លោកពូទីន ៖ អន្តរាគមន៍យោធារុស្ស៊ី នៅស៊ីរី គឺដើម្បីការពារជាបឋម សន្តិសុខជាតិ
រសៀលម្សិលមិញ លោកប្រធានាធិបតីរុស្ស៊ីពូទីន ក្នុងឋានៈ ជាអគ្គមេបញ្ជាការកំពូលនៃប្រទេស បានធ្វើសេចក្តីថ្លែងការណ៍ដ៏សំខាន់ៗ ក្នុងសម័យប្រជុំប្រចាំឆ្នាំ នៃថ្នាក់ដឹកនាំក្រសួងការពារជាតិ និង ក្រុមនាយទាហានជាន់ខ្ពស់ ជាមេបញ្ជាការកងទ័ពប្រភេទ ប្លែកៗ។ គាត់បានចាប់ផ្តើមពីប្រតិបត្តិការដែល កងអាកាសរុស្ស៊ី បំពេញនៅស៊ីរី តាំងពីថ្ងៃ៣០កញ្ញាមក ដោយបានបំផ្លាញយ៉ាងក្រាស់ក្រែលទៅហើយហេដ្ឋារចនាសម្ព័ន្ធពួកភេរវជននៃអង្គការ ”រដ្ឋអ៊ីស្លាម“ ដើម្បីការពារផលប្រយោជន៍ជាតិរុស្ស៊ី តែម្តង។
ចុះផ្សាយនៅថ្ងៃ៖
ស្តាប់ - ០២:២៤
តាមប្រសាសន៍លោកពូទីន តែក្នុងរយៈពេលមិនដល់២ខែកន្លះផង កងអាកាសរុស្ស៊ី បានចេញប្រតិបត្តិការប្រមាណ ៤.០០០លើក ដោយបានកំទេច ទីតាំងពួកភេរវជននៃ “អង្គការរដ្ឋអ៊ីស្លាម” ISIL អស់ជាង ៨.០០០កន្លែងនៅស៊ីរី លុះទាល់តែពួកវាធ្លាក់ខ្លួនគ្រាំគ្រាទៅហើយ។ គាត់ពន្យល់បំភ្លឺថា មូលហេតុដែលញ៉ាំងរុស្ស៊ី ឲ្យធ្វើអន្តរាគមន៍នៅស៊ីរី ពីព្រោះក្នុង៤ឆ្នាំកន្លងទៅនៃជម្លោះនៅស៊ីរី ISIL ចេះដណ្តើមយកបាន ២ភាគ៣ដែនដីប្រទេសនេះទៅហើយ មិនតែប៉ុណ្ណោះ លើដែនដីសហព័ន្ធរុស្ស៊ីឯណេះ ដំណើរការក៏ទាំង”កោសិកា” របស់ក្រុមភេរវជន ប្លែកៗ បូកទាំង “កោសិកា” របស់ ISIL ទៅផង ដែលស្ថាប័នសន្តិសុខជាតិរុស្ស៊ី FSB រមែងកំចាត់ពីមួយពេលទៅមួយពេល។
ក្នុងសុន្ទរកថានោះ ចៅហ្វាយវិមានក្រេមឡាំង មិនភ្លេចឡើយ ពីយោធារុស្ស៊ី ដែលបំពេញកាតព្វកិច្ចខ្លួន ក្នុងប្រតិបត្តិការនោះ ស្រាប់តែអភ័ព្វស្លាប់ទៅ។ ដោយបញ្ឆិតបញ្ឆៀងទៅតួកគីកុំឲ្យចាត់ចែងឡើងជាអំពើបង្កហេតុអ្វីណា ប្រឆាំងនឹងយោធារុស្ស៊ីទៀតឡើយ លោកពូទីន ឆ្លៀតព្រមានថា រុស្ស៊ីបានចាត់វិធានការបន្ថែមយ៉ាងដិតដល់ទៅហើយ ខាងធានាដល់សន្តិសុខ ទាំងយោធាខ្លួន ទាំងមូលដ្ឋានយោធាខ្លួននៅស៊ីរី ដែលឥឡូវពង្រឹងទៅដោយក្រុមយន្តហោះប្រមាញ់ និងប្រព័ន្ធមីស៊ីលការពារដែនអាកាសប្រសិទ្ធិភាពខ្ពស់។ គាត់ថា ចាប់ពីអំណើះតទៅ យន្តហោះរុស្ស៊ីណាក៏ដោយ ដែលចេញទៅទម្លាក់គ្រាប់បែក លើទីតាំងរបស់ ISIL គឺតែងហោះអមដោយយន្តហោះប្រមាញ់ជានិច្ច។ គាត់បញ្ជាឲ្យយោធារុស្ស៊ីប្រតិកម្ម “យ៉ាងម៉ឺងម៉ាត់បំផុត” គឺថាកំទេចចោលដោយគ្មានប្រណី និង ឥតបង្អែបង្អង់ឡើយ រាល់តែទីដៅណា ដែលពាំនាំជាគ្រោះថ្នាក់ ដល់ក្រុមយន្តហោះរុស្ស៊ី ឬ ដល់ហេដ្ឋារចនាសម្ព័ន្ធយោធារបស់រុស្ស៊ីនៅលើដី។
មានទៅហើយប្រតិកម្មពីខាងក្រុងអង់ការ៉ា តបនឹងការព្រមានរបស់លោកពូទីន។ ថ្លែងតាមកាណាល់ទូរទស្សន៍តួកគី NTV លោករដ្ឋមន្ត្រីការបរទេសតួកគី Mevlut Cavusoglu អំពាវនាវរុស្ស៊ី ដែលគាត់ចាត់ទុកថាជាដៃគូពាណិជ្ជកម្មដ៏ធំមួយរបស់តួកគីឲ្យ”ស្ងប់ចិត្ត” ទៅទាំងចង្អុល ឲ្យឃើញថា សេចក្តីអំណត់អត់ធ្មត់ របស់តួកគីមិនមែន គ្មានព្រំដែនទេ។ តាមសម្តីគាត់ បើតួកគីគ្មានចេតនាសងសឹក ទល់នឹងរុស្ស៊ីចំពោះអ្វីៗដែលរុស្ស៊ីបានធ្វើមកលើខ្លួន គឺមិនមែនមានន័យថា តួកគីភ័យខ្លាច ឬក៏យល់ក្នុងចិត្តថា ខ្លួនជាប់ពិរុទ្ធអ្វីណា នៅពីមុខរុស្ស៊ីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ