ក្រោយចាញ់ក្តីនៅឡាអេអាមេរិកប្រកាសដកខ្លួនចេញពីកិច្ចព្រមព្រៀងអន្តរជាតិ
កាលពីថ្ងៃពុធ ៤តុលានេះ សហរដ្ឋអាមេរិកបានប្រកាសដកខ្លួនចេញពីកិច្ចព្រមព្រៀងអន្តរជាតិមួយ ដែលមានជាប់ពាក់ព័ន្ធនឹងតុលាការយុត្តិធម៌អន្តរជាតិ។ ការប្រកាសដកខ្លួនចេញពីកិច្ចព្រមព្រៀងនេះត្រូវបានធ្វើឡើង ក្រោយពីអាមេរិកចេញក្តីជាមួយអ៊ីរ៉ង់ នៅឯតុលាការក្រុងឡាអេ ក្នុងពេលដែលសំណុំរឿងមួយទៀតក៏កំពុងស្ថិតក្នុងដៃតុលាការអន្តរជាតិដែរ គឺបណ្តឹងរបស់ប៉ាឡេស្ទីន ជុំវិញការដាក់តាំងស្ថានទូតអាមេរិក នៅក្នុងទីក្រុងយេរូសាឡឹម។
ចុះផ្សាយនៅថ្ងៃ៖
លោកចន បូលតុន (John Bolton) ទីប្រឹក្សាសន្តិសុខជាតិរបស់លោកដូណាល់ ត្រាំ បានប្រកាសថា អាមេរិកដកខ្លួនចេញពីពិធីសារមួយ នៃអនុសញ្ញាទីក្រុងវីយ៉ែន គឺពិធីសារឆ្នាំ១៩៦១ ដែលចែងពីការកំណត់យកតុលាការយុត្តិធម៌អន្តរជាតិជាយន្តការដោះស្រាយវិវាទ រវាងរដ្ឋជាសមាជិក (Optional Protocol and Dispute Resolution)។ ទោះយ៉ាងណា អាមេរិកនៅតែបន្តស្ថិតនៅជាសមាជិកអនុសញ្ញាក្រុងវីយ៉ែន ដែលជាអនុសញ្ញាកំណត់អំពីទំនាក់ទំនងការទូត។
លោកចន បូលតុន បានលើកហេតុផលថា ការដកខ្លួនចេញពីពិធីសារនៃអនុសញ្ញាក្រុងវីយ៉ែននេះ គឺមានជាប់ទាក់ទងនឹងបណ្តឹងរបស់ប៉ាឡេស្ទីន នៅតុលាការយុត្តិធម៌អន្តរជាតិក្រុងឡាអេ ដើម្បីតវ៉ាប្រឆាំងនឹងការរើស្ថានទូតអាមេរិកប្រចាំអ៊ីស្រាអែល ទៅដាក់តាំងនៅក្នុងទីក្រុងយេរូសាឡឹម។
មេដឹកនាំប៉ាឡេស្ទីនបានឲ្យដឹង កាលពីថ្ងៃសៅរ៍កន្លងទៅនេះថា ខ្លួនបានដាក់ពាក្យបណ្តឹង ទៅកាន់តុលាការក្រុងឡាអេ ដោយលើកហេតុផលថា ការដាក់តាំងស្ថានទូតអាមេរិក នៅក្នុងក្រុងយេរូសាឡឹម គឺជាទង្វើរំលោភបំពានទៅលើច្បាប់អន្តរជាតិ។
នៅក្នុងពេលបច្ចុប្បន្ននេះ ទីក្រុងយេរូសាឡឹមស្ថិតនៅជាចំណុចជាប់ជម្លោះមួយនៅឡើយ រវាងប៉ាឡេស្ទីន និងអ៊ីស្រាអែល ដោយប៉ាឡេស្ទីនទាមទារយកមួយផ្នែកសម្រាប់ធ្វើជារដ្ឋធានីរបស់ខ្លួន ក៏ប៉ុន្តែ អ៊ីស្រាអែលទាមទារយកទាំងអស់។ ទោះជាយ៉ាងណា រហូតមកទល់នឹងពេលបច្ចុប្បន្ននេះ ប្រទេសភាគច្រើនលើសលុបមិនទទួលស្គាល់យេរូសាឡឹមជារដ្ឋធានីរបស់អ៊ីស្រាអែលនោះទេ ដោយដាក់តាំងស្ថានទូតរបស់ពួកគេតែ នៅក្នុងទីក្រុងតែលអាវីវ (Tel Aviv) តែប៉ុណ្ណោះ។
កាលពីថ្ងៃពុធម្សិលមិញនេះ ក្រៅពីបានប្រកាសដកខ្លួនចេញពីពិធីសារនៃអនុសញ្ញាទីក្រុងវីយ៉ែន រដ្ឋការរបស់លោកដូណាល់ ត្រាំ ក៏បានប្រកាសដកខ្លួនចេញពីកិច្ចព្រមព្រៀផ្សេងមួយទៀតដែរ គឺសន្ធិសញ្ញាមិត្តភាពទ្វេភាគីអាមេរិក-អ៊ីរ៉ង់ ចុះឆ្នាំ១៩៥៥។ សន្ធិសញ្ញាមិត្តភាពទ្វេភាគីនេះហើយ ដែលតុលាការក្រុងឡាអេ លើកយកមកធ្វើជាសំអាង នៅក្នុងការចេញសេចក្តីសម្រេច កាលពីថ្ងៃពុធ បញ្ជាឲ្យអាមេរិកដកចេញវិញនូវទណ្ឌកម្ម ដែលលោកដូណាល់ត្រាំបានសម្រេចដាក់លើអ៊ីរ៉ង់ ចាប់តាំងពីថ្ងៃទី៨ ខែឧសភា ឆ្នាំ២០១៨ ក្រោយពីលោកបានដកខ្លួនចេញពីកិច្ចព្រមព្រៀងនុយក្លេអ៊ែរ។
ទីប្រឹក្សាសន្តិសុខជាតិអាមេរិកបានបានបរិហាររិះគន់តុលាការយុត្តិធម៌អន្តរជាតិថា តុលាការនេះគ្មានសមត្ថកិច្ចចេញសេចក្តីសម្រេចទាក់ទងនឹងទណ្ឌកម្មរបស់អាមេរិកនោះទេ ហើយថា តុលាការនេះកំពុងតែធ្វើខ្លួនឲ្យក្លាយជាមធ្យោបាយឃោសនារបស់អ៊ីរ៉ង់។
គួរធ្វើការកត់សម្គាល់ថា នេះមិនមែនជាលើកទីមួយទេ ដែលរដ្ឋការរបស់លោកដូណាល់ ត្រាំ ធ្វើការវាយប្រហារទៅលើប្រព័ន្ធយុត្តិធម៌អន្តរជាតិ។ កាលពីពេលថ្មីៗនេះ អាមេរិកក៏បានបរិហាររិះគន់យ៉ាងខ្លាំងៗផងដែរ ទៅលើតុលាការព្រហ្មទណ្ឌអន្តរជាតិ ហើយព្រមទាំងបានគំរាមទៀតផងថានឹងដាក់ទណ្ឌកម្មលើតុលាការនេះ ប្រសិនបើមានការបើកស៊ើបអង្កេតទៅលើករណីឧក្រិដ្ឋកម្មសង្រ្គាមរបស់អាមេរិក នៅក្នុងប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ