បារាំងផ្តើមយុទ្ធនាការជួយស្រោចស្រង់កិច្ចចរចាសន្តិភាពរវាងអ៊ីស្រាអែល និងប៉ាឡេស្ទីន
នៅថ្ងៃអាទិត្យ ទី១៥ ឧសភានេះ លោកប្រមុខការទូតបារាំងហ្សង់ម៉ាក អេរ៉ូបានផ្តើមទស្សនកិច្ចនៅក្នុងប្រទេសអ៊ីស្រាអែល និងដែនដីប៉ាឡេស្ទីន។ គោលដៅនៃទស្សនកិច្ចរបស់លោកអេរ៉ូនៅអ៊ីស្រាអែល និងនៅប៉ាឡេស្ទីន គឺដើម្បីជួយផ្តល់ឲ្យមានឡើងវិញនូវសន្ទុះកិច្ចចរចាសន្តិភាពរវាងភាគីជម្លោះទាំងពីរដែលកំពុងទ្រឹងមួយកន្លែង។ នៅក្នុងន័យនេះ បារាំងបាននិយាយប្រាប់ភាគីអ៊ីស្រាអែល និងប៉ាឡេស្ទីនពីគម្រោងរៀបចំកិច្ចប្រជុំអន្តរជាតិចំនួនពីរដែលបារាំងធ្វើជាម្ចាស់ផ្ទះ។ កិច្ចប្រជុំទី១ គ្រោងរៀបចំនៅថ្ងៃទី៣០ ឧសភា និងកិច្ចប្រជុំទី២ គ្រោងរៀបចំនៅចុងឆ្នាំ ២០១៦ នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៩
កិច្ចប្រជុំអន្តរជាតិនៅថ្ងៃទី៣០ ឧសភា និងនៅចុងឆ្នាំ ២០១៦ នេះមានគោលដៅជួយផ្តល់សន្ទុះឡើងវិញនូវកិច្ចចរចាស្វែងរកសន្តិភាពឲ្យអ៊ីស្រាអែល និងប៉ាឡេស្ទីនដែលកំពុងជាប់គាំងមួយកន្លែង។ កិច្ចប្រជុំដែលគ្រោងធ្វើនៅថ្ងៃទី៣០ ឧសភាខាងមុខ ជាកិច្ចប្រជុំថ្នាក់រដ្ឋមន្រ្តីការបរទេស និងដោយគ្មានវត្តមានភាគីប៉ាឡេស្ទីន និងអ៊ីស្រាអែល។ ចំណែកកិច្ចប្រជុំដែលគ្រោងធ្វើនៅដំណាច់ឆ្នាំ ២០១៦ ជាកិច្ចប្រជុំថ្នាក់ប្រមុខរដ្ឋ និងប្រមុខរដ្ឋាភិបាល ព្រមទាំងមានការអញ្ជើញភាគីអ៊ីស្រាអែល និងប៉ាឡេស្ទីនឲ្យចូលរួម។
កិច្ចប្រជុំនៅថ្ងៃទី៣០ ឧសភាខាងមុខនឹងមានប្រទេសជាង ២០ ចូលរួម ក្នុងនោះមានសហភាពអឺរ៉ុប អង្គការសហប្រជាជាតិ និងប្រទេសអារ៉ាប់មួយចំនួន។ អាមេរិកដែលជាតួអង្គឯកមិនអាចខ្វះបានសម្រាប់ដំណើរស្វែងរកសន្តិភាពឲ្យអ៊ីស្រាអែល និងប៉ាឡេស្ទីននៅមិនទាន់បានផ្តល់ចម្លើយចំពោះការអញ្ជើញរបស់បារាំងទេ។ នៅក្នុងដំណើរទៅកាន់ទឹកដីអ៊ីស្រាអែល និងប៉ាឡេស្ទីនថ្ងៃនេះ លោកប្រមុខការទូតបារាំងហ្សង់ម៉ាក អេរ៉ូបានជួបសន្ទនាជាមួយលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូ និងលោកប្រធានរដ្ឋអំណាចប៉ាឡេស្ទីនម៉ាមូដ អាបាស់។
នៅក្នុងជំនួបនោះ លោកអេរ៉ូបាននិយាយប្រាប់លោកនេតាន់យ៉ាហ៊ូ និងលោកអាបាស់អំពីកិច្ចប្រជុំអន្តរជាតិក្នុងគោលដៅជួយផ្តល់សន្ទុះកិច្ចចរចាសន្តិភាពអ៊ីស្រាអែល ប៉ាឡេស្ទីនដែលបារាំងកំពុងផ្តួចផ្តើមគំនិតធ្វើពេលនេះ។ ភាគីប៉ាឡេស្ទីនបានគាំទ្រចំពោះគំនិតផ្តួចផ្តើមរបស់បារាំង ហើយអ៊ីស្រាអែលបានប្រឆាំង តែនៅមិនទាន់ជាការប្រឆាំងផ្កាប់មុខនៅឡើយទេ ពោលមិនបដិសេធដាច់អហង្ការចំពោះវត្តមានខ្លួននៅក្នុងកិច្ចប្រជុំឡើយ។
អ៊ីស្រាអែលចង់បានកិច្ចចរចាទ្វេភាគី និងមិនទុកចិត្តបារាំង
អ៊ីស្រាអែល តាមរយៈលោកនាយករដ្ឋមន្រ្តីបិនយ៉ាមីន នេតាន់យ៉ាហ៊ូបានលើកយកហេតុផលចំនួនពីរទៅពន្យល់ដើម្បីបញ្ជាក់ពីការជំទាស់របស់ខ្លួនទៅនឹងគំនិតផ្តួចផ្តើមសន្តិភាពរបស់បារាំង។ ហេតុផលទី១ ត្រូវបានលោកនេតាន់យ៉ាហ៊ូរម្លឹកជាថ្មីថា ផ្លូវដែលអាចជួយផ្តល់សន្ទុះឡើងវិញនូវដំណើរស្វែងរកសន្តិភាពរវាងអ៊ីស្រាអែល ប៉ាឡេស្ទីនមានតែមួយគត់ គឺការអង្គុយចរចាទល់មុខគ្នាមួយទល់មួយរវាងអ៊ីស្រាអែល និងប៉ាឡេស្ទីនដោយគ្មានលក្ខខណ្ឌ។ នៅក្នុងន័យនេះ លោកនេតាន់យ៉ាហ៊ូបានបង្ហើបឲ្យដឹងថា លោកបានត្រៀមខ្លួនរួចជាស្រេចដើម្បីជួបចរចាជាមួយលោកប្រធានរដ្ឋអំណាចប៉ាឡេស្ទីនអាបាស់។
ចំណែកហេតុផលទី២ លោកនេតាន់យ៉ាហ៊ូបានសម្តែងភាពមិនសប្បាយចិត្តចំពោះបារាំងដែលបានបោះឆ្នោតគាំទ្រសេចក្តីសម្រេចចិត្តរបស់អង្គការ Unesco នាពេលថ្មីៗកន្លងទៅ។ គឺជាសេចក្តីសម្រេចចិត្តស្តីពីបេតិកភណ្ឌវប្បធម៌របស់ប៉ាឡេស្ទីន និងទីក្រុងហ្សេរ៉ុយសាឡិមប៉ែកខាងកើតរបស់ប៉ាឡេស្ទីន តែកំពុងកាន់កាប់ដោយអ៊ីស្រាអែល។ នៅក្នុងជំនួបជាមួយលោកប្រមុខការទូតបារាំងអេរ៉ូ លោកនេតាន់យ៉ាហ៊ូបានចាត់ទុកទង្វើរបស់បារាំងរបៀបនេះថាមានភាពលំអៀងកាន់ជើងប៉ាឡេស្ទីន។ នៅក្នុងន័យនេះ លោកនេតាន់យ៉ាហ៊ូបាននិយាយត្រង់ៗពីការមិនទុកចិត្តចំពោះគំនិតផ្តួចផ្តើមសន្តិភាពរបស់បារាំងពេលនេះ។
ជាការឆ្លើយតបវិញ លោកប្រមុខការទូតបារាំងអេរ៉ូបានសម្តែងការសោកស្តាយចំពោះការយល់ច្រឡំដែលឈានដល់ការមិនទុកចិត្តគ្នា និងថា ជំហររបស់បារាំងនៅតែដដែលមិនផ្លាស់ប្តូរទេទាក់ទងនឹងទីក្រុងហ្សេរ៉ុយសាឡិម ពោលជាទីកន្លែងសក្ការៈសម្រាប់សាសនាធំទាំង៣ គឺសាសនាជ្វីហ្វ សាសនាគ្រិស្ត និងសាសនាអ៊ីស្លាម។
តើគំនិតផ្តួចផ្តើមសន្តិភាពរបស់បារាំងពេលនេះអាចនឹងទទួលជោគជ័យដែរ ឬទេ?
ជម្លោះអ៊ីស្រាអែល និងប៉ាឡេស្ទីនជាជម្លោះមួយស្មុគស្មាញ និងសាំញាំ។ បារាំងមិនមែនជាភាគីទី១ ហើយក៏មិនមែនជាលើកទី១ដែលបានព្យាយាមស្វែងរកដំណោះស្រាយឲ្យជម្លោះដ៏យូរលង់ និងប្រវត្តិសាស្រ្តមួយនេះ។ មានប្រទេសមហាអំណាចច្រើនទៀត ពិសេសអាមេរិកបានប្រឹងប្រែងខ្លាំងណាស់ និងសឹងតែគ្រប់ប្រធានាធិបតីទាំងអស់តែងតែចាត់ទុករឿងមួយនេះជាអាទិភាពរបស់ខ្លួន តែទីបំផុតនៅតែគ្មានច្រកចេញដដែល។
ការដែលបារាំងបានចេញមុខលើកនេះមកពីទីក្រុងប៉ារីសយល់ឃើញជាឱកាសល្អមួយសម្រាប់ខ្លួន ព្រោះទី១ ចំពេលដែលអាមេរិកហាក់ដូចជាបំភ្លេចសំណុំរឿងនេះដោយរវល់ជាប់ដៃខ្លាំងនឹងរឿងផ្សេង ពិសេសវិបត្តិនៅស៊ីរី យេម៉ែន និងយុទ្ធនាការប្រឆាំងអង្គការរដ្ឋអ៊ីស្លាម ទី២ ចំពេលដែលកិច្ចចារទ្វេភាគីអ៊ីស្រាអែល និងប៉ាឡេស្ទីនកំពុងជាប់គាំងមួយកន្លែង និងទី៣ មកពីបារាំងយល់ថា ស្ថានការណ៍សព្វថ្ងៃរវាងអ៊ីស្រាអែល និងប៉ាឡេស្ទីនហាក់ដូចកំពុងតានតឹងខ្លាំងដែលនឹងអាចធ្លាក់ដុនដាបថែមទៀត។
អ្វីដែលបារាំងចង់បាន និងចង់ឃើញដូចអាមេរិកក៏ដូចជាសហគមន៍អន្តរជាតិទូទៅ គឺរដ្ឋឯករាជ្យពីរអ៊ីស្រាអែល និងប៉ាឡេស្ទីនរស់ក្បែរខាងគ្នា តែបារាំងបានយល់ច្បាស់ថា វាមិនមែនជារឿងងាយស្រួលទេ ព្រោះអ្វីៗក៏ត្រូវអាស្រ័យផងដែរលើឆន្ទៈរបស់អ៊ីស្រាអែល និងប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ