លោកពូទីន ៖ សេដ្ឋកិច្ចរុស្ស៊ីបានឆ្លងផុតពីចំណុចកំពូលនៃវិបត្តិហើយ
នៅថ្ងៃព្រហស្បតិ៍ ទី១៧ធ្នូនេះ លោកប្រធានាធិបតីរុស្ស៊ី ពូទីន បានបើកធ្វើសន្និសីទសារព័ត៌មានប្រចាំឆ្នាំ ដែលក្លាយជាប្រពៃណីទៅហើយ តាំងពីឆ្នាំ២០០១ មក សម្រាប់សម្គាល់អំណាចរបស់គាត់។ ក្នុងសន្និសីទសារព័ត៌មានលើកនេះ ជាលើកទី ១១ ហើយដែលមានអ្នកកាសែតជាតិនិងបរទេស ចូលរួមច្រើនពុំធ្លាប់មាន គឺដល់ទៅ ១៣៩០នាក់។ ចំណុចសំខាន់ដំបូងបង្អស់ ដែលលោកពូទីនលើកឡើង ក្នុងសន្និសីទព័ត៌មាននេះ គឺទាក់ទងនឹងសេដ្ឋកិច្ចរបស់រុស្ស៊ី។
ចុះផ្សាយនៅថ្ងៃ៖
តាមការពន្យល់បំភ្លឺរបស់លោកពូទីន ដោយហេតុថាសេដ្ឋកិច្ចរុស្ស៊ី អាស្រ័យភាគច្រើន នឹងចំណូលបានមកពីការលក់ ធនធានធម្មជាតិ ជាបឋម គឺប្រេង និងឧស្ម័ន ព្រមទាំងផលិតផល ធ្វើពីវត្ថុធាតុដើមទាំងនេះ បានជាសម្រាប់ឆ្នាំ ២០១៥នេះ រុស្ស៊ីបានយោងទៅលើ ព្យាករណ៍ ធ្វើ តាំងពីដើមឆ្នាំ២០១៤ អំពីតម្លៃប្រេងឆៅ ក្នុងកម្រិត ១០០ដុល្លារក្នុង ១បារីល (ទំហំ ១៥៩ លីត្រ)។ ក្រោយមក រុស្ស៊ីបានបង្ខំចិត្ត បន្ទាបតម្លៃប្រេងនេះ ជា២ដង មកនៅត្រឹម ៥០ ដុល្លារ។ រួចឥឡូវ ស្ថានការណ៍ដែលមានជាក់ស្តែង គឺក្នុង១ធុង តម្លៃតែ ម្តុំ ៣៧-៣៨ដុល្លារ។
ដោយមកពីមូលហេតុនេះ ផលិតផលសរុបក្នុងស្រុក ហៅកាត់ថា GDP របស់រុស្ស៊ី ស្រាប់តែ ធ្លាក់អស់ ៣,៧% ហើយអតិផរណា គិតមកទល់ថ្ងៃ១៣ធ្នូកន្លងទៅ គឺស្ទុះដល់ ១២,៣% ហើយតាមការប្រមាណឃើញនៃ ក្រសួងអភិវឌ្ឍន៍សេដ្ឋកិច្ច ទៅទល់ដំណាច់ឆ្នាំ២០១៥នេះ នឹងកើនឡើងដល់ជិត ១៣%។
ដូច្នេះ តម្លៃប្រេង ដែលមានគ្រោងទុកទៅហើយ សម្រាប់ថវិកាឆ្នាំ ២០១៦ មុខជានឹងត្រូវ រងទទួល ការកែប្រែពុំខាន។
អំពីឧនភាពថវិកាឆ្នាំ២០១៥នេះ ប្រមុខរដ្ឋរុស្ស៊ី និយាយថា វានឹងមានកម្រិត ម្តុំ ២,៨-២,៩% នៃ GDP ប្រទេស។ ទ្រនិចលេខនេះ តាមប្រសាសន៍លោកពូទីន គឺសក្តិសមនឹងទទួលយកបាន។ តួលេខផ្សេងទៀតនៃ ម៉ាក្រូសេដ្ឋកិច្ច បែបយ៉ាង កម្រិតមនុស្សអត់ការធ្វើ ត្រូវបានទ្រទ្រង់ ឲ្យនៅ ត្រឹម ៥,៦% ដដែល ដែលតាមសម្តីលោកពូទីន គឺជាគុណូការ របស់រដ្ឋាភិបាលរុស្ស៊ីតែម្តង។
មិនតែប៉ុណ្ណោះ ទោះបី សេដ្ឋកិច្ចរុស្ស៊ី បន្តស្ថិតនៅក្រោមសម្ពាធនៃទណ្ឌកម្មបស្ចិមលោកក្តី ក៏ ទំហំផ្តោះប្តូរពាណិជ្ជកម្មក្រៅប្រទេសរបស់រុស្ស៊ី ក្នុងឆ្នាំ២០១៥នេះ មានស្ថានភាពល្អដដែល គឺថា ទំហំនាំចេញ លើសពីទំហំនាំចូល ដល់ទៅ១៣% បើប្រៀបទៅនឹងឆ្នាំ២០១៤។
តបនឹងសំនួរ តើគួរផ្លាស់ប្តូររដ្ឋាភិបាលសព្វថ្ងៃ ក្រោមការដឹកនាំរបស់លោកនាយករដ្ឋមន្ត្រី ឌ្មីទ្រី មេដវេដេវ ឬទេ លោកប្រធានាធិបតីពូទីន ថ្លែងថា គាត់មិនមែន ជាបក្សពួក ខាងរុញ ប្រទេសជាតិ ឲ្យធ្លាក់ក្នុងភាពច្របូកច្របល់ឡើយ ជាពិសេស តាមយោបល់គាត់ រដ្ឋាភិបាលនេះ ដំណើរការ គឺ ប្រកបដោយផ្លែផ្កាទេតើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ