អ៊ីស្រាអែល បានសម្លាប់មេក្លោងថ្មីម្នាក់ទៀត របស់ក្រុមជីហាតអ៊ីស្លាមប៉ាឡេស្ទីន នៅតំបន់ហ្កាហ្សា
ការបាញ់ប្លោងគ្រាប់រវាងអ៊ីស្រាអែល និងក្រុមប្រដាប់អាវុធប៉ាឡេស្ទីនតំបន់ហ្កាហ្សា បានកក្រើកយ៉ាងហិង្សា ចាប់តាំងពីថ្ងៃអង្គារមក។ កងទ័ពអ៊ីស្រាអែល បានអះអាងថា កាលពីយប់ថ្ងៃសុក្រ គេបានសម្លាប់មេក្លោងថ្មីម្នាក់ទៀត របស់ក្រុមជីហាតអ៊ីស្លាម នៅតំបន់ហ្កាហ្សា ដែលជាក្រុមភេរវកម្ម។ គិតមកត្រឹមពេលនេះ ការផ្ទុះអាវុធនេះ បានបណ្តាលឲ្យស្លាប់មនុស្ស៣៣នាក់នៅខាងប៉ាឡេស្ទីន និងខាងអ៊ីស្រាអែលមានជនស៊ីវីលម្នាក់ស្លាប់។
ចុះផ្សាយនៅថ្ងៃ៖
ស្តាប់ - ០២:០៩
ប្រតិបត្តិការដែលកងទ័ពអ៊ីស្រាអែលហៅឈ្មោះថា ជា “ប្រតិបត្តិការបង្ការ” បានចាប់ផ្តើមកាលពីថ្ងៃអង្គារ ដោយកងទ័ពអ៊ីស្រាអែល បានវាយប្រហារចំនួន២៥៤គោលដៅ នៅតំបន់ហ្កាហ្សា ក្នុងនោះមានគោលដៅយុទ្ធសាស្ត្រ ទីតាំងលាក់ខ្លួនឬស្តុកអាវុធ និងគោលដៅជាបុគ្គល។ យប់ថ្ងៃសុក្រ មេក្លោងរបស់ក្រុមជីហាតអ៊ីស្លាមម្នាក់ទៀត ត្រូវបានកងទ័ពអ៊ីស្រាអែលសម្លាប់នៅតំបន់ហ្កាហ្សា ពោលគឺសរុបពីថ្ងៃអង្គារមក អ៊ីស្រាអែលបានសម្លាប់មេក្លោងក្រុមនេះ ចំនួន៦នាក់ហើយ។
ដោយឡែក យោងតាមអាជ្ញាធរសុខាភិបាលប៉ាឡេស្ទីនប្រចាំតំបន់ហ្កាហ្សា គិតពីថ្ងៃអង្គារមក គឺមីស៊ីលរបស់អ៊ីស្រាអែល បានផ្តាច់ជីវិតមនុស្សចំនួន៣៣នាក់ ក្នុងនោះមានទាំងជនស៊ីវីល កុមារ និងក្រុមប្រដាប់អាវុធ សមាជិករបស់ក្រុមជីហាតអ៊ីស្លាម និងក្រុមសមរភូមិប្រជាជនរំដោះប៉ាឡេស្ទីនផងដែរ។
ជាការឆ្លើយតបវិញ ក្រុមប្រដាប់អាវុធប៉ាឡេស្ទីន បានបាញ់ប្លោងរ៉ុកកែតជាច្រើនគ្រាប់ ទៅលើទីក្រុងធំៗនៅអ៊ីស្រាអែល។ យោងតាមកងទ័ពអ៊ីស្រាអែល គ្រាប់រ៉ុកកែតបាញ់ចេញពីតំបន់ហ្កាហ្សា មានចំនួន៩៧៣គ្រាប់ ក្នុងនោះ ២៩៦គ្រាប់ត្រូវបានប្រព័ន្ធខែលមីស៊ីលអ៊ីស្រាអែលស្ទាក់កំទេចបាន។ គ្រាប់រ៉ុកកែតមួយគ្រាប់ បានធ្លាក់ចំអាគារផ្ទះប្រជាជន នៅ Rehovot ខាងត្បូងក្រុងទែលអាវីវ បណ្តាលឲ្យស្លាប់មនុស្សម្នាក់ និងរបួស៥នាក់។
សូមបញ្ជាក់ថា ប្រទេសជាច្រើនដែលស្និទ្ធនឹងសំណុំរឿងអ៊ីស្រាអែល-ប៉ាឡេស្ទីន បានអំពាវនាវឲ្យបិទបញ្ចប់ អំពើហិង្សាបាញ់ប្លោងគ្រាប់ប្រមាណជិត១សប្តាហ៍មកនេះ។ ប្រភពពីភាគីប៉ាឡេស្ទីន បានឲ្យដឹងថា អេហ្ស៊ីបកំពុងតែព្យាយាមសម្រុះសម្រួល ស្នើឲ្យភាគីទាំងសងខាង ទទួលយកកិច្ចព្រមព្រៀងឈប់បាញ់ ដែលអេហ្ស៊ីបជាអ្នកតាក់តែង។ ដោយឡែក ប្រភពពីក្រុមជីហាតអ៊ីស្លាមប៉ាឡេស្ទីននៅតំបន់ហ្កាហ្សា ដែលអ៊ីស្រាអែល អាមេរិក និងអឺរ៉ុប ចាត់ទុកថាជាក្រុមភេរវកម្មនោះ បានអះអាងថា ភាគីគេអាចទទួលយកកិច្ចព្រមព្រៀងឈប់បាញ់ គឺទាល់តែអ៊ីស្រាអែល យល់ព្រមឈប់សម្លាប់មនុស្សនៅតំបន់ហ្កាហ្សា និងតំបន់ស៊ីសហ្សកដានីតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ