ឆ្នាំ២០២២ មនុស្សជិត៩០០នាក់ត្រូវបានប្រហារជីវិត ជាតួលេខខ្ពស់បំផុតគិតពីឆ្នាំ២០១៧
ក្នុងឆ្នាំ២០២២កន្លងទៅ កម្រិតនៃការប្រហារជីវិតអ្នកទោស បានកើនឡើងយ៉ាងខ្លាំង។ យោងតាមរបាយការណ៍ ស្តីពីទោសប្រហារជីវិត ចេញផ្សាយដោយអង្គការ Amnesty International យ៉ាងហោចណាស់ មនុស្សប្រមាណជិត៩០០នាក់ ត្រូវបានគេប្រហារជីវិតនៅតាមប្រទេសចំនួន២០។ តួលេខដែលអាចនៅទាបជាងការពិតឆ្ងាយណាស់ ព្រោះប្រទេសខ្លះដែលមានរបបដឹកនាំផ្តាច់ការ ប្រហារជីវិតអ្នកទោសដោយលាក់កំបាំង។
ចុះផ្សាយនៅថ្ងៃ៖
ចំនួននៃការប្រហារជីវិតអ្នកទោស បានកើនឡើងខ្ពស់បំផុត គិតពីឆ្នាំ២០១៧មក។ ជាសរុប មនុស្សចំនួន ៨៨៣នាក់ ត្រូវបានប្រហារជីវិត នៅតាមប្រទេសចំនួន២០ ក្នុងឆ្នាំ២០២២។ ពោលគឺបានកើនឡើង ចំនួន៥៣% បើប្រៀបធៀបទៅឆ្នាំ២០២១។ ការប្រហារជីវិតអ្នកទោស ដែលមានច្រើនបំផុតនៅតាមប្រទេសមួយចំនួនតូច នៅតំបន់ដើមបូព៌ា និងតំបន់អាហ្វ្រិកខាងជើង។ ឆ្នាំ២០២១ ប្រទេសក្នុងតំបន់នេះ ប្រហារជីវិតអ្នកទោសចំនួន ៥២០នាក់ ហើយឆ្នាំ២០២២ ចំនួនប្រហារជីវិតមនុស្សបានកើនឡើងដល់ ៨២៥នាក់។
ផ្អែកតាមតួលេខ នៃរបាយការណ៍ប្រចាំឆ្នាំរបស់ Amnesty International នៅអ៊ីរ៉ង់ ការប្រហារជីវិតអ្នកទោសដែលមានចំនួន ៣១៤ក្នុងឆ្នាំ២០២១ បានកើនឡើងដល់ ៥៧៦នាក់នៅឆ្នាំ២០២២។ នៅអារ៉ាប៊ីសាអូឌីតវិញ គឺការប្រហារជីវិតអ្នកទោស បានកើនឡើង១គុណជា៣ឯណោះ ពី៦៥នាក់ឡើងដល់១៩៦នាក់ ពោលគឺជាតួលេខកើនឡើងខ្ពស់បំផុតក្នុងរវាង៣០ឆ្នាំចុងក្រោយ សម្រាប់ប្រទេសអ៊ីស្លាមផ្តាច់ការមួយនេះ។ ចំណែកប្រទេសអេហ្ស៊ីប បានប្រហារជីវិតអ្នកទោស ចំនួន២៤នាក់ ក្នុងឆ្នាំ២០២២។
លោកស្រី Agnès Callamard អគ្គលេខាធិការ Amnesty International បានលើកឡើងថា មានពេលមួយអាជ្ញាធរអារ៉ាប៊ីសាអូឌីត បានប្រហារជីវិតអ្នកទោសចំនួនដល់ទៅ ៨១នាក់ ក្នុងរយៈពេលតែមួយថ្ងៃ។ ចំណែកនៅអ៊ីរ៉ង់វិញ ដោយចង់បិទខ្ទប់ចលនាបាតុកម្មរបស់ប្រជាជន របបផ្តាច់ការអ៊ីរ៉ង់ បានដកហូតជីវិតមនុស្សជាច្រើននាក់ ដោយគ្រាន់តែពួកគេ បានសម្តែងសិទ្ធិក្នុងការធ្វើបាតុកម្ម។
តួលេខផ្លូវការនៃចំនួនប្រហារជីវិតមនុស្ស កើនឡើងខ្លាំងដល់ម្លឹងនេះ អាចនៅទាបជាងការពិតជាក់ស្តែងផង។ ប្រទេសផ្តាច់ការមួយចំនួន ដូចជា ចិន កូរ៉េខាងជើង និងវៀតណាមជាដើម តែងតែលាក់បំពួនការប្រហារជីវិតអ្នកទោស។ ផ្អែកតាម Amesty International ថ្វីបើគេមិនដឹងចំនួនពិតជាក់ស្តែង តែគេជឿច្បាស់ថា នៅចិនពិតជាមានការប្រហារជីវិតអ្នកទោស ច្រើនជាងគេបង្អស់ទូទាំងពិភពលោក។
យ៉ាងណាក៏ដោយ របាយការណ៍ បានអបអរសាទរចំពោះប្រទេសចំនួន៦ ដែលបានបោះបង់ចោលទាំងស្រុង ឬដោយផ្នែកខ្លះ នៃទោសប្រហារជីវិត ក្នុងឆ្នាំ២០២២។ កាហ្សាក់ស្ថាន ប៉ាពូអាស៊ី សេរ៉ាឡេអូន និងសាធារណរដ្ឋអាហ្វ្រិកកណ្ដាល បានលុបចោលទោសប្រហារជីវិតទាំងស្រុង ខណៈប្រទេសហ្គីណេអេហ្វាទ័រ និងហ្សំប៊ី បានលុបចោលទោសប្រហារជីវិត សម្រាប់បទឧក្រិដ្ឋធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ