អាមេរិកនៅតែបន្តអនុញ្ញាតឲ្យមានជើងហោះហើររបស់យន្តហោះប៊ូអ៊ីង ៧៣៧ MAX
សហរដ្ឋអាមេរិកបាននិយាយថា វាគ្មានហេតុផលអ្វីដែលត្រូវផ្អាកចរាចរណ៍ហោះហើររបស់យន្តហោះប៊ូអ៊ីង ៧៣៧ MAX ឡើយ ទោះបីយន្តហោះប្រភេទនេះចំនួនពីររួចមកហើយ បានធ្លាក់ក្នុងចន្លោះពេលតែរវាង ៤ ខែ និងបើទោះបីជាប្រទេសជាច្រើន ស្ទើរតែទាំងអស់ទៅហើយនៅក្នុងពិភពលោក បានផ្អាកការហោះហើរយ៉ាងណាក្តី។
ចុះផ្សាយនៅថ្ងៃ៖ កែប្រែថ្ងៃទី៖
ទោះបីជាមានការធានាអះអាង ពីអាមេរិកដែលជាម្ចាស់អ្នកផលិតយន្តហោះប៊ូអ៊ីង ៧៣៧ MAX យ៉ាងណាក្តី ក៏គ្រោះថ្នាក់ធ្លាក់យន្តហោះប្រភេទនេះបន្តបន្ទាប់គ្នា ធ្វើឲ្យប្រទេសជាច្រើននាំគ្នាភ័យបារម្ភ និងសម្រេចផ្អាកការហោះហើរនូវជើងយន្តហោះប្រភេទនេះ។
ជាក់ស្តែង បណ្តាប្រទេសសហភាពអឺរ៉ុបដូចជា អង់គ្លេស បារាំង រួមជាមួយបណ្តាប្រទេសជាច្រើនទៀតមានជាអាទិ៍ ឥណា្ឌ ចិន សិង្ហបុរី និងវៀតណាមជាដើម នាំគ្នាផ្អាក ឬហាមមិនឲ្យជើងយន្តហោះប្រភេទ ៧៣៧ MAX ហោះហើរឆ្លងកាត់ដែនអាកាសរបស់ខ្លួនឡើយ។
តែទោះបីជា ប្រទេសស្ទើរតែទូទាំងពិភពលោកចាត់វិធានការបែបនេះក្តី សហរដ្ឋអាមេរិកនៅតែបដិសេធមិនធ្វើដូច្នោះឡើយ។ ទាក់ទងរឿងនេះដែរ ប្រធានផ្នែករដ្ឋបាលអាកាសចរណ៍សហព័ន្ធអាមេរិក ហៅកាត់ថា (FAA) បានបញ្ជាក់ថាកាលពីថ្ងៃអង្គារម្សិលមិញថា តាមការត្រួតពិនិត្យ ប្រព័ន្ធបច្ចេកទេសដែលមានបំពាក់នៅលើយន្តហោះ ៧៣៧ MAX មិនមានបញ្ហាដូចការសង្ស័យឡើយ ហើយថាយន្តហោះមានសុវត្តិភាពល្អ។
ជាមួយគ្នានេះ ប្រធានផ្នែកកម្មវិធីសុវត្ថិភាព និងសន្តិសុខអាកាសចរណ៍នៅឯសាកលវិទ្យាល័យភាគខាងត្បូងរដ្ឋកាលីហ្វ័រញ៉ា លោក Thomas Anthony បាននិយាយថា មូលហេតុដែលធ្វើឲ្យធ្លាក់យន្តហោះប៊ូអ៊ីង វាមិនមែនត្រឹមតែជាបញ្ហាម៉ាស៊ីន ឬប្រព័ន្ធកម្មវិធីរបស់យន្តហោះឡើយ ហើយលោកជឿថា គ្រោះថ្នាក់ផ្ទួនៗ បានធ្វើឲ្យគេកាន់តែចោទជាសំណួរ និងសង្ស័យកាន់តែខ្លាំងផងដែរ អំពីសុវត្ថិភាពរបស់យន្តហោះប៊ូអ៊ីង ៧៣៧ MAX ។
គួរជម្រាបជូនថា ចំណាត់ការផ្អាកការហោះហើរយន្តហោះប៊ូអ៊ីង ៧៣៧ MAX របស់ប្រទេសនានាកាន់តែច្រើនឡើងៗ ធ្វើឲ្យក្រុមហ៊ុនប៊ូអ៊ីងរបស់អាមេរិក ដែលជាក្រុមហ៊ុនផលិតយន្តហោះធំជាងគេកំពុងតែរងសម្ពាធជាខ្លាំង។
គេនៅមិនទាន់ដឹងនៅឡើយទេថា តើនិន្នាការផ្អាកជើងហោះហើរនេះនឹងបន្ត ឬបញ្ចប់ទៅនៅពេលណានោះ ប៉ុន្តែគេដឹងថាបច្ចុប្បន្ននេះមានយន្តហោះប្រភេទប៊ូអ៊ីង៧៣៧ MAX ៨ ចំនួន ៣៥០ ដែលត្រូវបានផលិត និងដាក់ឲ្យដំណើរនៅទូទាំងពិភពលោក។
ពាក់ព័ន្ធរឿងនេះដែរ កាលពីម្សិលមិញនេះ ប្រធានាធិបតីអាមេរិកដូណាល់ ត្រាំបានសរសេរនៅលើបណ្តាញសង្គម Twitter ថា យន្តហោះបានក្លាយទៅជាយានជំនិះមួយក៏គួរឲ្យបារម្ភក្នុងការធ្វើដំណើរ។ មិនតែប៉ុណ្ណោះ លោកត្រាំ ថែមទាំងបាននិយាយតាមទូរស័ព្ទអំពីយន្តហោះ ប៊ូអ៊ីង ៧៣៧ MAX ជាមួយនាយកប្រតិបត្តិរបស់ក្រុមហ៊ុនប៊ូអ៊ីងទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ