ស៊ុយអែដ បញ្ឈប់ការស្វែងរកនាវាមុជទឹកបាតសមុទ្រ
អស់រយៈពេលមួយសប្តាហ៍មកហើយ ដែលប្រទេសស៊ុយអែដ បានប្រកូកប្រកាស រាយកម្លាំងតាមស្វែងរក នាវាមុជទឹកបាតសមុទ្រ នៅក្នុងដែនសមុទ្របាល់ទិក ក្បែរក្រុងស្តុកខុម។ ប្រជាជនជាច្រើនបានរាយការណ៍ថា បានឃើញ នាវាមុជទឹក ដែលទំនងអាចជានាវារបស់បរទេស។ ប៉ុន្តែបន្ទាប់ពីការស្វែងរកមិនបានលទ្ធផល ស៊ុយអែដបានសម្រេចបញ្ឈប់ប្រតិបតិ្តការនេះ នៅព្រឹក ថ្ងៃសុក្រទី ២៤ តុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
លោកអគ្គមេបញ្ជាការ កងទ័ពជើងទឹកស៊ុយអែដ ដែលបានដឹកនាំ ក្រុមបេសកកម្មស្រាវជ្រាវរកនាវាមុជទឹកបាតសមុទ្រ បានថ្លែងឲ្យដឹងនៅថ្ងៃសុក្រ ទី២៤ តុលា ថា ស៊ុយអែដ នឹងបញ្ឈប់ប្រតិបត្តិការស្វែងរក នាវាមុជទឹកបាតសមុទ្រតទៅទៀត ព្រោះការស្វែងរកអស់រយៈពេលមួយសប្តាហ៍កន្លងមកហើយ មិនបានរកឃើញអ្វីទាំងអស់។
សូមបញ្ជាក់ថា ព័ត៌មានដែលបានមកថា មានវត្តមាននាវាមុជទឹកបាតសមុទ្របរទេស នៅក្នុងដែនសមុទ្របាល់ទិករបស់ប្រទេសស៊ុយអែដ គឺត្រូវបានផ្តល់ឲ្យ ដោយយោងតាមសម្តីរបស់ប្រជាជនសាមញ្ញ ដែលបានអះអាងថាបានឃើញ។ ចំណែកក្រុមយោធាដែលនៅយាមកាមដែនសមុទ្រ មិនបានឃើញអ្វីទាំងអស់។ មានប្រជាជនជាច្រើននាក់ បានទូរស័ព្ទ និងបានផ្ញើសារទៅកាន់អាជ្ញាធរ ដើម្បីប្រាប់ថា បានឃើញមាន នាវាមុជទឹកបាតសមុទ្រ។ ក្រោយការផ្តល់ព័ត៌មាននេះ អាជ្ញាធរ បានប្រមូលផ្តុំកម្លាំង ទាហានជាង២០០នាក់ រួមជាមួយនាវា ធំៗជាច្រើនគ្រឿង ដើម្បីស្វែងរកដានរបស់នាវាមុជទឹក ដែលប្រជាជនអះអាងថាបានឃើញ។ ប៉ុន្តែមួយសប្តាហ៍កន្លងមកហើយ គេគ្មានរកឃើញអ្វីទាំងអស់។
ទោះបីជាយ៉ាងណា កងទ័ពជើងទឹកស៊ុយអែដ បានបញ្ជាក់ថា បើផ្អែកតាមរូបភាពដែលថតបាន គឺប្រហែលជាមានយ៉ាងហោចណាស់ នាវាមុជទឹកបាតសមុទ្រមួយគ្រឿង របស់ប្រទេសផ្សេង ដែលនៅក្នុងដែនសមុទ្របាល់ទិករបស់ស៊ុយអែដ។ ថ្វីត្បិតតែយោធា បញ្ឈប់ការរុករក ប៉ុន្តែ ក្រុមអ្នកជំនាញ នឹងបន្តធ្វើការវិភាគទៅលើសម្តី នឹងព័ត៌មាន ដែលបានផ្តល់ឲ្យដោយប្រជាជនជាច្រើននាក់។ បន្ថែមពីនេះ គេនឹងចាត់កម្លាំងមួយចំនួនតូច ឲ្យនៅយាមកាមជាប់លាប់ ដើម្បីតាមដានបន្តទៀត។ យោធាស៊ុយអែដ បានឲ្យដឹងផងដែរថា ប្រតិបត្តិការស្រាវជ្រាវអស់មួយសប្តាហ៍នេះ បានចំណាយប្រាក់អស់ ជាង២លាន២សែន អឺរ៉ូ ឯណោះ។
យ៉ាងណាក៏ដោយ ហេតុការណ៍នេះបានធ្វើឲ្យស៊ុយអែដ នឹកឃើញទៅដល់អតីតកាល កាលពីជំនាន់សង្គ្រាមត្រជាក់ ដែលកាលនោះ មាននាវាមុជទឹកបាតសមុទ្ររបស់សូវៀតជាច្រើនគ្រឿង បានមកស៊ើបការណ៍នៅក្នុងដែនសមុទ្របាល់ទិក របស់ស៊ុយអែដជាញឹកញាប់។ ដោយហេតុនេះហើយ គ្រាន់តែលេចឮដំណឹងលើកនេះភ្លាម មតិទូទៅបានគិតភ្លាម បើសិនជាមាននាវាមុជទឹកបាតសមុទ្រមែន គឺគ្មាននរណាក្រៅពីរុស្ស៊ីទេ។ ទន្ទឹមគ្នានេះ រុស្ស៊ីបានថ្លែងបដិសេធភ្លាមៗដែរ។ អ្នកនាំពាក្យរដ្ឋាភិបាលស៊ុយអ៊ែដ បានថ្លែងថា ស៊ុយអែដ មិនទាន់បានចោទប្រកាន់ប្រទេសណាមួយនោះទេ ព្រោះគេមិនទាន់មានភស្តុតាងច្បាស់លាស់ អញ្ចឹង អ្នកមានខ្លួន កុំអាលចេញប្រតិកម្មលឿនពេក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ