នាយិកាថ្មី CIA ប្តេជ្ញាចិត្តបញ្ចប់ការធ្វើទារុញកម្មជនជាប់សង្ស័យ ក្នុងពេលស៊ើបអង្កេតអំពើចារកម្ម
នាយិកាថ្មីនៃក្រសួងស៊ើបការណ៍សម្ងាត់ CIA បានបង្ហាញអំពីការប្តេជ្ញាចិត្ត ក្នុងការបញ្ឈប់ការស៊ើបអង្កេតករណីអំពើចារកម្មតាមរយៈការធ្វើទារណកម្មទៅលើជនជាប់សង្ស័យ តែលោកស្រីពុំបង្ហាញនូវការសោកស្ដាយចំពោះការរួមចំណែករបស់លោកស្រីក្នុងការធ្វើទារណកម្មលើជនជាប់សង្ស័យក្នុងរឿងភេរវកម្មទី១១កញ្ញាឆ្នាំ២០០១នៅអាមេរិកនោះទេ។
ចុះផ្សាយនៅថ្ងៃ៖
លោកស្រី Gina Haspel ដែលជានាយិកា CIA រង់ចាំការបោះឆ្នោតយល់ព្រមចុងក្រោយពីសំណាក់ព្រឹទ្ធសភា បានថ្លែងប្រាប់ទៅកាន់គណៈកម្មាធិការព្រឹទ្ធសភាអាមេរិកកាលពីថ្ងៃពុធថា លោកស្រីប្តេជ្ញាចិត្តយ៉ាងមុតមាំនិងច្បាស់លាស់ថា ក្រោមការដឹកនាំរបស់លោកស្រី CIA នឹងមិនចាប់ផ្តើមកម្មវិធីឃាត់ខ្លួននិងធ្វើទារណកម្មដើម្បីសួរចម្លើយនោះទេ។ លោកស្រីនឹងមិនអនុញ្ញាតអោយមានកម្មវិធីស៊ើបអង្កេតរបស់ភ្នាក់ងារចារកម្ម ដែលប្រើទារណកម្មលើជនជាប់សង្ស័យឡើយ បើទោះជាមានការបញ្ជាពីប្រធានាធិបតី លោកDonald Trump ក៏ដោយ។
លោកស្រីបានបន្ថែមទៀតថា ការសួរចម្លើយអាចជួយអោយរកឃើញព័ត៌មានដ៏មានតម្លៃសម្រាប់ការទប់ស្កាត់ការវាយប្រហារពិតមែន តែនោះមិនមែនបានន័យថាមកពីសួរចម្លើយដោយប្រើទារណកម្មនោះទេ។ លោកស្រីជឿថា ការធ្វើទារណកម្មមិនអាចជួយអ្វីបាននោះទេ។
ទោះជាយ៉ាងណាក្តី លោកស្រីពុំបង្ហាញនូវការសោកស្ដាយលើរឿងធ្វើទារណកម្មអ្នកជាប់ឃុំក្រោយរឿងវាយប្រហារអគារពាណិជ្ជកម្មអាមេរិកក្នុងឆ្នាំ២០០១នោះទេ។ លោកស្រីបានបដិសេធមិនដាក់ទោសចំពោះកម្មវិធីសួរចម្លើយឆ្នាំ ២០០២-២០០៥ ដែលក្នុងនោះមានជនសង្ស័យអាល់កៃដាជាច្រើនត្រូវបានគេចាប់យកទៅកន្លែងសម្ងាត់មួយចំនួននៅជុំវិញពិភពលោក ហើយត្រូវបានសួរចម្លើយយ៉ាងឃោរឃៅដូចជា ការបញ្ចូលទឹកយ៉ាងច្រើនទៅក្នុងដងខ្លួន ដែលធ្វើអោយមានសភាពដូចជាលង់ទឹក។
សមាជិកព្រឹទ្ធសភាខាងបក្សសាធារណរដ្ឋ លោក John MacCain ដែលធ្លាប់ទទួលរងនូវការធ្វើទារុណកម្ម ខណៈដែលជាប់ជាឈ្លើយសឹកសង្គ្រាមនៅវៀតណាមខាងជើង បានថ្លែងថា តួនាទីរបស់លោកស្រី Haspel ក្នុងការត្រួតពិនិត្យមើលការប្រើអំពើទារុណកម្មដោយជនជាតិអាមេរិក គឺគួរអោយព្រួយបារម្ភ ហើយការបដិសេធរបស់លោកស្រីក្នុងការទទួលស្គាល់អំពើអសីលធម៌នៃការធ្វើទារុញកម្មក្រោយភេរវកម្មឆ្នាំ២០០១គឺមិនសមហេតុផល។ លោក John MacCain ទំនងមិនបោះឆ្នោតអោយលោកស្រី Gina Haspel នោះទេ ហើយលោកជម្រុញអោយសមាជិកព្រឹទ្ធសភាផ្សេងទៀតបោះឆ្នោតបដិសេធការទទួលយកលោកស្រីធ្វើជានាយក CIA៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ