សមត្ថកិច្ចអ៊ីស្រាអ៊ែលពង្រឹងសន្តិសុខកាន់តែខ្លាំង ក្រោយផ្ទុះការវាយប្រហារហិង្សាផ្ទួនៗ
កាលពីល្ងាចថ្ងៃសុក្រទី៧មេសា មានការវាយប្រហារ២បានកើតឡើងនៅអ៊ីស្រាអែល មួយនៅក្រុងទែលអាវីវ បណ្តាលឲ្យស្លាប់មនុស្សម្នាក់ និងមួយទៀតនៅតំបន់ស៊ីហ្សកដានី បណ្តាលឲ្យស្លាប់មនុស្ស២នាក់។ ក្នុងអំឡុងពេលនៃបុណ្យប៉េសា ប្រពៃណីជ្វីហ្វនេះ សមត្ថកិច្ចអ៊ីស្រាអែលបានប្រកាសបង្កើនការពង្រឹងសន្តិសុខជាខ្លាំង ដើម្បីទប់ទល់ចំពោះការវាយប្រហារផ្សេងទៀត។ គួរកត់សំគាល់ថា ការផ្ទុះអំពើហិង្សាដ៏តានតឹងបំផុតនេះ គឺបន្ទាប់ពីសមត្ថកិច្ចអ៊ីស្រាអែល បានចូលទៅបង្ក្រាបយ៉ាងហិង្សា ទៅលើក្រុមជនជ្រុលនិយមប៉ាឡេស្ទីន ដល់ក្នុងវិហារឥស្លាមអាល់អាក់សា ជាទីសក្ការៈនៅក្រុងហ្សេរុយសាឡឹម។
ចុះផ្សាយនៅថ្ងៃ៖
យប់ថ្ងៃសុក្រ ម៉ោងប្រមាណ៩និង៣៥នាទី បុរសម្នាក់បានបើករថយន្តបុកអ្នកដំណើរ នៅតាមបណ្តោយមហាវិថី Kaufmann ក្នុងក្រុងទែលអាវីវ មុននឹងរេចង្កូតបត់ក្រឡាប់ផ្ងារ។ យោងតាមសមត្ថកិច្ចអ៊ីស្រាអែល ករណីវាយប្រហារនេះ បានផ្តាច់ជីវិតអ្នកទេសចរជនជាតិអ៊ីតាលី ភេទប្រុសម្នាក់អាយុ៣៦ឆ្នាំ និងបានបណ្តាលឲ្យមនុស្សរបួសចំនួនយ៉ាងហោច៧នាក់។
ផ្អែកតាមសមត្ថកិច្ចអ៊ីស្រាអែលដដែល នរគបាលម្នាក់ដែលស្ថិតនៅក្បែរកន្លែងកើតហេតុ បានចូលអន្តរាគមន៍ភ្លាមៗ ដោយបានបាញ់សម្លាប់អ្នករថយន្តនោះ នៅពេលឃើញជននោះប្រុងនឹងចាប់យកអាវុធមកបន្តការវាយប្រហារ។ ជនដៃដល់ភេទប្រុស អាយុ៤៥ឆ្នាំ រស់នៅតំបន់ Kfar Kassem ដែលជាតំបន់ជនជាតិអារ៉ាប់ ស្ថិតនៅភាគកណ្តាលអ៊ីស្រាអែល។
មុនហេតុការណ៍នេះកើតឡើងបន្តិច នៅតំបន់ស៊ីហ្សកដានីឯណោះ មានការបាញ់រះមួយបង្កឡើងដោយជនប៉ាឡេស្ទីន ធ្វើទៅលើរថយន្តរបស់ប្រជាជនអ៊ីស្រាអែលដែលកំពុងបើកបរ។ នារីវ័យ១៦ឆ្នាំ និង២០ឆ្នាំ ២នាក់បងប្អូនបានត្រូវគ្រាប់កាំភ្លើងស្លាប់ ខណៈស្ត្រីជាម្តាយរងរបួសធ្ងន់។
ក្រោយការវាយប្រហារផ្ទួនៗគ្នា ក្នុងអំឡុងពេលបុណ្យប៉េសាប្រពៃណីជ្វីហ្វនេះ លោកនាយករដ្ឋមន្ត្រីណេតាន់យ៉ាហ៊ូ បានចេញបញ្ជាឲ្យសមត្ថកិច្ចអ៊ីស្រាអែល ទាំងនគរបាល ទាំងកងទ័ព បើកប្រតិបត្តិការប្រុងប្រៀប និងការពារសន្តិសុខយ៉ាងម៉ដ្ឋចត់បំផុត។
សូមបញ្ជាក់ផងដែរថា កាលពីថ្ងៃព្រហស្បតិ៍ គ្រាប់រ៉ូកែតជាង៣០គ្រាប់ ត្រូវបានបាញ់ចេញពីភាគខាងត្បូងលីបង់ ឆ្ពោះមកទឹកដីខាងជើងអ៊ីស្រាអែល បណ្តាលឲ្យមនុស្សរបួសម្នាក់ និងខូចខាតទ្រព្យសម្ភារៈមួយចំនួន។ កងទ័ពអ៊ីស្រាអែល បានឆ្លើយតបវិញដោយបានបាញ់ប្លោងគ្រាប់កំទេចទីតាំងចំនួន៣ របស់ក្រុមហាម៉ាសស្ថិតនៅខាងត្បូងលីបង់។ ដោយឡែក ដោយចង់ចូលរួមសម្រួលភាពតានតឹង កងទ័ពលីបង់អះអាងថាខ្លួនបានទៅរុះរើ ទីតាំងប្រុុងបាញ់គ្រាប់រ៉ូកែតផ្សេងទៀត របស់ក្រុមជ្រុលនិយម ស្ថិតនៅភាគខាងត្បូង។
សូមបញ្ជាក់ថា អំពើហិង្សារបស់អ៊ីស្រាអែល និងប៉ាឡេស្ទីន បានផ្ទុះកក្រើកឡើងយ៉ាងខ្លាំងក្នុងអំឡុងពេលនេះ បន្ទាប់ពីសមត្ថកិច្ចអ៊ីស្រាអែល បានសំរុកចូលទៅក្នុងវិហារ អាល់អាក់សាក្រុងហ្សេរុយសាឡឹម ដែលជាទីសក្ការៈលំដាប់ទី៣នៃសាសនាឥស្លាម។ យោងតាមរូបភាពជាច្រើនតាមបណ្តាញសង្គម គេឃើញសមត្ថកិច្ចអ៊ីស្រាអែល ចូលទៅដេញវាយបំបែកជនប៉ាឡេស្ទីន និងមានការគុបគ្រាប់បែកផ្សែង យ៉ាងហិង្សាបំផុត នៅក្នុងព្រះវិហារដ៏សក្ការៈនេះ។ ក្រុមហាម៉ាសប៉ាឡេស្ទីនចាត់ទុកទង្វើនេះ ថាជាបទឧក្រិដ្ឋដ៏ធ្ងន់បំផុតរបស់អ៊ីស្រាអែល។ យ៉ាងណាក៏ដោយ សមត្ថកិច្ចអ៊ីស្រាអែលអះអាងថា ប្រតិបត្តិការរបស់ខ្លួនគឺដើម្បីបំបែងហ្វូងជនជ្រុលនិយមដ៏ហិង្សា ដែលប្រមូលកម្លាំងគ្នានៅក្នុងព្រះវិហារអាល់អាកសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ