Covid-19៖ យូណេស្កូ បារម្ភពីការខកខានការសិក្សារបស់សិស្ស៣៦០លាននាក់
ដោយសារតែការឆ្លងរាលដាល នូវមេរោគកូរូណា ប្រទេសប្រមាណ១៥ប្រទេស បានចាត់វិធានការបិទសាលារៀន ទាំងស្រុង ឬមួយផ្នែក ដើម្បីទប់ស្កាត់ការឆ្លងរាលដាល។ ដោយសារតែការបិទសាលារៀននេះ បានធ្វើឲ្យសិស្សយ៉ាងហោច៣៦០លាននាក់ នៅទូទាំងពិភពលោក ត្រូវខកខានការសិក្សា។ កាលពីថ្ងៃអង្គារ ទី១០មីនា លោកស្រីអគ្គលេខាធិការអង្គការយូណេស្កូ បានលើកឡើងថា អង្គការយូណេស្កូ កំពុងរកវិធីជួយសិស្ស ដែលខកខានការសិក្សា តាមរយៈការជម្រុញឲ្យមាន កម្មវិធីសិក្សានៅផ្ទះ ដោយប្រើបច្ចេកវិទ្យាអ៊ីនធ័រណិត។
ចុះផ្សាយនៅថ្ងៃ៖
ស្តាប់ - ០២:១៥
ផលប៉ះពាល់មួយទៀតនៃការឆ្លងរាលដាល នៃមេរោគកូរ៉ូណា គឺការខកខានការសិក្សារបស់សិស្សសាលា។ មានប្រទេស១៥ដែលបានចាត់វិធានការបិទសាលារៀនដោយតំបន់ ឬទាំងស្រុង។ សិស្សចាប់ពីថ្នាក់មតេយ្យដល់ថា្នក់មធ្យមសិក្សា យ៉ាងហោច៣០៥លាននាក់ដែលត្រូវនៅផ្ទះ មិនអាចទៅរៀនបាន ដោយសារសាលាបិទ ឬដោយជាប់បំរាមគោចរ ចេញដោយអាជ្ញាធរ។
បន្ថែមពីនេះ នៅមានសិស្សនិស្សិត ថ្នាក់ឧត្តមសិក្សា ប្រមាណ៥៨លាននាក់ ក៏ត្រូវខកខានការសិក្សាដែរ។ នេះបើផ្អែកតាមតួលេខ ផ្តល់ជូនដោយ លោកស្រីAudrey Azoulay អគ្គលេខាធិការ អង្គការយូណេស្កូ។ លោកស្រីបន្ថែមថា ចំនួនសិស្សដែលខកខានការសិក្សានេះ អាចនឹងឡើងបន្ថែមប្រមាណ៥៤០លាននាក់ ពីលើនេះទៀត បើសិនជាប្រទេស១៤ សម្រេចចេញវិធានការបិទសាលារៀនទូទាំងប្រទេសតែម្តង។
នេះជាលើកទីមួយហើយ ដែលវិស័យអបរំសិក្សាធិការ ត្រូវជួបបញ្ហា ក្នុងទ្រង់ទ្រាយធំបែបនេះ។ លោកស្រី អគ្គលេខាធិការអង្គការយូណេស្កូ បានលើកឡើងថា អ្វីដែលជាការព្រួយបារម្ភ គឺកុមារ សិស្សសាលា ដែលមានជីវភាពក្រីក្រ ដែលរងផលប៉ះពាល់ខ្លាំងជាងគេ។ ការខកខានការសិក្សា ជាផលវិបាកមួយសម្រាប់ពួកគេ តែមិនត្រឹមតែប៉ុណ្ណោះ ពួកគេមិនមានលទ្ធភាព ឬមានសម្ភារៈគ្រប់គ្រាន់ ក្នុងការបន្តការសិក្សានៅតាមផ្ទះរៀងៗខ្លួន។ ប្រទេសក្រីក្រខ្លះ ក៏ពុំមានវិធានការ និងសម្ភារៈគ្រប់គ្រាន់ ឆ្លើយតបទៅនឹងបញ្ហានេះដែរ។
លោកស្រីអគ្គលេខាធិការអង្គការយូណេស្កូ បានអំពាវនាវថា នេះជាឱកាសមួយ ដែលប្រទេសសមាជិកទាំងអស់ ត្រូវរួមគ្នាគិត ដើម្បីជំរុញកម្មវិធីសិក្សាពីចំងាយនៅតាមផ្ទះ ឲ្យឈានទៅកម្រិតមួយ ទូលំទូលាយ។ អនាគតនៃវិស័យអប់រំសម័យទំនើប គឺត្រូវការជាចាំបាច់ នូវបច្ចេកវិទ្យាទំនើប ដើរដោយប្រព័ន្ធអ៊ីនធ័រណិត។ អង្គការយូណេស្កូ មានគម្រោងលើកកំពស់ ការផលិតកម្មវិធីសិក្សានានា នៅលើទូរស័ព្ទដៃ ។ អង្គការយូណេស្កូ ក៏ជំរុញផងដែរ ឲ្យមានការអនុវត្ត នូវកម្មវិធីសិក្សាពីចំងាយ ដែលសាលារៀនផ្សេងៗ បានរៀបចំ ឲ្យគ្រូអាចបង្រៀនពីចំងាយ និងឲ្យសិស្សអាចតាមដានការបង្រៀនពីផ្ទះខ្លួន ដោយឥតគិតថ្លៃ និងដោយទូលំទូលាយបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ