យន្តហោះ ៧៧៧X ជំនាន់ថ្មីរបស់ក្រុមហ៊ុនប៊ូអ៊ីងបញ្ចប់ការហោះហើរលើកដំបូងដោយជោគជ័យ
យន្តហោះ ៧៧៧X ដែលជាប្រភេទយន្តហោះជំនាន់ថ្មី និងមានបំពាក់ដោយម៉ាស៊ីនភ្លោះធំជាងគេបំផុតរបស់ក្រុមហ៊ុនប៊ូអ៊ីង បានបញ្ចប់ការសាកល្បងហោះហើរលើកដំបូងរបស់ខ្លួន ប្រកបដោយភាពជោគជ័យ កាលពីថ្ងៃសៅរ៍ទី២៥ មករាម្សិលមិញ។ នេះ អាចរាប់ចាត់ទុកថាជាព្រឹត្តិការណ៍ដ៏សំខាន់មួយសម្រាប់ក្រុមហ៊ុនប៊ូអ៊ីង ដែលបាននិងកំពុងពុះពារយ៉ាងខ្លាំង ក្នុងការដោះស្រាយវិបត្តិសេដ្ឋកិច្ច បន្ទាប់ពីមានគ្រោះថ្នាក់ធ្លាក់យន្តហោះប្រភេទ ៧៣៧ MAX ពីរលើករួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
យន្តហោះដ៏ថ្មីស្រឡាង និងមានបំពាក់ដោយម៉ាស៊ីនភ្លោះធំជាងគេបំផុតលើលោកនេះ បានចុះចតនៅទីលានរបស់ក្រុមហ៊ុនប៊ូអ៊ីង ក្បែរទីក្រុងស៊ីថល (Seattle) នៃសហរដ្ឋអាមេរិកកាលពីថ្ងៃសៅរ៍ម្សិលមិញបន្ទាប់ពីហោះហើរបានប្រមាណ ៤ ម៉ោង នៅលើអាកាស។
ភាពជោគជ័យនៃការធ្វើតេស្តហោះហើរ ពិតជាមានសារៈសំខាន់ខ្លាំងណាស់សម្រាប់ក្រុមហ៊ុនប៊ូអ៊ីងរបស់អាមេរិក ដែលកំពុងតែរងវិបត្តិសេដ្ឋកិច្ចដោយសារតែគ្រោះថ្នាក់ធ្លាក់យន្តហោះប្រភេទ ៧៣៧ MAX។ ជាប្រភេទយន្តហោះ ដែលធ្លាប់ទទួលបានការបញ្ជាទិញយ៉ាងច្រើន ក៏ប៉ុន្តែរាល់ការបញ្ជាទិញត្រូវបានផ្អាកទៅវិញ ក្រោយឧបទ្ទវហេតុធ្លាក់យន្តហោះនៅអេត្យូពីដែលបានសម្លាប់ជីវិតអ្នកដំណើរទាំងអស់ចំនួន ១៥៧ នាក់ កាលពីខែមីនា ឆ្នាំទៅមិញ។
ក្រុមហ៊ុនប៊ូអ៊ីងនឹងធ្វើតេស្តសាកល្បងយន្តហោះប្រភេទថ្មីទំនើបរបស់ខ្លួនជាច្រើនដងទៀត ដើម្បីឲ្យប្រាកដក្នុងចិត្តថា យន្តហោះពិតជាមានគុណភាព និងសុវត្ថិភាពខ្ពស់គួរឲ្យជឿទុកចិត្តបាន។ ក្នុងករណីដែលគ្រប់យ៉ាងដំណើរការទៅរលូនល្អ ក្រុមហ៊ុនប៊ូអ៊ីងនឹងស្នើសុំធ្វើចរាចរណ៍ហោះហើរជាផ្លូវការទៅកាន់ទីភ្នាក់ងារអាកាសចរណ៍សហព័ន្ធអាមេរិក (FAA)។
ទាក់ទងរឿងនេះដែរ លោកស្ទេនឡៃ ឌីល (Stanley Deal) នាយកប្រតិបត្តិក្រុមហ៊ុនប៊ូអ៊ីង បាននិយាយថា ការធ្វើតេស្តហោះហើរប្រកបដោយភាពជោគជ័យ គឺជាតឹកតាងមួយបង្ហាញប្រាប់ដល់ពិភពលោកនូវអ្វីដែលក្រុមហ៊ុនប៊ូអ៊ីងកំពុងតែធ្វើ។ លោកបន្ថែមថា ប៊ូអ៊ីងដឹងពីរបៀបផលិតយន្ដហោះ គឺផលិតប្រកបសុវត្ថិភាព និងពង្រឹងទំនុកចិត្តដល់សាធារណជន។
គួរជម្រាបជូនថា យន្តហោះ៧៧៧X ជំនាន់ថ្មីចុងក្រោយរបស់ក្រុមហ៊ុនប៊ូអ៊ីង អាចមានតម្លៃចាប់ពី ៤១០ ទៅ ៤៤២ លានដុល្លារ។ នាខណៈនេះ ក្រុមហ៊ុនអាកាសចរណ៍ធំៗ រួមមានដូចជាក្រុមហ៊ុន Emirates, Lufthansa, Cathay Pacific, ក្រុមហ៊ុនអាកាសចរណ៍សិង្ហបុរី និងកាតា បានបញ្ជាទិញចំនួន ៣៤០ គ្រឿងហើយ សម្រាប់យន្តហោះប៊ូអ៊ីងប្រភទ ៧៧៧X។
គួរបញ្ជាក់ជូនដែរថា យន្តហោះម៉ូដែលថ្មីរបស់ប៊ូអ៊ីង ៧៧៧X មានសមត្ថភាពអាចផ្ទុក មនុស្សពីចំនួន ៣៨៤ ទៅ ៤២៦នាក់។ គេរំពឹងថា យន្តហោះម៉ូដែលថ្មីនេះនឹងអាចបញ្ចេញលក់លើទីផ្សារបាននៅដើមឆ្នាំ ២០២១ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ