ប្រេស៊ីល៖កៅអីប្រធានាធិបតីរបស់លោកស្រីឌីលម៉ា រូសែហ្វនៅសល់តែជើង ២
នៅក្នុងប្រទេសប្រេស៊ីល បន្ទាប់ពីការបោះឆ្នោតភ្លើងខៀវនៅក្នុងសភានាថ្ងៃអាទិត្យ ទី១៧ មេសា នីតិវិធីទម្លាក់លោកស្រីប្រធានាធិបតីឌីលម៉ា រូសែហ្វបានធ្លាក់ក្នុងដៃព្រឹទ្ធសភាដែលជាដំណាក់កាលចុងក្រោយ។ តាមគម្រោង ដំណើរការបោះឆ្នោតនៅព្រឹទ្ធសភានឹងត្រូវចាប់ផ្តើមពីថ្ងៃទី១១ ឧសភាខាងមុខ។ ពេញមួយថ្ងៃអាទិត្យ ទី១៧ មេសា ប្រទេសប្រេស៊ីលបានធ្លាក់ក្នុងស្ថានការណ៍នយោបាយដ៏អាប់អួរ ដោយនៅម្ខាង គឺការបោះឆ្នោតដ៏ប្រទាញប្រទង់នៅក្នុងសភា និងនៅម្ខាងទៀត គឺបាតុកម្មនៅតាមផ្លូវរបស់សកម្មជនប្រឆាំងលោកស្រីឌីលម៉ា និងសកម្មជនគាំទ្រលោកស្រីឌីលម៉ា។ នៅថ្ងៃចន្ទ ទី១៨ មេសានេះ លោកស្រីឌីលម៉ាថ្លែងទៅកាន់ពលរដ្ឋប្រេស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥២
ការដែលសភាបានបោះឆ្នោតគាំទ្រឲ្យមានការទម្លាក់លោកស្រីប្រធានាធិបតីឌីលម៉ា រូសែហ្វជារឿងដែលគេបានរង់ចាំ ព្រោះថា ពិតមែនតែគណបក្សពលកររបស់លោកស្រីឌីលម៉ាមានសម្លេងភាគច្រើនដាច់ខាតនៅក្នុងសភាក៏ដោយ ក៏គេបានកត់សម្គាល់ឃើញជាទូទៅថា មានអ្នកតំណាងរាស្រ្តបក្សកាន់អំណាចជាច្រើនបានបោះឆ្នោតឲ្យមានការទម្លាក់លោកស្រីឌីលម៉ាចេញពីអំណាច។ តើទង្វើរបស់អ្នកតំណាងរាស្រ្តនៃបក្សកាន់អំណាចរបៀបនេះមិនមែនជាទង្វើក្បត់ទេ ឬយ៉ាងណា?។ បើគេមើលមួយភ្លែតទៅឃើញថា នេះជាទង្វើក្បត់ដែលគណបក្សមិនអាចអត់ឱនឲ្យបានទេ តែបើគេពិនិត្យឲ្យបានស៊ីជម្រៅបន្តិចទៅឃើញថា វិបត្តិទាក់ទងនឹងលោកស្រីឌីលម៉ាបានធ្លាក់ចូលក្នុងរណ្តៅមួយយ៉ាងជ្រៅដែលគេមិនអាចស្រង់បាន ពិសេសគឺសម្ពាធរបស់ពលរដ្ឋប្រេស៊ីល។
ជាក់ស្តែងនាពេលបោះឆ្នោតនៅក្នុងសភាកាលពីថ្ងៃអាទិត្យ ទី១៧ មេសា គេសង្កេតឃើញមានវត្តមានពលរដ្ឋប្រេស៊ីលជាច្រើនម៉ឺននាក់បានចុះផ្លូវស្រែកទាមទារឲ្យលោកស្រីឌីលម៉ាចុះចេញពីតំណែង។ សម្រែករបស់បាតុករប្រេស៊ីលមិនមែនទើបតែកើតមាននៅក្នុងថ្ងៃដែលសភាបោះឆ្នោតនោះទេ តែបានកើតមានជាច្រើនដងកន្លងមក និងមានបាតុករប្រេស៊ីលរហូតដល់លាននាក់។ តែលោកស្រីឌីលម៉ាបន្តក្រាញ និងបានប្តេជ្ញាតស៊ូរហូតដល់នាទីចុងក្រោយដោយប្រកាន់ទ្រឹស្តីថា រឿងចុះចេញខ្លួនឯងដោយស្ម័គ្រចិត្ត គឺអត់ទេ។
សន្លឹកបៀរចុងក្រោយស្ថិតក្នុងដៃព្រឹទ្ធសភា
មួយថ្ងៃ បន្ទាប់ពីភ្លើងខៀវរបស់សភា សមាជិកព្រឹទ្ធសភាទាំង ៨១រូបផ្តើមជជែកពិភាក្សាលើនីតិវិធីទម្លាក់លោកស្រីឌីលម៉ានៅថ្ងៃចន្ទ ទី១៨ មេសា។ ការបោះឆ្នោតនៅព្រឹទ្ធសភានឹងត្រូវធ្វើឡើងជា ២ដំណាក់កាល ទី១ គឺការបោះឆ្នោតដោយយកសម្លេង ៥០បូក ១ ដែលគ្រោងនឹងរៀបចំនៅថ្ងៃទី១១ ឧសភា និងដំណាក់កាលទី២ ចុងក្រោយ គឺការបោះឆ្នោតដោយត្រូវការសម្លេងគាំទ្រចំនួន ២ភាគ៣ ដែលគ្រោងនឹងរៀបចំចាប់ពីពាក់កណ្តាលខែឧសភា។
បើការបោះឆ្នោតនៅដំណាក់កាលទី១ មិនទទួលបានសម្លេងគាំទ្រ ៥០បូក១ ទេ នីតិវីធីទម្លាក់លោកស្រីឌីលម៉ានឹងកប់ចោលត្រឹមនេះ ហើយលោកស្រីឌីលម៉ានឹងត្រូវកាន់តំណែងរហូតដល់ចប់អាណត្តិនៅឆ្នាំ ២០១៨។ តែបើមានសម្លេង ៥០បូក១ នៅក្នុងការបោះឆ្នោតនាដំណាក់កាលទី១ លោកស្រីឌីលម៉ានឹងត្រូវគេព្យួរតំណែងរយៈពេលច្រើនបំផុតចំនួន ១៨០ថ្ងៃ ដោយរង់ចាំការបោះឆ្នោតផ្តាច់ព្រ័ត្រក្នុងដំណាក់កាលទី២។ ក្នុងករណីមានការព្យួរតំណែងលោកស្រីឌីលម៉ារយៈពេល ១៨០ថ្ងៃ គឺលោកអនុប្រធានាធិបតី Michel Temer ជាអ្នកកាន់ជំនួស។
ចំណែកការបោះឆ្នោតសម្រាប់ដំណាក់កាលទី២ នៅព្រឹទ្ធសភានឹងធ្វើឡើងក្រោមការដឹកនាំរបស់ប្រធានតុលាការកំពូល។ បើនីតិវិធីទម្លាក់លោកស្រីឌីលម៉ាទទួលបានសម្លេងគាំទ្រ ២ភាគ៣ នៅដំណាក់កាលទី២ តំណែងលោកស្រីឌីលម៉ានឹងត្រូវចប់ជាស្ថាពរ ហើយលោកអនុប្រធានាធិបតី Michel Temer នឹងឡើងជំនួសកន្លែងលោកស្រីឌីលម៉ារហូតដល់មានការរៀបចំបោះឆ្នោតសភា និងប្រធានាធិបតីក្នុងឆ្នាំ ២០១៨។
នីតិវិធីទម្លាក់ប្រធានាធិបតីតាមផ្លូវសភាទាំងពីរជាការគំរាមកំហែងលទ្ធិប្រជាធិបតេយ្យ?
បើតាមមើលទៅ លោកស្រីឌីលម៉ាប្រហែលជាធ្លាក់ពីអំណាចដោយមិនអាចគេចផុត។ សូម្បីតែរូបលោកស្រីឌីលម៉ាខ្លួនឯងក៏បានដឹងយ៉ាងច្បាស់ថា អ្វីៗបានឈានចូលដល់ទីបញ្ចប់ហើយ។ គួររម្លឹកជូនឡើងវិញបន្តិចថា ករណីដែលបាន និងកំពុងកើតមានលើលោកស្រីឌីលម៉ា រូសែហ្វពេលនេះមិនមែនជាករណីលើកទី១ នៅប្រេស៊ីលទេ។ ករណីនេះធ្លាប់បានកើតមានម្តងក្នុងឆ្នាំ ១៩៩២ លើរូបលោកប្រធានាធិបតីប្រេស៊ីល Fernando Collor de Mello។ កាលណោះ លោក Mello ត្រូវបានគេទម្លាក់ពីអំណាចតាមនីតិវិធីនៅសភាទាំងពីរ។
ដូច្នេះ ករណីលោកស្រីឌីលម៉ាមិនមែនជារឿងថ្មីទេ តែសំណួរដែលគ្រប់គ្នាកំពុងចោទសួរពេលនេះគឺថា តើទង្វើរបៀបនេះមិនមែនជារដ្ឋប្រហារស៊ីវិលទេ ឬយ៉ាងណា និងថា តើនិតីវិធីរបៀបនេះមិនមែនជាការគំរាមកំហែងលទ្ធិប្រជាធិបតេយ្យទេ ឬយ៉ាងណា?។ គេមិនអាចផ្តល់ចម្លើយជាលក្ខណៈទូទៅសម្រាប់គ្រប់ប្រទេសបានទេ ព្រោះវាអាស្រ័យលើច្បាប់រដ្ឋធម្មនុញ្ញរបស់ប្រទេសនីមួយៗ។ ម្យ៉ាងទៀត រូបប្រធានាធិបតីជាមនុស្សដែលមិនមែនធ្វើអ្វីសុទ្ធតែត្រូវ និងធ្វើអ្វីសុទ្ធតែគ្រប់គ្នាពេញចិត្តទាំងអស់ឡើយ ពោលតែងតែមានកំហុសឆ្គង។
តែចំណោតនៅត្រង់ថា លោកស្រីឌីលម៉ាដែលបានជាប់ឆ្នោតដោយការបោះឆ្នោតរបស់ពលរដ្ឋប្រេស៊ីលបែរជាកំពុងទទួលរងការទម្លាក់ពីអំណាចរបស់សភាទាំងពីរទៅវិញ។ នៅត្រង់ចំណុចនេះមានការលើកឡើងថា ជាការគំរាមកំហែងលទ្ធិប្រជាធិបតេយ្យ ព្រោះចង់ ឬមិនចង់ ប្រធានាធិបតីប្រេស៊ីលរូបណាក៏ដោយដែលជាប់ឆ្នោតដោយប្រជាជនក៏អាចនឹងប្រឈមការទម្លាក់ពីអំណាចគ្រប់ពេល។ អ្វីដែលជាការបារម្ភ គឺខ្លាចតែទង្វើរបៀបនេះត្រូវបានអ្នកនយោបាយយកទៅប្រើដើម្បីសងសឹកទម្លាក់គ្នាពីអំណាច។ តែបើទម្លាក់ដោយសារតែក្បត់ជាតិ ឬមួយក៏មិនបានបំពេញតួនាទីត្រឹមត្រូវរបស់ខ្លួន គឺជារឿងល្អ។
ករណីលោកស្រីឌីលម៉ា រូសែហ្វមានអាយុ ៦៨ឆ្នាំដែលប្រជាប្រិយភាពមានតាំងពីជិត ៨០% ធ្លាក់ដល់ ១០% កំពុងជាប់ចោទលើករណីមួយចំនួន ពិសេសទាក់ទិននឹងរឿងអាស្រូវពុករលួយនៅក្នុងក្រុមហ៊ុនប្រេងឥន្ធនៈរបស់រដ្ឋឈ្មោះ ប៉េត្រូប្រា (Petrobras) និងភាពគ្មានតម្លាក្នុងការគ្រប់គ្រងថវិកាជាតិឆ្នាំ ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ