស្តង់ប៊ូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ