ហ្កាហ្សា៖ អ៊ីស្រាអែលចង់ចរចាផ្អាកការប្រយុទ្ធ២ខែ ជាថ្នូរនឹងការដោះលែងចំណាប់ខ្មាំងទាំងអស់
កាលពីល្ងាចថ្ងៃចន្ទ យោងតាមការចុះផ្សាយ លើគេហទំព័រព័ត៌មានអនឡាញអាមេរិកមួយ គឺអ៊ីស្រាអែល បានស្នើចរចាជាមួយក្រុមហាម៉ាស ដើម្បីផ្អាកការប្រយុទ្ធរយៈពេល២ខែ ជាថ្នូរនឹងការរំដោះចំណាប់ខ្មាំងទាំងអស់មកវិញ។ ស្របពេលជាមួយគ្នានេះ គេសង្កេតឃើញថានៅថ្ងៃអង្គារទី២៣មករានេះ សង្គ្រាមនៅតំបន់ហ្កាហ្សា នៅតែបន្តយ៉ាងសកម្ម ដដែល។ ហើយកាលពីថ្ងៃចន្ទ អ៊ីស្រាអែលបានស្លាប់ទាហានចំនួន២៤នាក់ ក្នុងពេលតែមួយ។ ជាការបាត់បង់ដ៏ធ្ងន់ធ្ងរបំផុតសម្រាប់កងទ័ពអ៊ីស្រាអែល ដែលលោកនេតាន់យ៉ាហ៊ូ បានចេញបញ្ជាឲ្យស៊ើបអង្កេតជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
គេហទំព័រព័ត៌មាន Axios បានចុះផ្សាយថា អ៊ីស្រាអែលបានស្នើចរចាជាមួយក្រុមហាម៉ាស ដែលមានអេហ្ស៊ីបនិងកាតាជាអ្នកជួយសម្របសម្រួល។ អ្វីដែលអ៊ីស្រាអែលស្នើ គឺ ផ្អាកការប្រយុទ្ធជាបណ្តោះអាសន្នរយៈពេល២ខែ ហើយជាថ្នូរ ក្រុមហាម៉ាស ត្រូវតែប្រគល់ចំណាប់ខ្មាំងទាំងអស់មកវិញ ទាំងសាកសពចំណាប់ខ្មាំងដែលស្លាប់ និងទាំងចំណាប់ខ្មាំងដែលនៅរស់។
ផែនការដែលអ៊ីស្រាអែលបានស្នើ ក្នុងការដោះលែងចំណាប់ខ្មាំង គឺមានច្រើនដំណាក់កាល ដែលជាដំបូងគឺត្រូវដោះលែងចំណាប់ខ្មាំងជាកុមារ ភេទស្រី និងភេទប្រុសមានអាយុចាប់ពី៦០ឡើងទៅ។ បន្ទាប់មកទៀត គឺត្រូវដោះលែងចំណាប់ខ្មាំងជាទាហានភេទស្រី មនុស្សប្រុសអាយុក្រោម៦០ឆ្នាំ ទាហានភេទប្រុស មុននឹងប្រគល់សាកសពចំណាប់ខ្មាំង។ នៅក្នុងក្របខណ្ឌនៃផែនការនេះដែរ ក្រុមហាម៉ាស ត្រូវកំណត់ជាមុននូវចំនួនអ្នកទោសប៉ាឡេស្ទីន ដែលខ្លួនចង់ទាមទារឲ្យខាងអ៊ីស្រាអែលដោះលែង ទៅតាមដំណាក់កាលនីមួយៗ។
សូមបញ្ជាក់ថា យោងតាមការចុះផ្សាយនេះ គឺអ៊ីស្រាអែលមិនបានសន្យាបិទបញ្ចប់សង្គ្រាមជាស្ថាពរទេ គឺគ្រាន់តែផ្អាកការប្រយុទ្ធរយៈពេល២ខែតែប៉ុណ្ណោះ។ មិនទាន់មានការបញ្ជាក់ជាផ្លូវការណាមួយ ពីសំណាក់ រដ្ឋាភិបាលអ៊ីស្រាអែលទេ ទាក់ទិននឹងដំណឹងនេះទេ។ កាលពីថ្ងៃចន្ទ ក្នុងជំនួបមួយជាមួយក្រុមគ្រួសារចំណាប់ខ្មាំង លោកនេតាន់យ៉ាហ៊ូ បាននិយាយលើកឡើងថាអ៊ីស្រាអែលបានស្នើផែនការមួយ តែដោយបានបដិសេធថា មិនអាចនិយាយលំអិតបានទេ។
គួរកត់សំគាល់ថា សម្រាប់ពេលនេះ ការប្រយុទ្ធនៅតំបន់ភាគខាងត្បូងនៅតែបន្តយ៉ាងសកម្ម។ ការិយាល័យសម្របសម្រួលកិច្ចការមនុស្សធម៌នៃអង្គការសហប្រជាជាតិ បានថ្លែងការបារម្ភថា ការបាញ់ប្លោងខ្លាំងនៅជិតមន្ទីរពេទ្យ ក្នុងក្រុង Khan Younès ខាងត្បូងហ្កាហ្សា គឺជាគ្រោះថ្នាក់គំរាមអាយុជីវិតជនស៊ីវិលខ្លាំងណាស់។
កងទ័ពអ៊ីស្រាអែលបានអះអាងថា គេបានចូលទៅគ្រប់គ្រងទីតាំងបញ្ជាការដ្ឋានរបស់ក្រុមហាម៉ាស នៅក្រុង Khan Younès។ តែទន្ទឹមនឹងនេះ កងទ័ពអ៊ីស្រាអែល បានឲ្យដឹងថា កាលពីថ្ងៃចន្ទ ខ្លួនបានស្លាប់ទាហានចំនួន២៤នាក់ នៅក្នុងការវាយប្រហារមួយដោយគ្រាប់រ៉ូកែត របស់ពួកភេរវកម្មហាម៉ាស។ ជាការបាត់បង់ដ៏ធ្ងន់ធ្ងរបំផុត ក្នុងពេលតែមួយ ថ្ងៃតែមួយ។ បើគិតចាប់ពីសង្គ្រាមនៅហ្កាហ្សាបានផ្ទុះឡើងមក ដល់ពេលនេះ អ៊ីស្រាអែលបានស្លាប់ទាហានចំនួន២០០នាក់។
គួរបញ្ជាក់ដែរថា ថ្វីបើមានដំណឹងថារដ្ឋាភិបាលលោកនេតាន់យ៉ាហ៊ូ កំពុងចរចាផ្អាកការប្រយុទ្ធ តែលោកនេតាន់យ៉ាហ៊ូ បានបដិសេធ មិនទទួលយកដំណោះស្រាយរយៈពេលវែង ដែលជាដំណោះស្រាយបង្កើតរដ្ឋប៉ាឡេស្ទីនឯករាជ្យ។ កាលពីថ្ងៃចន្ទ រដ្ឋមន្ត្រីការបរទេសនៃប្រទេសសមាជិកអឺរ៉ុប បានជួបដាច់ដោយឡែកពីគ្នា ជាមួយរដ្ឋមន្ត្រីការបរទេសអ៊ីស្រាអែល និងប្រមុខការទូតប៉ាឡេស្ទីន តែបានត្រឹមតែស្តាប់ពាក្យប្រកែករបស់ភាគីអ៊ីស្រាអែលទាក់ទិននឹងការប្រកាសរដ្ឋប៉ាឡេស្ទីន។ លោក Josep Borrell ប្រមុខការទូតអឺរ៉ុប បានលើកឡើងថា គោលជំហររឹងរូសរបស់អ៊ីស្រាអែលនេះ គឺវានឹងចិញ្ចឹមកំហឹង ឲ្យគេឯងស្អប់គុំគួនអ៊ីស្រាអែលកាន់តែខ្លាំង ទៅថ្ងៃអនាគត ព្រមទាំងធ្វើឲ្យតំបន់ដើមបូព៌ា ត្រូវប្រឈមនឹងសង្គ្រាមឆាបឆេះរាលដាល ដោយសារតែកំហឹងរបស់អ៊ីរ៉ង់ រួមសហការជាមួយបក្សពួកដែលមានក្រុមហេសបូឡា និងក្រុមហ៊ូទីជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ