បារាំងក្លាយជាជើងឯកបាល់ទាត់ពិភពលោកជាលើកទី២
បារាំង ក្លាយជាជើងឯកបាល់ទាត់ពិភពលោក ឆ្នាំ២០១៨។ ក្រុមជម្រើសជាតិបារាំង បានប្រកួតយកឈ្នះក្រុមកីឡាករក្រូអាស៊ី ៤គ្រាប់ទល់នឹង២ នៅវគ្គផ្តាច់ព្រ័ត្រនៃការប្រកួតបាត់ទាត់ពិភពលោក ដែលប្រព្រឹត្តទៅក្នុងប្រទេសរុស្ស៊ី។ គួររម្លឹកថា បារាំងបានឈ្នះបាល់ទាត់ពិភពលោក លើកទី១ កាលពីឆ្នាំ១៩៩៨។ មកដល់ពេលនេះគឺគម្រប់ខួប២០ឆ្នាំគត់ ដែលបារាំងបានឈ្នះជើងឯកបាល់ទាត់ពិភពលោកជាថ្មីម្តងទៀត។ ប្រជាពលរដ្ឋបារាំងទូទាំងប្រទេស កំពុងតែសប្បាយត្រេកអរនឹងជោគជ័យថ្មី ជាលើកទី២នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៥
នៅ Champs de Mars កៀកជាប់នឹង Tour Eiffel ក្នុងទីក្រុងប៉ារីស មានអ្នកគាំទ្រកកកុញ ប្រមាណជិត១០ម៉ឺននាក់ កាលពីរសៀលថ្ងៃអាទិត្យ បើតាមទិន្នន័យពីអាជ្ញាធរ។ បើនិយាយចំពោះតែកន្លែង Champs de Mars នេះ អាជ្ញាធរក្រុងប៉ារីសបានដាក់អេក្រង់ដ៏មួយ ទំហំជាង១០០ម៉ែត្រការ៉េ ជិត Tour Eiffel តែម្តង ហើយក៏មានអេក្រង់ពីរផ្សេងទៀត ទំហំជាង៦០ម៉ែត្រការ៉េ។
អ្នកគាំទ្រក្រុមជម្រើសជាតិបារាំង បានមកប្រមូលផ្តុំគ្នានៅទីនេះ យ៉ាងណែនស្ទើរតែរកកន្លែងដើរគ្នា គឺតាំងពីរម៉ោង១២ ឬ១រសៀលមកម្ល៉េះ។ ពោលគឺពួកគេបានមកឈររង់ចាំមើលការផ្សាយបន្តផ្ទាល់តាំងតែពី៤ ទៅ៥ម៉ោងមុនការប្រកួតឈានមកដល់។ អុ្នកគាំទ្រ ភាគច្រើនលើសលុប គឺឈរ ប្រជ្រៀតគ្នាយ៉ាងណែន តែពួកគេពោរពេញដោយក្តីសប្បាយរីករាយ និងស្រែកហោទ្រហឹងអឺងអាប់ទៀតផង។ អ្នកខ្លះគ្រវីទង់ជាតិដែលមានបីពណ៌ខៀវសក្រហម។ ចំណែកអ្នកខ្លះទៀតគូសមុខជាសញ្ញារូបសត្វមាន់គក តំណាងឲ្យក្រុមជម្រើសជាតិបារាំង ជាដើម។ ក្នុងចំណោមអ្នកគាំទ្រ ភាគច្រើន គឺស្លៀកពាក់សុទ្ធតែពណ៌ខៀវ។ តែក៏មានដែរ អ្នកស្លៀកពាក់ ក្រហម ឬស តែបើគេមើលទៅ ឃើញថាសម្បូរពណ៌ខៀវច្រើនជាង។
អ្នកផ្សេងទៀតច្រៀងចម្រៀងជាតិបារាំងបណ្តើរ និងយកដៃបាំងថ្ងៃបណ្តើរ។ ឈរក្រោមកម្តៅថ្ងៃប្រមាណជា៣០អង្សារ នារដូវក្តៅ ប៉ុន្តែស្ទើរតែគ្មាននរណាស្រែកថ្ងូរឡើយ។ ផ្ទុយទៅវិញ គេនាំគ្នាយកទង់ជាតិបារាំង មកចងរុំខ្លួន។ ក៏ប៉ុន្តែ ដើម្បីកាត់បន្ថយកម្តៅ អាជ្ញាធរប៉ូលីសបានបាញ់ទឹកដាក់អ្នកគ្រាំ ពួកគេក៏រឹតែស្រែកសប្បាយថែមទៀត។
គ្រាន់តែនាឡិកាបង្ហាញនាទីថាចូលដល់ម៉ោង៥ភ្លាម ម៉ោងនៅស្រុកបារាំង មនុស្សចាប់ផ្តើមហោកញ្ជ្រៀវឡើងតែម្តង។ ពួកគេស្រែកត្រេកអរជាខ្លាំង នៅពេលដែលបានឃើញក្រុមជម្រើសជាតិ កំពុងតែដើរចូលទីលានប្រកួត។
ការប្រកួតរវាងក្រូអាស៊ីនិងបារាំង គឺមានភាពស្វិតស្វាញតាំងតែពីដើមទីមកម្លេះ ស្រាប់តែនៅនាទី ជាង២០ បារាំងបានស៊ុតបញ្ជូលទីរបស់ក្រូអាស៊ីមួយគ្រាប់! នេះគឺបានបង្កការស្រែកហោយ៉ាងកងរំពង។ អ្នកខ្លះបានឱបរឹតគ្នាដោយក្តីអំណរចំពោះប្រជាជាតិបារាំង។
ការប្រកួតរំកិលទៅមុខបន្ត ក្នុងនាទីជាង៣០ ស្រាប់តែក្រុមជម្រើសជាតិក្រូអាស៊ី ស៊ុតចូលទីរបស់បារាំងមួយគ្រាប់វិញ។ ម្តងនេះ ហ្វូងមនុស្សទូទៅ ស្ងាត់ឲ្យជ្រៀប ខ្លះឈរតែក្រវីក្បាលហួសចិត្ត។ ការប្រកួតចេះតែអូសបន្លាយទៅ បារាំងបានទាត់ចូល ៤គ្រាប់ ហើយក្រូអាស៊ី ទាត់ចូលទីបានតែ២គ្រប់ប៉ុណ្ណោះ។ នៅកៀកនឹងម៉ោងបញ្ចប់មែនទែន ពលរដ្ឋអ្នកគ្រាំទ្រ នៅជិតទួរអែហ្វហ្វេល បានស្រែកហោរន្ថើនជាថ្មី ថ្វីត្បិតមានជំនឿចិត្តថា ប្រទេសខ្លួនឈ្នះ។ គេស្រែកបន្ទរគ្នាថា On est champion! On est champion! ប្រែថា «យើងជាជើកឯក! យើងជាជើកឯក!»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ