អ៊ីរ៉ង់ប្រហារជីវិតមនុស្ស៣នាក់ ដែលជាប់ទោសពីបទធ្វើឲ្យស្លាប់មន្ត្រីនគរបាល៣នាក់ ក្នុងពេលធ្វើបាតុកម្ម
កាលពីថ្ងៃសុក្រ ទី១៩ឧសភាម្សិលមិញ អាជ្ញាធរអ៊ីរ៉ង់ បានប្រហារជីវិតអ្នកទោស៣នាក់ទៀត ដែលពាក់ព័ន្ធការធ្វើបាតុកម្មប្រឆាំងរបបផ្តាច់ការអ៊ីរ៉ង់។ អ្នកទោសទាំង៣នាក់ ត្រូវបានតុលាការអ៊ីរ៉ង់ ចាប់ខ្លួនកាលពីខែវិច្ឆិកា ដោយចោទថាបានធ្វើសកម្មភាពបណ្តាលឲ្យស្លាប់សមត្ថកិច្ចនគរបាលអ៊ីរ៉ង់ ចំនួន៣នាក់ ដែលធ្វើអន្តរាគមន៍បង្ក្រាបបាតុកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
Majid Kazemi Saleh Mirhashemi និង Saeed Yaghoubi ត្រូវបានអាជ្ញាធរអ៊ីរ៉ង់ប្រហារជីវិតដោយព្យួរក នៅថ្ងៃសុក្រទី១៩ឧសភា។ យោងតាមការចុះផ្សាយរបស់គេហទំព័រអាជ្ញាធរព័ត៌មានយុត្តិធម៌អ៊ីរ៉ង់ Mizan អ្នកទោសទាំង៣នេះ ត្រូវទទួលទោសប្រហារជីវិត ពីបទបានប្រើប្រាស់កាំភ្លើង បាញ់ប្រហារបណ្តាលឲ្យស្លាប់នគរបាលអ៊ីរ៉ង់ ដែលចុះទៅបំបែកបាតុកម្ម នៅក្រុងអ៊ីសប៉ាអង់។
គេហទំព័រនេះ បានលំអិតថា ជនទាំង២នាក់ ដែលត្រូវបានចាប់ខ្លួនកាលពីខែវិច្ឆិកា និងត្រូវបានកាត់ទោសកាលពីខែមករា បានសារភាពទទួលស្គាល់កំហុស ថាខ្លួនពិតជាស្ថិតនៅក្នុងក្រុមទុច្ចរិត ធ្វើសកម្មភាពហិង្សា ប៉ះពាល់ដល់សន្តិសុខជាតិ និងបានបណ្តាលឲ្យស្លាប់សមត្ថកិច្ចនគរបាលជាតិអ៊ីរ៉ង់៣នាក់។
ដោយឡែក ក្រុមគ្រួសាររបស់អ្នកទោសម្នាក់ឈ្មោះ Majid Kazemi ដែលរស់នៅប្រទេសអូស្ត្រាលី បានព្យាយាមសុំអន្តរាគមន៍ពីរដ្ឋមន្ត្រីក្រសួងការបរទេសអូស្ត្រាលី និងបានធ្វើញាតិនៅលើគេហទំព័រ Change.org ទាមទារឲ្យដោះលែងអ្នកទោសរូបនេះ។ យោងតាមក្រុមគ្រួសារ ជនឈ្មោះ Majid Kazemi ដែលមានអាយុត្រឹមតែ៣០ឆ្នាំគឺជាមនុស្សស្លូតត្រង់ ជួយអាសារអ្នកដ៏ទៃ ហើយជននេះបានសារភាពកំហុស ក៏ដោយសារតែបានរងទារុណកម្ម។
សូមរំលឹកថា ប្រជាជនអ៊ីរ៉ង់ បានផុសផុលធ្វើបាតុកម្មសឹងទូទាំងប្រទេស ចាប់ពីពាក់កណ្តាលខែកញ្ញា ឆ្នាំ២០២២ បន្ទាប់ពីមានករណីស្ត្រីអ៊ីរ៉ង់ដើមកំណើតកួដម្នាក់ ឈ្មោះ ម៉ាស្ហា អាមីនី បានស្លាប់ក្រោយការចាប់ឃាត់ខ្លួនរបស់នគរបាលសិលធម៌អ៊ីរ៉ង់ ដោយចោទថាស្ត្រីរូបនេះទទូលក្រណាត់មិនជិតក្បាល។ ក្រោយការស្លាប់នេះ ប្រជាជនអ៊ីរ៉ង់ ជាពិសេសយុវជនវ័យក្មេង បានចេញធ្វើបាតុកម្ម ទាមទារឲ្យមានការផ្លាប់ប្តូររបបដឹកនាំ អ៊ីស្លាមផ្តាច់ការ។
គិតចាប់ពីខែកញ្ញាមក អាជ្ញាធរអ៊ីរ៉ង់បានចាប់ខ្លួនបាតុករជាច្រើននាក់ និងបានកាត់ទោសប្រហារជីវិត ដើម្បីជាការសំឡុត ដល់ចលនាបាតុកម្ម។ យោងតាម អង្គការ Iran Human Rights ដែលមានទីតាំងនៅន័រវែស ក្នុងឆ្នាំ២០២២ អ៊ីរ៉ង់បានប្រហារជីវិតមនុស្ស ចំនួន ៥៨២នាក់ ពោលគឺបានកើនឡើងចំនួន៧៥% បើប្រៀបទៅឆ្នាំ២០២១។ ហើយឆ្នាំ២០២៣នេះ បើគិតពីខែមករាមក អាជ្ញាធរអ៊ីរ៉ង់បានប្រហារជីវិតមនុស្សចំនួន២១៨នាក់រួចហើយ។ នៅមានបាតុករច្រើននាក់ទៀត ដែលកំពុងជាប់ឃុំ ហើយប្រឈមនឹងទោសប្រហារជីវិត។ ផ្អែកតាមរបាយការណ៍របស់ Amnesty International នៅលើពិភពលោកនេះ អ៊ីរ៉ង់គឺជាប្រទេសដែលប្រហារជីវិតមនុស្សច្រើនជាងគេបំផុត បន្ទាប់ពីចិន ទោះបីចិនមិនបង្ហាញតួលេខឲ្យដឹងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ