សង្គ្រាមហ្កាហ្សា៖ ចប់បទឈប់បាញ់ភ្លាម អ៊ីស្រាអែលនិងហាម៉ាសវាយប្រហារគ្នាវិញភ្លាម
កិច្ចព្រមព្រៀងឈប់បាញ់មនុស្សធម៌រវាងអ៊ីស្រាអែលនិងហាម៉ាសបានបិទបញ្ចប់នៅព្រឹកថ្ងៃសុក្រទី ១ធ្នូវេលាម៉ោង៥ព្រឹក។ គ្រាន់តែផុតភ្លាម យោធាអ៊ីស្រាអែលបានផ្តើមវាយប្រហារផ្លូវអាកាសនិងបាញ់កាំភ្លើងធំសំដៅលើតំបន់ហ្កាហ្សា។ ចំណែកយុទ្ធជនហាម៉ាសក៏ចាប់បាញ់រ៉ុកកែតមកលើអ៊ីស្រាអែលវិញដែរ។
ចុះផ្សាយនៅថ្ងៃ៖
ស្តាប់ - ០៣:០៥
ក្រុមអ្នកចរចាកាតាអេហ្ស៊ីបបន្តខ្នះខ្នែងសម្រុះសម្រួលរហូតដល់កណ្តាលយប់ដោយសង្ឃឹមថានឹងអាចបន្តកិច្ចព្រមព្រៀងឈប់បាញ់រវាងអ៊ីស្រាអែលនិងហាម៉ាសបានទៀត។ ក្រោយឮសេចក្តីអំពាវនាវនៅប៉ុន្មានម៉ោងមុនផុតកិច្ចព្រមព្រៀង របស់លោកប្រមុខការទូតអាមេរិកអង់តូនីប្លីងកិន ដែលកំពុងស្ថិតនៅក្រុងទែលអាវីល ចលនាហាម៉ាសបានឱ្យតម្រ៉ុយថាត្រៀមលក្ខណៈបន្តបទឈប់បាញ់។
ប៉ុន្តែចូលដល់ព្រឹកថ្ងៃសុក្រទី១ធ្នូ គ្រាន់តែផុតម៉ោងដែលមានចែងក្នុងបទឈប់បាញ់ភ្លាម លោកនាយករដ្ឋមន្ត្រីអ៊ីស្រាអែលនេតាន់យ៉ាហូបានថ្លែងចោទចលនាហាម៉ាសថាបានរំលោភបទឈប់បាញ់និងបានបង្ហោះគ្រាប់រ៉ុកកែតមកលើអ៊ីស្រាអែល។ នៅក្នុងសេចក្តីថ្លែងការណ៍អ្នកនាំពាក្យរដ្ឋាភិបាលរដ្ឋាភិបាលបានអះអាងថា អ៊ីស្រាអែលដាច់ខាតត្រូវតែសម្រេចកម្មវត្ថុសង្គ្រាមឱ្យបានគឺ ទៅដោះលែងចំណាប់ខ្មាំង កម្ទេចពួកចលនាហាម៉ាសនិងធ្វើឱ្យ ហ្កាហ្សាក្លាយជាតំបន់គ្មានការគំរាមកំហែងសម្រាប់អ៊ីស្រាអែល។
យោធាអ៊ីស្រាអែលវិញ បានផ្ញើសារតាមទូរស័ព្ទប្រាប់ប្រជាពលរដ្ឋរស់នៅក្នុងសង្កាត់ខ្លះនៃតំបន់ហ្កាហ្សា និងពលរដ្ឋរស់នៅក្នុងភូមិតាមបណ្តោយព្រំដែនជាមួយអ៊ីស្រាអែលខាងត្បូង ឱ្យចាកចេញជាបន្ទាន់ពីផ្ទះនិងគេចពីកន្លែងប្រយុទ្ធដោយសុវត្ថិភាព ព្រោះយោធាត្រូវចាប់ផ្តើមប្រតិបត្តិការយោធាដ្រូនហើយ។
ស្នូរគ្រាប់ចាប់ផ្ទុះ រដ្ឋាភិបាលហាម៉ាសប្រកាសភ្លាមថាមានជនប៉ាឡេស្ទីនយ៉ាងហោច៦នាក់បានស្លាប់ នៅក្នុងការវាយប្រហារអ៊ីស្រាអែលលើតំបន់Rafah និងសរុប៣២នាក់ បើរាប់ទូទាំងតំបន់ហ្កាហ្សា ដែលផ្សែងខ្មៅចាប់គ្របដណ្តប់ផ្ទៃមេឃឡើងវិញ។ ហើយពលរដ្ឋរាប់ពាន់នាក់នាំគ្នាសម្រុកធ្វើដំណើររត់ទៅជ្រកកោនក្នុងមន្ទីរពេទ្យ សាលារៀន ដែលក្លាយជាជំរំសម្រាប់ជ្រកកោនគេចពីគ្រាប់។ ប៉ុន្តែសម្រាប់ចលនាជីហាតអ៊ីស្លាមប៉ាឡេស្ទីន ចលនាប្រដាប់អាវុធមួយក្រុមទៀតនៅហ្កាហ្សា យោធាអ៊ីស្រាអែលគ្មានថ្ងៃសម្រេចកម្មវត្ថុកំណត់ពេលមុនឈប់បាញ់ ដោយផ្តើមសង្គ្រាមឡើងវិញទេ។
សូមបញ្ជាក់ថាបទឈប់បាញ់ពីថ្ងៃទី២៤វិច្ឆិកាដល់ថ្ងៃទី១ធ្នូវេលាម៉ោង៥ព្រឹក បានអនុញ្ញាតឱ្យមានការដោះលែងចំណាប់ខ្មាំងបាន៨០នាក់ ក្នុងនោះ៨នាក់នៅយប់មិញ ជាថ្នូរនឹងការព្រលែងអ្នកទោសប៉ាឡេស្ទីនពីពន្ធនាគារអ៊ីស្រាអែល២៤០នាក់។ ប៉ុន្តែកិច្ចព្រមព្រៀងមានលក្ខណៈផុយស្រួលខ្លាំង និងផ្តើមប្រេះខ្លាំងបន្ទាប់ពីហាម៉ាសចលនាភេរវនិយមសម្រាប់ក្រសែភ្នែកអាមេរិក អឺរ៉ុបនិងអ៊ីស្រាអែល បានបញ្ជាក់ថាជាអ្នករៀបចំធ្វើភេរវកម្មបាញ់សម្លាប់ជនអ៊ីស្រាអែលបីនាក់នៅក្រុងហ្សេរុយសាឡិម កាលពីថ្ងៃព្រហស្បតិ៍ទី៣០វិច្ឆិកា។
កាកបាទក្រហមអន្តរជាតិ អគ្គលេខាធិការអង្គការសហប្រជាជាតិ សុទ្ធតែបានសម្តែងការសោកស្តាយយ៉ាងខ្លាំងដែលសង្គ្រាមអ៊ីស្រាអែលនិងហាម៉ាសត្រូវចាប់ផ្តើមឡើងវិញនៅតំបន់ហ្កាហ្សា។ កាតាអន្តរការីនាំឱ្យសម្រេចកិច្ចព្រមព្រៀងឈប់បាញ់ដំបូង បានជំរុញឱ្យសហគមន៍អន្តរជាតិបញ្ចេញសកម្មភាពបន្ទាន់ ដើម្បីឱ្យបទឈប់បាញ់អាចបន្តបានជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ