អាមេរិកចាប់ផ្តើមបើកយុទ្ធនាការទប់ស្កាត់មេរោគអេបូឡាតាមច្រកព្រលានយន្តហោះ
ចុះផ្សាយនៅថ្ងៃ៖
ស្តាប់ - ០៥:១៦
នៅថ្ងៃសៅរ៍ទី១១តុលានេះ អជ្ញាធរសុខាភិបាលអាមេរិក បានចាត់ឲ្យធ្វើការត្រួតពិនិត្យ សួរនាំ និងថតស្គែន គ្រប់អ្នកដំណើរទាំងអស់ដែលធ្វើដំណើរមកពីប្រទេស ហ្គីណេ លីបេរីយ៉ា និងសេរ៉ាឡេអូន ចូលមកក្នុងសហរដ្ឋអាមេរិក តាមច្រកព្រលានយន្តហោះ Kennedy នៅក្រុងញូវយ៉ក។ ទោះជាយ៉ាងណា អ្នកជំនាញភាគច្រើន នៅតែមានភាពស្រពិចស្រពិលអំពីប្រសិទ្ធិភាពនៃវិធានការនេះ ព្រោះគេមិនសង្ឃឹមថា វានឹងអាចទប់ស្កាត់មេរោគអេបូឡាបាន១០០ភាគរយនោះទេ។
អេបូឡាគំរាមកំហែងពិភពលោក៖
ក្នុងរយៈពេលប៉ុន្មានសប្តាហ៍ចុងក្រោយនេះ មេរោគអេបូឡាបាននឹងកំពុងតែបន្តការគំរាមកំហែង ដល់អាយុជីវិតប្រជាជន មិនត្រឹមតែនៅបណ្តាប្រទេសនៅខាងលិចទ្វីបអាហ្រ្វិកទេ ពោលគឺទូទាំងពិភពលោកទាំងមូលតែម្តង។ មានប្រទេសជាច្រើនបានចាត់វិធានការផ្សេងៗ ដើម្បីទប់ស្កាត់មិនឲ្យមេរោគនេះឆ្លងចូលមកប្រទេសគេ។ ជាក់ស្តែងសហរដ្ឋអាមេរិកពេលនេះ ដែលបានចាត់វិធានការយ៉ាងតឹងតែងនៅព្រលានយន្តហោះក្រុងញូវយ៉ក។
ជាការពិតណាស់ ពិភពលោកទាំងមូលកំពុងតែជ្រូលច្របល់ ភ័យខ្លាចការរីករាលដាលនៃមេរោគអេបូឡាដ៏កាចសាហាវនេះ ឆ្លងរីករាលដាលទូទាំងពិភពលោក ព្រោះថារហូតមកដល់ពេលនេះ គេនៅមិនទាន់រកឃើញថ្នាំព្យាបាលដែលមានប្រសិទ្ធិភាពដើម្បីកំចាត់មេរោគនេះនៅឡើយទេ។ វិធីតែមួយគត់ដែលអាចទប់ស្កាត់ការរីករាលដាលមេរោគនេះ គឺបញ្ឈប់កុំឲ្យមេរោគនេះ ឆ្លងពីមនុស្សម្នាក់ទៅមនុស្សម្នាក់ទៀត។ ដូច្នេះហើយទើបពេលនេះ សហរដ្ឋអាមេរិក បានចាត់វិធានការ ចាប់ពីថ្ងៃនេះទៅ ឲ្យមានការត្រូតពិនិត្យយ៉ាងតឹងតែង ទៅលើអ្នកដំណើរដែលធ្វើដំណើរ មកពីប្រទេសបី នៅអាហ្រ្វិកខាងលិច ដែលមានអ្នកជំងឺអេបូឡាច្រើនជាងគេបំផុត គឺ ប្រទេស ហ្គីណេ លីបេរីយ៉ា និងសេរ៉ាឡេអូន។
ក្តាប់ឲ្យបានអ្នកដំណើរដែលគួរឲ្យសង្ស័យ ថាមានផ្ទុកមេរោគអេបូឡា ចូលមកក្នុងសហរដ្ឋអាមរិក៖
សូមបញ្ជាក់ថារហូតមកដល់ថ្ងៃនេះ មានអ្នកជំងឺ ៤០០០នាក់ហើយដែលបានស្លាប់។ វិធានការរបស់អជ្ញាធរសុខាភិបាលអាមេរិក គឺថា ត្រួតពិនិត្យ លើអ្នកដំណើរប្រហែលជា១៦០នាក់ក្នុងមួយថ្ងៃៗ ដែលមកពីប្រទេសទាំងបីនោះ។ អ្នកដំណើរទាំងនោះ ត្រូវឆ្លើយសំណួរយ៉ាងល្អិតល្អន់ ស្តីពីប្រវត្តិនៃការធ្វើដំណើរ នៅក្នុងប្រទេសទាំងនោះ ថាតើធ្លាប់បានប៉ះពាល់ រឺនៅក្បែរអ្នកជំងឺអេបូឡាដែររឺទេ។ អ្នកដំណើរទាំងអស់នោះ នឹងត្រូវឆ្លងកាត់ក្នុងម៉ាស៊ីនថតស្គែន ដើម្បីស្ទាបស្ទង់ពីកំដៅក្នុងខ្លួន។
ក្នុងករណីមានការសង្ស័យ ឧទាហរណ៍ថា អ្នកដំណើរណាម្នាក់ធ្លាប់បានប៉ះពាល់ជាមួយអ្នកជំងឺអេបូឡា រឺក៏អ្នកដំណើរនោះ មានអការៈក្តៅខ្លួនខ្លាំង គេនឹងបញ្ជូនឲ្យទៅនៅក្នុងបន្ទប់ពិសេសមួយ ដើម្បីធ្វើការស្រាវជ្រាវបន្ថែម ហើយក្នុងពេលរងចាំនេះ អ្នកដំណើរដែលគេសង្ស័យ ត្រូវនៅក្នុងនោះ ហើយមិនឲ្យជួបជាមួយមនុស្សខាងក្រៅទេ។ ប៉ុន្តែ តាមការប៉ាន់ស្មានមើលទៅ អ្នកដំណើរដែលអាចឲ្យគេសង្ស័យនោះ មានតិចតួចណាស់ ព្រោះថា តាមធម្មតា បើសិនជាអ្នកដំណើរម្នាក់បានឆ្លងមេរោគអេបូឡា មនុស្សនោះមិនមែនក្តៅខ្លួនរឺឈឺភ្លាមៗនោះទេ រោគសញ្ញាមេរោគអេបូឡានឹង នឹងចេញមកមួយអាទិត្យ រឺដប់ថ្ងៃក្រោយឯណោះ។
វិធានការត្រូតពិនិត្យតាមព្រលានយន្តហោះ អាចទប់ស្កាត់មេរោគអេបូឡាបាន១០០ភាគរយ ដែររឺទេ?
ទោះបីជាយ៉ាងណា ការត្រូតពិនិត្យនៅច្រកព្រលានយន្តហោះ លើអ្នកដំណើរមកពីប្រទេសដែលមានមេរោគអេបូឡា វាមិនសូវជាមានប្រសិទ្ធិភាពប៉ុន្មានទេ ក្នុងការរាំងខ្ទប់មេរោគនេះ មិនឲ្យចូលមកក្នុងទឹកដីរបស់ប្រទេសនិមួយៗ។
ទីមួយដោយហេតុថា មនុស្សដែលមានមេរោគនេះក្នុងខ្លួន មិនមែនមានរោគសញ្ញាចេញភ្លាមៗនោះទេ។ ជួនកាលមួយអាទិត្យ ទៅ១០ថ្ងៃឯណោះទើបដឹង។ ហើយល្គិកណា មិនទាន់មានរោគសញ្ញាចេញមកខាងក្រៅ គេមិនអាចជោះឈាមមើលបានទេ។ រោគសញ្ញាដែលអាចកត់សម្គាល់បាន គឺក្តៅខ្លួនខ្លាំង ហើយពេលខ្លះបើដល់ដំណាក់កាលធ្ងន់ អ្នកជំងឺអាចហូរឈាមតាមភ្នែក រឺតាមច្រមុះ និងមានរាករូសទៀតផង។ មួយវិញទៀត បើម៉ាស៊ីនស្គែន ថតបានអ្នកដំណើរមួយចំនួនដែលក្តៅខ្លួន ហើយសង្ស័យថាមានមេរោគអេបូឡា តែតាមការពិត ពេលខ្លះ អ្នកដំណើរគាត់ក្តៅខ្លួនធម្មតា ដោយសារគ្រុន រឺមានជំងឺផ្សេងៗទៀតក៏ថាបាន។ វាមិនមែនឲ្យតែក្តៅខ្លួន សុទ្ធសឹងតែអេបូឡាទាំងអស់នោះទេ។
មូលហេតុមួយចំនួនទៀត ដែលអាចឲ្យយើងយល់ថា វិធានការនៅតាមព្រលានយន្តហោះមិនសូវជាមានប្រសិទ្ធិភាព គឺទាក់ទងទៅនឹងភាពស្មោះត្រង់របស់អ្នកដំណើរក្នុងការឆ្លើយសំណួរ។ គេមិនប្រាកដថា អ្នកដំណើរទាំងអស់ឆ្លើយការពិត ថាខ្លួនគេបានប៉ះពាល់ រឺនៅក្បែរអ្នកជំងឺអេបូឡានោះទេ ព្រោះថាជួនកាល គ្នាខ្លាចត្រូវគេឃាត់ទុក រឺក៏បញ្ជូនទៅទីកន្លែងផ្សេងៗ។ មួយវិញទៀត ដូចក្នុងករណីជំងឺផ្តាសាយបក្សី អញ្ចឹង អ្នកដំណើរខ្លះគាត់ ក្តៅខ្លួន ហើយគាត់លេបថ្នាំ Tylenol ដើម្បីបន្ថយកំដៅ។ ដូច្នេះម៉ាស៊ីនស្គែន ថតអត់ឃើញអីទាំងអស់។
ចំនុចមួយទៀតនោះ គឺការកំណត់ក្រុមអ្នកដំណើរ ដែលមកពីប្រទេសទាំងបីនៅអាហ្រ្វិកខាងលិច។ បច្ចុប្បន្ននេះមានក្រុមហ៊ុនអាកាសចរណ៍តែ២ទេ ដែលមានជើងហោះហើរផ្ទាល់មកដល់អាមេរិក។ យើងកុំភ្លេចថា មានអ្នកដំណើរមួយចំនួនធំទៀត ដែលឈប់នៅបណ្តាប្រទេសផ្សេងៗ មុននឹងបន្តដំណើរមកដល់អាមេរិក។ ដូច្នេះ វាពិបាកណាស់ ក្នុងការតាមដានថា អ្នកដំណើរណាមកពីណា។ ចង់កំចាត់មេរោគនេះ ឲ្យសាបសូន្យ ទាល់តែគ្រប់គ្រង់ឲ្យបាន នូវការឆ្លងរាលដាលរបស់វា នៅក្នុងប្រទេសប្រភពដើមវានៅអាហ្វ្រិក មិនមែនមកបិទទ្វាព្រំដែន មិនឲ្យមនុស្សចេញចូល ទើបថាទប់ស្កាត់បាននោះទេ។
ការពារប្រសើរជាងព្យាបាល៖
ប៉ុន្តែយ៉ាងណាក៏ដោយ វិធានការត្រួតពិនិត្យតាមព្រលានយន្តហោះ ជាវិធីសាស្រ្តមួយដែរ ដើម្បីទប់ស្កាត់ការរីករាលដាលមេរោគអេបូឡា មិនឲ្យចូលមកក្នុងទឹកដីប្រទេសនិមួយៗ ថ្វីត្បិតតែវាមិនសូវជាមានប្រសិទ្ធិភាព១០០ភាគរយក៏ដោយ។ វិធានការនេះ អាចជួយឲ្យអាជ្ញាធរក្តោបយកព័ត៌មានទូទៅរបស់អ្នកដំណើរ ហើយធ្វើការតាមដានតទៅមុខ ក្រែងមានរោគសញ្ញាស្តែងចេញឡើង ដើម្បីឲ្យក្រុមគ្រូពេទ្យធ្វើអន្តរាគមន៍ ឲ្យទាន់ពេលវេលា។ ដូចគ្នាដែរ ព្រលានយន្តហោះ និងស្ថានីយ៍រថភ្លើងមួយចំនួននៅអង់គ្លេស ក៏នឹងចាប់ផ្តើម ធ្វើការត្រូតពិនិត្យ និងថតស្គែនដែរ។ ដូចពាក្យចាស់ខ្មែរយើងនិយាយមិនខិសទេគឺ ការពារ ប្រសើរជាងព្យាបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ