អ្នកវិទ្យាសាស្រ្តដាក់តាំងបង្ហាញគំរូផ្ទះសម្រាប់រស់នៅក្រៅភព
គំរូផ្ទះសម្រាប់រស់នៅក្រៅភពត្រូវបានអ្នកវិទ្យាសាស្រ្តអឺរ៉ុបសាងសង់បានសម្រេច ហើយដាក់តាំងបង្ហាញជាសាធារណៈ នៅក្នុងសប្តាហ៍នេះ នៅប៉ែកខាងកើតប្រទេសបារាំង។ ការសិក្សាស្រាវជ្រាវលើការសាងសង់ផ្ទះសម្រាប់រស់នៅក្រៅភពនេះ គឺជាផ្នែកមួយ នៃគម្រោងបញ្ជូនមនុស្សឲ្យទៅចុះចតនៅលើភពព្រះអង្គារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
គំរូផ្ទះដែលអ្នកវិទ្យាសាស្រ្តរបស់សហភាពអឺរ៉ុបដាក់តាំងបង្ហាញ នៅក្នុងទីក្រុងស្រ្តាសប៊ួ (Strasbourg) នៅពេលនេះ មានទម្ងន់ប្រមាណជា ៥,៥តោន អាចបត់ឲ្យតូចបាន ដើម្បីងាយស្រួលក្នុងការបាញ់បង្ហោះដោយប្រើរ៉ុកកែត ហើយអាចលាមកវិញ ដោយស្វ័យប្រវត្តិ នៅពេលចុះចតនៅលើភពផ្សេង។
ក្រោយពីដំឡើងរួចហើយ ផ្ទះ ដែលគេឲ្យឈ្មោះជាអក្សរកាត់តាមភាសាអង់គ្លេសថា SHEE (Self-deployable Habitat for Extreme Environments) មានទំហំប្រមាណពី ១៧ ទៅ ១៨ម៉ែត្រក្រឡា មានគ្រែចំនួន ២ បង្គន់អនាម័យ ព្រមទាំងប្រព័ន្ធចម្រោះទឹកនិងខ្យល់អុកស៊ីសែន អាចទទួលមនុស្សចំនួន ២នាក់ ឲ្យរស់នៅប្រកបដោយស្វ័យភាពពេញលេញរយៈពេល ២សប្តាហ៍។
គម្រោងនេះបានចាប់ផ្តើមឡើង កាលពី៣ឆ្នាំមុន ដោយកញ្ចប់ថវិកាភាគច្រើន (ប្រមាណជា ៧៥%) បានមកពីសហភាពអឺរ៉ុប។
វិស្វករដែលចូលរួមក្នុងគម្រោងនេះបានឲ្យដឹងថា គំរូផ្ទះ ដែលគេដាក់តាំងបង្ហាញនៅពេលនេះ មិនទាន់មានលក្ខណៈពេញលេញគ្រប់ជ្រុងជ្រោយ សម្រាប់បញ្ជូនទៅកាន់ភពផ្សេងនៅឡើយទេ ដោយគេនឹងត្រូវធ្វើតេស្តជាច្រើនទៀតនៅលើដី ជាពិសេស ការដំឡើងសាកល្បងជាច្រើនសប្តាហ៍ នៅវាលរហោស្ថាន ដែលមានលក្ខណៈស្រដៀងនឹងភពព្រះអង្គារ។
ការអភិវឌ្ឍគម្រោងសាងសង់ផ្ទះនេះធ្វើឡើង នៅក្នុងចក្ខុវិស័យនៃការបញ្ជូនមនុស្សឲ្យទៅរស់នៅរយៈពេលយូរនៅលើព្រះចន្ទ ឬទៅរហូតដល់ភពព្រះអង្គារ។ ដំណើរទៅកាន់ភពព្រះអង្គារ ដែលកំពុងស្ថិតនៅជាអាទិភាពខ្ពស់នៃបណ្តាអ្នកវិទ្យាសាស្រ្ត។
ខុសពីដំណើរទៅកាន់ព្រះចន្ទ ដែលប្រើពេលតែ ៣ថ្ងៃ ហើយអវកាសយានិកចំណាយពេលតែប៉ុន្មានម៉ោង ការធ្វើដំណើរទៅកាន់ភពព្រះអង្គារ គឺជាដំណើរដ៏វែងឆ្ងាយ ដែលត្រូវចំណាយពេលធ្វើដំណើររាប់ខែ ហើយអវកាសយានិកត្រូវចំណាយពេលយូរ រស់នៅដោយស្វ័យភាពពេញលេញ លើភពព្រះអង្គារ។ គិតរហូតមកទល់នឹងបច្ចុប្បន្ននេះ រាល់ការបញ្ជូនយានគ្មានមនុស្សបើកទៅកាន់ភពព្រះអង្គារ ត្រូវចំណាយពេល (ទាំងទៅទាំងមក) រហូតដល់ទៅជាង ៤រយថ្ងៃ ដោយមិនមានការចុះចត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ