បារាំង៖ទស្សនកិច្ចមួយជុំតំបន់ដើមបូព៌ារបស់លោកប្រធានាធិបតីហ្រ្វង់ស័រ ហូឡង់
លោកប្រធានាធិបតីបារាំងហ្រ្វង់ស័រ ហូឡង់ផ្តើមដំណើរទស្សនកិច្ចមួយជុំតំបន់ដើមបូព៌ារយៈពេល ៤ថ្ងៃដោយចាប់ផ្តើមពីថ្ងៃសៅរ៍ ទី១៦ មេសានេះ។ លីបង់ជាប្រទេសដែលលោកហូឡង់ផ្តើមទស្សនកិច្ចមុនគេ បន្ទាប់មកនៅប្រទេសអេហ្ស៊ីប និងបញ្ចប់ទស្សនកិច្ចនៅក្នុងប្រទេសហ្សកដានី។ វិបត្តិជនភៀសខ្លួន និងយុទ្ធនាការប្រយុទ្ធប្រឆាំងនឹងអង្គការរដ្ឋអ៊ីស្លាម គឺជាប្រធានរឿងសំខាន់នៃទស្សនកិច្ចរបស់ប្រមុខរដ្ឋបារាំងនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០២:១៥
នៅក្នុងដំណើរទស្សនកិច្ចមួយជុំតំបន់ដើមបូព៌ារយៈពេល ៤ថ្ងៃ លោកប្រធានាធិបតីបារាំងហូឡង់ស្ថិតក្នុងទឹកដីលីបង់រយៈពេល ២ថ្ងៃ គឺថ្ងៃសៅរ៍ ទី១៦ និងថ្ងៃអាទិត្យ ទី១៧ មេសា។ ជម្រើសប្រទេសលីបង់មុនគេ ព្រោះជាប្រទេសដែលបានទទួលយកជនភៀសខ្លួនស៊ីរីឲ្យជ្រកកោណដល់ទៅ ១លាន ១សែននាក់ ពោលស្មើនឹង ១ភាគ៤នៃប្រជាជនស៊ីរីសរុប។ នៅលីបង់ លោកហូឡង់ទៅទស្សនាក្នុងជំរំជនភៀសខ្លួន និងផ្តល់ការគាំទ្រដល់រដ្ឋាភិបាលលីបង់ដែលកំពុងជួបវិបត្តិស្ថាប័នមកដល់សព្វថ្ងៃ ពិសេសវិបត្តិគ្មានប្រធានាធិបតីតាំងពីខែឧសភា ឆ្នាំ ២០១៤។ នៅ
ក្រៅពីគ្រោងចូលជួបលោកប្រធានរដ្ឋសភា លោកនាយករដ្ឋមន្រ្តី លោកហូឡង់ក៏គ្រោងជួបសន្ទនាជាមួយមន្រ្តីសាសនា និងបេក្ខជនប្រធានាធិបតីដែលកំពុងប្រជែងគ្នាចំនួន ២នាក់។ កម្មវិធីបន្ទាប់របស់លោកប្រមុខរដ្ឋបារាំង គឺផ្តល់ការគាំទ្រចំពោះកម្លាំងទ័ពលីបង់ដែលបានចុះហត្ថលេខាទិញគ្រឿងសព្វាវុធបារាំងក្នុងតម្លៃ ២ ២០០លានអឺរ៉ុបក្នុងខែមេសា ឆ្នាំ ២០១៥។ តែកុងត្រានោះត្រូវបានព្យួរ តាមសំណើរបស់ប្រទេសអារ៉ាប៊ីសាអូឌីតដែលជាអ្នកចេញលុយដោយប្រើប្រាក់ជំនួយ។
បន្ទាប់ពីលីបង់ លោកហូឡង់នឹងបន្តដំណើរទៅកាន់ប្រទេសអេហ្ស៊ីបក្នុងថ្ងៃទី១៧ និង ១៨ មេសា រួចបន្តទៅកាន់ប្រទេសហ្សកដានីនៅថ្ងៃទី១៩ មេសា។ ខុសពីប្រទេសលីបង់ ទស្សនកិច្ចរបស់លោកហូឡង់ដែលអមដំណើរដោយថៅកែក្រុមហ៊ុនបារាំងគ្រាក់ៗប្រមាណជា ៣០រូបនៅអេហ្ស៊ីប និងហ្សដានីមានគោលដៅសេដ្ឋកិច្ចច្រើនជាង ព្រោះលោកប្រមុខរដ្ឋបារាំងនឹងចូលរួមនៅក្នុងវេទិកាសេដ្ឋកិច្ច។ ក្រៅពីសេដ្ឋកិច្ច លោកហូឡង់នឹងលើកយកទៅជជែកជាមួយសមភាគីអេហ្ស៊ីបលោកអាល់ស៊ីស៊ីពីវិបត្តិលីប៊ី និងជម្លោះអ៊ីស្រាអែល ប៉ាឡេស្ទីន ហើយក៏នឹងអាចមានសំណុំរឿងសិទ្ធិមនុស្សនៅអេហ្ស៊ីបផងដែរ។
នៅហ្សកដានី លោកហូឡង់នឹងជួបសំណេះសំណាលជាមួយស្តេចអាប់ដាឡាទី២ និងធ្វើដំណើរទៅកាន់មូលដ្ឋានយោធាអាកាសស្ថិតប៉ែកឦសានទីក្រុងអាម៉ាន់។ នៅមូលដ្ឋានយោធាអាកាសនោះ គឺជាកន្លែងឡើង ចុះរបស់យន្តហោះចម្បាំងបារាំងនៅក្នុងប្រតិបត្តិការវាយប្រហារលើពួកជីហាតអង្គការរដ្ឋអ៊ីស្លាមនៅអ៊ីរ៉ាក់ និងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ