អ៊ីស្រាអែលពង្រាយទ័ព ត្រៀមសំរុកចូលក្នុងតំបន់ហ្កាហ្សា ដើម្បីកំទេចក្រុមហាម៉ាស?
ថ្ងៃពុធទី១១តុលា លោកនេតាន់យ៉ាហ៊ូ បានប្រកាសថា “សមាជិកក្រុមភេរវកម្មហាម៉ាសទាំងអស់ គឺសុទ្ធតែជាមនុស្សស្លាប់”។ លោកសន្យាថាអ៊ីស្រាអែល នឹងកំទេចសម្លាប់សមាជិកក្រុមដ៏សាហាវព្រៃផ្សៃនេះ ម្តងមួយៗឲ្យអស់ មិនខុសពីករណីពិភពលោក ប្រយុទ្ធបោសសំអាតក្រុមជីហាតអង្គការរដ្ឋអ៊ីស្លាមឡើយ។ គួរបញ្ជាក់ថា នៅជុំវិញតំបន់ហ្កាហ្សា គេសង្កេតឃើញកងទ័ពអ៊ីស្រាអែល ត្រូវបានដាក់ពង្រាយជាច្រើនម៉ឺននាក់ ដែលតាមការសង្ស័យ គឺអ៊ីស្រាអែល អាចនឹងសំរុកចូលទៅក្នុងតំបន់ហ្កាហ្សា ដើម្បីបើកប្រតិបត្តិការបោសសំអាតក្រុមហាម៉ាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៩
សំឡេងផ្ទុះ នៅតែត្រូវបានគេឮជាប្រចាំ នៅថ្ងៃទី៦នៃសង្គ្រាមរវាងអ៊ីស្រាអែល និងក្រុមហាម៉ាសនៅតំបន់ហ្កាហ្សា។ អ្នករាយការណ៍ព័ត៌មានបារាំង AFP បានអះអាងថា នៅព្រឹកថ្ងៃព្រហស្បតិ៍ទី១២តុលា គ្រាប់មីស៊ីលជាច្រើនគ្រាប់ ត្រូវបានបាញ់សំដៅទៅលើជំរំជនភៀសខ្លួនប៉ាឡេស្ទីន Al-Shati ដែលស្ថិតនៅភាគខាងជើងតំបន់ហ្កាហ្សា។ ចំណែកក្រុមហាម៉ាស បានអះអាងថា គេបានបាញ់រ៉ូកែតជាច្រើនគ្រាប់ ទៅលើទីក្រុង Tel Aviv វិញ ជាការសងសិក ដោយសារតែអ៊ីស្រាអែល បានវាយប្រហារទៅលើប្រជាជនស៊ីវីល ក្នុងជំរំជនភៀសខ្លួន២កន្លែង។
គួរកត់សំគាល់ថា ក្នុងបរិបទសង្គ្រាមនេះ អ៊ីស្រាអែលបានប្រមូលទ័ពបម្រុងចំនួន ៣សែននាក់ និងបានដាក់ពង្រាយកងទ័ពជាច្រើនម៉ឺននាក់ នៅជុំវិញតំបន់ហ្កាហ្សា។ ព្រឹកថ្ងៃព្រហស្បតិ៍ លោក Richard Hecht អ្នកនាំពាក្យម្នាក់ នៃកងទ័ពអ៊ីស្រាអែលបានបញ្ជាក់ប្រាប់នៅក្នុងសន្និសីទកាសែតថា កងទ័ពអ៊ីស្រាអែលកំពុងតែត្រៀម បើកប្រតិបត្តិការ សំរុកចូលទៅក្នុងតំបន់ហ្កាហ្សា ដើម្បីកំទេចក្រុមហាម៉ាសឲ្យអស់។ លោកបានអះអាងថា ប្រតិបត្តិការសំរុកចូលទៅ នេះ អាចធ្វើឡើងដោយថ្មើរជើង តាមផ្លូវអាកាស ឬអាចធ្វើឡើងដោយសហការ ជាមួយប្រតិបត្តិការចូលតាមផ្លូវសមុទ្រផងដែរ។ អ្វីៗ គឺវាស្ថិតនៅលើការសម្រេច របស់ក្រុមថ្នាក់ដឹកនាំនយោបាយ។ តែយ៉ាងណា អ្នកនាំពាក្យរូបនេះអះអាង គិតត្រឹមពេលនេះ មិនទាន់មានការសម្រេចច្បាស់លាស់ណាមួយទេ។
សូមបញ្ជាក់ថា មានការព្រួយបារម្ភជាខ្លាំង អំពីដំណាក់កាលបន្ទាប់នៃសង្គ្រាមនេះ ប្រសិនបើកងទ័ពអ៊ីស្រាអែល នឹងសំរុកចូលទៅក្នុងតំបន់ហ្កាហ្សា ដើម្បីសម្លាប់សមាជិករបស់ក្រុមហាម៉ាសម្តងមួយៗ។ ប្រជាជនស៊ីវីលប៉ាឡេស្ទីន អាចនឹងរងគ្រោះដោយប្រយោល ដោយសារតែការប្រយុទ្ធគ្នា។ យ៉ាងណាមិញ យោងតាមតួលេខរបស់អង្គការសហប្រជាជាតិ យ៉ាងហោចណាស់ប្រជាជនប៉ាឡេស្ទីននៅតំបន់ហ្កាហ្សា បានភៀសខ្លួនចេញពីផ្ទះសំបែង ចំនួន៣៣៨០០០នាក់ហើយ។
នៅក្នុងសុន្ទរកថាផ្លូវការ កាលពីថ្ងៃពុធ លោកនេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានថ្លែងថា ការវាយប្រហាររបស់ក្រុមភេរវកម្មហាម៉ាស មកលើអ៊ីស្រាអែល វាគឺជាការសម្លាប់រង្គាលដ៏សាហាវព្រៃផ្សៃ ដែលប្រជាជនជ្វីហ្វបានរងគ្រោះធ្ងន់ធ្ងរបំផុតមិនធ្លាប់មានទេ បើគិតចាប់ពីជំនាន់សម្លាប់រង្គាលប្រល័យពូជសាសន៍ ធ្វើឡើងដោយពួកណាហ្ស៊ី កាលពីសង្គ្រាមលោកលើកទី២។ លោកបន្តថា ក្រុមហាម៉ាស គឺមិនខុសពីក្រុមជីហាតអង្គការរដ្ឋអ៊ីស្លាមទេ។ ដូច្នេះអ៊ីស្រាអែល និងចូលទៅកំទេច សម្លាប់សមាជិកក្រុមភេរវកម្មនេះឲ្យអស់ មិនឲ្យសល់សូម្បីតែ១នាក់។
សូមបញ្ជាក់ថា គិតត្រឹមថ្ងៃព្រហស្បតិ៍ទី១២តុលា ៦ថ្ងៃក្រោយការវាយឆ្មក់ទ្រង់ទ្រាយធំរបស់ក្រុមហាម៉ាស ចំនួនមនុស្សស្លាប់បានកើនឡើងទាំងសងខាង។ ក្រុមហាម៉ាសបានចូលទៅបាញ់សម្លាប់ប្រជាជនស៊ីវីល ក្នុងទឹកដីអ៊ីស្រាអែល ដោយឥតរើសមុខ ជាក់ស្តែងនៅតំបន់ Kibboutz ដែលក្រុមភេរវកម្មនេះបានបាញ់រះ សម្លាប់មនុស្សប្រមាណ២៧០នាក់ ដែលកំពុងជួបជុំគ្នាក្នុងកម្មវិធីប្រគុំតន្ត្រី។ តួលេខចុងក្រោយសរុបខាងអ៊ីស្រាអែល មានស្លាប់ប្រមាណ១២០០នាក់ ភាគច្រើនជាជនស៊ីវីល និងបាត់ខ្លួនជាច្រើនរយនាក់ទៀត។ ក្រៅពីនេះ ក្រុមហាម៉ាស បានចាប់ចំណាប់ខ្មាំង មនុស្សប្រមាណ១៥០នាក់ យកទៅតំបន់ហ្កាហ្សា។ អាជ្ញាធរអ៊ីស្រាអែល អះអាងថា គេបានប្រមូលសាកសពរបស់ពួកហាម៉ាស ចំនួនប្រមាណ១៥០០សាកសព ដែលគេបានសម្លាប់បាន។ នៅខាងហ្កាហ្សាវិញ មនុស្សប្រមាណ១២០០នាក់ ក្នុងនោះមានស្ត្រីនិងកុមារជាច្រើននាក់ ស្លាប់ដោយការបាញ់ប្លោងគ្រាប់របស់អ៊ីស្រាអែល។
គួរបញ្ជាក់ដែរថា នៅថ្ងៃព្រហស្បតិ៍ទី១២តុលា លោកអង់តូនី ប្លីងកិន ប្រមុខការទូតអាមេរិក បានទៅដល់អ៊ីស្រាអែល ដើម្បីពិនិត្យស្ថានការណ៍ និងបញ្ជាក់អំពីជំហរជួយគាំទ្រអ៊ីស្រាអែល ទាំងផ្នែកការទូត និងផ្នែកសព្វាវុធ។ យ៉ាងណាក៏ដោយ លោកប្រធានាធិបតី ចូ បៃដិន បានស្នើឲ្យអ៊ីស្រាអែល “គោរពច្បាប់សង្គ្រាម” នៅក្នុងការប្រយុទ្ធវាយបកទៅលើក្រុមហាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ