សង្គ្រាមអ៊ីស្រាអែល-ហាម៉ាស៖ លោកនេតាន់យ៉ាហ៊ូច្រានចោលរាល់គ្រប់ទម្រង់នៃបទឈប់បាញ់
រដ្ឋាភិបាលអ៊ីស្រាអែលដឹកនាំដោយលោកនេតាន់យ៉ាហ៊ូ បានបដិសេធ នៅរសៀលថ្ងៃចន្ទទី ៣០តុលា មិនទទួលយកបទឈប់បាញ់ណាទាំងអស់។ អ៊ីស្រាអែលបន្តវាយលុកលើតំបន់ហ្កាហ្សាតាមផែនការនិងប្រកបដោយយុទ្ធវិធី។
ចុះផ្សាយនៅថ្ងៃ៖
ស្តាប់ - ០២:១០
ទោះបីជាមានការទាមទារពីសំណាក់អង្គការមនុស្សធម៌នានាឱ្យមានបទឈប់បាញ់ ព្រោះស្ថានភាពនៅដែនដីប៉ាឡេស្ទីនត្រង់តំបន់ហ្កាហ្សាធ្លាក់ក្នុងមហន្តរាយមនុស្សធម៌មិនធ្លាប់ប្រទះយ៉ាងណាក៏ដោយ ក៏លោកនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ បានប្រកាសច្រានចោលនៅថ្ងៃចន្ទទី៣០តុលាថា អ៊ីស្រាអែលមិនឈប់បាញ់ជាដាច់ខាត។ “គោរពបទឈប់បាញ់ ជាសេចក្តីអំពាវនាវសុំឱ្យចុះចាញ់នឹងចលនាហាម៉ាស ដែលមិនអាចកើតឡើងបានឡើយ សម្រាប់អ៊ីស្រាអែល។ នេះជាប្រសាសន៍សង្កត់ធ្ងន់បន្ថែមរបស់លោកនេតាន់យ៉ាហ៊ូ។
បើតាមលោកប្រមុខរដ្ឋាភិបាលអ៊ីស្រាអែលដដែល កងទ័ពTsahal អ៊ីស្រាអែលបានលាតសន្ធឹងប្រតិបត្តិការវាយលុកជើងគោកចូលក្នុងតំបន់ហ្កាហ្សា កាន់តែធំឡើងៗ មួយដំណាក់ម្តងៗ យ៉ាងខ្លាំងក្លានិងរំកិលទៅមុខ ប្រកបដោយយុទ្ធវិធីជានិច្ច។ បើតាមលោកនេតាន់យ៉ាហ៊ូ ប្រតិបត្តិការយោធាបានឈានចូលដល់ដំណាក់កាលប្រយុទ្ធទីបីហើយ។ តាំងពីថ្ងៃសុក្រទី ២៧តុលាមក អ៊ីស្រាអែលបានប្រញឹកបង្កើនប្រតិបត្តិការជើងគោក និងប្រតិបត្តិការវាយប្រហារផ្លូវអាកាសកាន់តែសន្ធាប់ខ្លាំង ក្នុងកម្មវត្ថុកម្ទេចចលនាហាម៉ាសប៉ាឡេស្ទីនឱ្យខ្ទេចសូន្យនិងរំដោះចំណាប់ខ្មាំងទាំងអស់ត្រលប់មកផ្ទះវិញ។ បើតាមប្រភពយោធាអ៊ីស្រាអែល មានចំណាប់ខ្មាំងម្នាក់ជាទាហានអ៊ីស្រាអែលភេទស្រីបានរំដោះរួច នៅក្នុងប្រតិបត្តិការនេះ។
ជាមួយនឹងការបដិសេធមិនឈប់បាញ់ លោកនាយករដ្ឋមន្ត្រីអ៊ីស្រាអែលបានជំរុញឱ្យសហគមន៍អន្តរជាតិជួយបង្ខិតបង្ខំចលនាហាម៉ាសឱ្យដោះលែងចំណាប់ខ្មាំងទាំងអស់ ភ្លាម និងដោយឥតលក្ខខណ្ឌ។ សហរដ្ឋអាមេរិកដែលជាសម្ព័ន្ធមិត្តដ៏ស្អិតល្មួត ក៏បានបញ្ជាក់ជំហរយល់ស្របនឹងអ៊ីស្រាអែលដែរនៅថ្ងៃម្សិលមិញថា ឈប់បាញ់លើតំបន់ហ្កាហ្សា មិនមែនជាដំណោះស្រាយសមស្របនឹងស្ថានការណ៍នៅពេលនេះទេ បើអាចគឺត្រឹមផ្អាកបាញ់មនុស្សធម៌មួយភ្លែត។
ប្រភពអាមេរិកមិនបញ្ចេញឈ្មោះថា ជំនួយមនុស្សធម៌បានទៅគនៅត្រឹមប៉ុស្តិព្រំដែនអេហ្ស៊ីបនិងហ្កាហ្សា តែតាំងពីថ្ងៃទី២១តុលាមក មានរថយន្តដឹកជំនួយមនុស្សធម៌តែ១១៧គ្រឿងប៉ុណ្ណោះអាចចូលទៅក្នុងតំបន់ហ្កាហ្សា ក្នុងខណៈដែលបើតាមអង្គការសហប្រជាជាតិគេត្រូវការជំនួយមនុស្សធម៌១០០ឡានក្នុងមួយថ្ងៃឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ