រុស្ស៊ី និង តួកគី វិះតែនឹងប៉ះទង្គិចគ្នាម្តងទៀត នៅលើសមុទ្រ
ភាពតានតឹងរុស្ស៊ី និងតួកគីហាក់មិនថយចុះ គឺមានតែកាន់តែខ្លាំងឡើង នៅក្រោយតួកគីបាញ់ទម្លាក់យន្តហោះចម្បាំងរុស្ស៊ី។ នៅថ្ងៃអាទិត្យ ទី ១៣ធ្នូ ក្រសួងការពារជាតិរុស្ស៊ីបានកោះហៅជាបន្ទាន់ មន្រ្តីយោធាតួកគីប្រចាំទីក្រុងម៉ូស្គូ បន្ទាប់ពីនាវាចម្បាំងរុស្ស៊ីវិះតែនឹងបើកបុកគ្នាជាមួយកប៉ាល់នេសាទតួកគី នៅសមុទ្រ Egéeតំបន់មេឌីទែរ៉ាណេ។
ចុះផ្សាយនៅថ្ងៃ៖
ស្តាប់ - ០២:០០
ឧប្បត្តិហេតុនេះបានកើតឡើង នៅពេលកប៉ាល់ចម្បាំងរុស្ស៊ី បោះយុថ្កាក្បែរកូនកោះក្រិកឈ្មោះ Lemnos ក្នុងសមុទ្រ Egée។ សេចក្តីថ្លែងការណ៍របស់ក្រសួងការពារជាតិរុស្ស៊ី នាវិកលើកប៉ាល់ចម្បាំងរុស្ស៊ីSmetlivy កាលពីថ្ងៃអាទិត្យ បានសង្កេតឃើញកប៉ាល់នេសាទតួកគីមួយ ដែលស្ថិតនៅប្រមាណ មួយគីឡូម៉ែត្រ បានបើកលឿនស្លេវ តម្រង់កប៉ាល់រុស្ស៊ី។
តាមក្រសួងការពារជាតិរុស្ស៊ី ដោយសារតែកប៉ាល់នេសាទតួកគីមិនឆ្លើយអ្វីទាំងអស់ក្នុងវិទ្យុ ទាក់ទង កប៉ាល់រុស្ស៊ី បានប្រើអាវុធធុនតូច បាញ់សំដៅ ទូកនេសាទ តួកគី រហូតដល់ទូកតួកគីត្រូវប្តូរទិសដៅ បើកបញ្ជៀស ចេញ យ៉ាងប្រថុចញ៉ុក ពីកប៉ាល់ចម្បាំងរុស្ស៊ី។
នៅក្រោយព្រឹត្តិការណ៍ថ្ងៃអាទិត្យ ក្រសួងការពារជាតិរុស្ស៊ី បានកោះហៅបន្ទាន់មន្រ្តីយោធាតួកគី នៅម៉ូស្គូឲ្យចូលឆ្លើយបំភ្លឺ។ រហូតមកដល់ល្ងាចថ្ងៃអាទិត្យ រដ្ឋាភិបាលតួកគីនៅមិនទាន់ចេញមុខនិយាយពីឧប្បត្តិហេតុនេះនៅឡើយទេ។
នៅលើសមុទ្រ កប៉ាល់ចម្បាំងរុស្ស៊ី និងតួកគីបានជៀសផុត រួចពីគ្រោះថ្នាក់បើកបុកគ្នា។ ប៉ុន្តែ គឺនៅលើអាកាស ដែលតួកគី និងរុស្ស៊ី កំពុងមានបញ្ហាជាមួយគ្នា។ ម៉ូស្គូ និងអង់ការ៉ាកំពុងមានវិបត្តិការទូតជាមួយគ្នា យ៉ាងធ្ងន់ធ្ងរ បន្ទាប់ពីតួកគីបានបាញ់ទម្លាក់យន្តហោះចម្បាំងរុស្ស៊ី ដែលបើតាមតួកគីបានបើករំលោភចូលដែនអាកាសតួកគី។
ក្រៅតែពីប្រកាសដាក់ទណ្ឌកម្មសេដ្ឋកិច្ចលើតួកគី លោកពូទីន ប្រធានាធិបតីរុស្ស៊ី កាលពីថ្ងៃសុក្រសប្តាហ៍មុន បានបញ្ជាឲ្យកងទ័ពរុស្ស៊ី ប្រុងជើងការជានិច្ចដើម្បី វាយប្រហារលើកម្លាំងនានា ដែលអាចគំរាមកំហែងកងទ័ពរុស្ស៊ី ក្នុងទឹកដីស៊ីរី។ លោកប្រធានាធិបតីពូទីនអាចចង់និយាយសំដៅវត្តមានយន្តហោះតួកគី ដែលរុស្ស៊ី ចោទថា បានបើកតាមបាញ់ទម្លាក់យន្តហោះរុស្ស៊ី ក្នុងទឹកដីស៊ីរី កាលពីចុងខែវិច្ឆិកា។
នៅក្នុងពេលដែលរុស្ស៊ី និងតួកគីកំពុងស្គាល់ភាពតានតឹងនឹងគ្នានេះ ក្រសួងការពារជាតិតួកគី កាលថ្ងៃអាទិត្យ ក៏បានប្រកាសហាម ដាច់ខាត មិនឲ្យបុគ្គលិក នាយទាហានតួកគីធ្វើដំណើរទៅទឹកដីរុស្ស៊ី ក្នុងហេតុផលសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ