យន្តហោះដឹកអ្នកដំណើរនិងដ្រូនហៀបតែនឹងបុកគ្នានៅព្រលានយន្តហោះក្រុងប៉ារីស
គ្រោះថ្នាក់យន្តហោះត្រូវបានបញ្ចៀសផុតទាំងប្រផិតប្រផើយ នៅឯព្រលានយន្តហោះអន្តរជាតិក្រុងប៉ារីស ក្រោយពីយន្តហោះដឹកអ្នកដំណើរហៀបនឹងហោះបុកគ្នាជាមួយនឹងកូនយន្តហោះគ្មានមនុស្សបើក (ដ្រូន)។ នេះបើតាមការប្រកាសឲ្យដឹងរបស់ការិយាល័យស៊ើបអង្កេតគ្រោះថ្នាក់យន្តហោះរបស់បារាំង នៅថ្ងៃសុក្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
យោងតាមសេចក្តីប្រកាសព័ត៌មាន នៅលើវិបសៃត៍របស់ការិយាល័យស៊ើបអង្កេតគ្រោះថ្នាក់យន្តហោះ ដែលហៅកាត់ថា BEA (Bureau d’enquêtes et d’analyses) ហេតុការណ៍បានកើតឡើង តាំងពីថ្ងៃទី១៩កុម្ភៈកន្លងទៅ។
នៅពេលនោះ យន្តហោះដឹកអ្នកដំណើរធុនអ៊ែរប៊ូស A320 របស់ក្រុមហ៊ុនអ៊ែរហ្វ្រង់ស៍ ក្នុងជើងហោះហើរពីប្រទេសអេស្ប៉ាញ ហើយរៀបចុះចតនៅព្រលានយន្តហោះក្រុងប៉ារីស។ នៅពេលហោះចុះមកដល់រយៈកម្ពស់ប្រមាណជា ១ពាន់៦រយម៉ែត្រ អ្នកបើកបរយន្តហោះក៏ស្រាប់តែប្រទះឃើញដ្រូនមួយគ្រឿងហោះពីខាងឆ្វេងដៃតម្រង់មកយន្តហោះ ក៏ប៉ុន្តែ សំណាងល្អ អ្នកបើកបរយន្តហោះបានបើកគេចទាន់ ហើយអាចចុះចតដោយសុវត្ថិភាព។ បើយោងតាមការអះអាងរបស់អ្នកបើកបរយន្តហោះ ដ្រូននេះបានហោះ ក្នុងចម្ងាយតែប្រមាណជា ៥ម៉ែត្រប៉ុណ្ណោះ កាត់ពីក្រោមស្លាបយន្តហោះដឹកអ្នកដំណើរ។
ការិយាល័យស៊ើបអង្កេត BEA បានចាត់ទុកហេតុការណ៍នេះថាមានលក្ខណៈធ្ងន់ធ្ងរ ហើយបានប្រកាសបើកការស៊ើបអង្កេត ដើម្បីស្វែងរកការពិត និងវែកមុខម្ចាស់ដ្រូន។
គួរបញ្ជាក់ថា យោងតាមច្បាប់នៅក្នុងប្រទេសបារាំង ដ្រូនមិនត្រូវអនុញ្ញាតឲ្យហោះនៅក្បែរព្រលានយន្តហោះនោះទេ ហើយបើទោះបីជានៅក្រៅពីព្រលានយន្តហោះក៏គេមិនអាចបង្ហោះដ្រូនក្នុងរយៈកម្ពស់លើសពី ១៥០ម៉ែត្រពីដីបានដែរ។ ក៏ប៉ុន្តែ ហេតុការណ៍នៅព្រលានយន្តហោះក្រុងប៉ារីស គឺកើតឡើង នៅរយៈកម្ពស់ដល់ទៅ ១ពាន់៦រយម៉ែត្រ ពោលគឺខ្ពស់ជាងរយៈកម្ពស់ដែលច្បាប់អនុញ្ញាតរហូតដល់ទៅ១០ដងឯណោះ។
គេនៅចាំបានថា កាលពីខែមុននេះ សមាគមអាកាសចរណ៍ស៊ីវិលអន្តរជាតិ (International Air Transport Association) បានបង្ហាញនូវក្តីបារម្ភរបស់ខ្លួនថា ការរីកសាយភាយនៃការប្រើប្រាស់ដ្រូនដោយសាធារណជនទូទៅ កំពុងតែក្លាយជាការគំរាមកំហែងកាន់តែធំឡើង ដល់សុវត្ថិភាពនៃយន្តហោះដឹកអ្នកដំណើរ។
កាលពីឆ្នាំ២០១៤កន្លងទៅនេះ អាជ្ញាធរបារាំងក៏ជួបនឹងបញ្ហាឈឺក្បាលដោយសារដ្រូននេះមិនតិចដែរ ដោយនៅពេលនោះ គេសង្កេតឃើញមានជាញឹកញាប់ នូវហេតុការណ៍ដ្រូនហោះកាត់ពីលើមជ្ឈមណ្ឌលនុយក្លេអ៊ែរដែលជាតំបន់ហាមឃាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ