លោកម៉ាមូដ អាបាស ប្រមុខដឹកនាំប៉ាឡេស្ទីន ទៅប៉េកាំងជួបលោកស៊ី ជីនពីង
លោកម៉ាមូដ អាបាស ប្រមុខដឹកនាំប៉ាឡេស្ទីន បានធ្វើដំណើរទៅដល់ទីក្រុងប៉េកាំង នៅព្រឹកថ្ងៃអង្គារទី១៣មិថុនានេះ។ ផ្អែកតាមការចុះផ្សាយ របស់បណ្តាញព័ត៌មានផ្លូវការប៉ាឡេស្ទីន នៅក្នុងទស្សនកិច្ចនេះ គឺលោក ម៉ាមូដ អាបាស និងទៅជួបពិភាក្សាជាមួយ លោកប្រធានាធិបតីចិន ស៊ី ជីនពីង ទាក់ទិននឹងសំណុំរឿងវិវាទ នៅតំបន់ដើមបូព៌ា។
ចុះផ្សាយនៅថ្ងៃ៖
ស្តាប់ - ០២:១៨
យោងតាមការចុះផ្សាយរបស់បណ្តាញព័ត៌មានផ្លូវការប៉ាឡេស្ទីន Wafa គឺលោកម៉ាមូដ អាបាស នឹងទៅជួបប្រជុំជាមួយលោកស៊ី ជីនពីង នៅក្រុងប៉េកាំង ដោយមេដឹកនាំទាំង២ នឹងនិយាយគ្នា អំពីស្ថានការណ៍ទូទៅ ព្រមទាំងជម្លោះវិបត្តិនៅតំបន់ដើមបូព៌ា ហើយថែមទាំងដោះដូរការយល់ឃើញ ទៅលើផលប្រយោជន៍រួមគ្នា រវាងចិន និងប៉ាឡេស្ទីន។ ក្រៅពីជួបលោកស៊ី ជីនពីង លោកម៉ាមូដ អាបាស ក៏នឹងជួបជាមួយលោកនាយករដ្ឋមន្ត្រីចិន លី ឈាំង ផងងដែរ។
កាលពីសប្តាហ៍កន្លងទៅ លោក វ៉ាង វេនពីង អ្នកនាំពាក្យក្រសួងការបរទេសចិន បានលើកឡើងថា លោកម៉ាមូដ អាបាស គឺជាមិត្តរបស់ប្រជាជនចិន ជាយូរអង្វែងមកហើយ។ លោកអះអាងថា ហើយជានិច្ចជាកាល ចិនតែងតែប្រកាសគោលជំហរ ការពារបុព្វហេតុរបស់ប្រជាជនប៉ាឡេស្ទីន ដែលតស៊ូដើម្បីការពារសិទ្ធិ និងកសាងជាតិរបស់ខ្លួនដ៏ស្របច្បាប់ និងប្រកបដោយភាពយុត្តិធម៌។
គួរកត់សំគាល់ថា មួយរយៈចុងក្រោយនេះ ចិនបានចាប់ផ្តើមមានវត្តមានកាន់តែច្រើន ដើម្បីចូលរួមធ្វើជាអាជ្ញាកណ្តាល ក្នុងសំណុំរឿងនៅតំបន់ដើមបូព៌ា ដែលជាទូទៅ គឺជាតំបន់ដែលអាមេរិកមានវត្តមានខ្លាំង។ ថ្មីៗនេះ អារ៉ាប៊ីសាអូឌីត និង អ៊ីរ៉ង់ បានជានានឹងគ្នាឡើងវិញ បន្ទាប់ពីចិនបានធ្វើជាអាជ្ញាកណ្តាលផ្សះផ្សារ។ យ៉ាងណាក៏ដោយ កាលពីសប្តាហ៍កន្លងទៅ លោកប្រមុខការទូតអាមេរិក ដែលមានវត្តមាននៅរដ្ឋធានីរីយ៉ាត បានឆ្លើយប្រាប់អ្នកកាសែតថា សហរដ្ឋអាមេរិក មិនដែលទៅដើរបញ្ជាឲ្យប្រទេសនីមួយ ថាត្រូវតែជ្រើសរើសយក រវាងចិន និងអាមេរិកនោះទេ។
សូមរំលឹកថា លោកស៊ី ជីនពីង ដែលបានធ្វើដំណើរទៅរដ្ឋធានីរីយ៉ាត កាលពីខែធ្នូឆ្នាំមុន ហើយបានជួបជាមួយលោកប្រមុខដឹកនាំប៉ាឡេស្ទីននៅទីនោះ បានស្នើទៅកាន់ភាគីប៉ាឡេស្ទីនថា ចិនចង់ជួយចូលរួម នៅក្នុងផែនការស្វែងរកសន្តិភាព រវាងអ៊ីស្រាអែល និងប៉ាឡេស្ទីន ដែលបច្ចុប្បន្ននៅជាប់គាំងគ្មានដំណោះស្រាយ។
នៅក្នុងសំណុំរឿងនេះ ជានិច្ចជាកាល ចិនមានគោលជំហរ គាំទ្រការបង្កើតរដ្ឋប៉ាឡេស្ទីនឯករាជ្យ ស្មើភាពគ្នាជាមួយអ៊ីស្រាអែល។ នៅក្នុងបទសម្ភាសន៍មួយ ចុះផ្សាយដោយទីភ្នាក់ងារចិន Xinhua លោក Abbas Zaki សមាជិកម្នាក់នៃក្រុមហ្វាតាប៉ាឡេស្ទីន បានលើកឡើងថា ចិនគឺជាមិត្តដ៏ស្និទ្ធស្នាលរបស់ប៉ាឡេស្ទីន ហើយលោកសប្បាយចិត្តណាស់ ដែលឃើញចិនចាប់អារម្មណ៍ យកចិត្តទុកដាក់នៅក្នុងសំណុំរឿងនៅដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ