អាមេរិកបញ្ជាក់ជាថ្មីពីការគាំទ្រអារ៉ាប៊ីសាអូឌីតប្រឈមនឹងឥរិយាបទប្រកបដោយគ្រោះថ្នាក់របស់អ៊ីរ៉ង់
ប្រមុខការទូតអាមេរិកលោកម៉ៃ ប៉ុមប៉េអូកំពុងបំពេញទស្សនកិច្ចរយៈពេល ៣ថ្ងៃនៅក្នុងប្រទេសអារ៉ាប៊ីសាអូឌីត។ ថ្ងៃព្រហស្បតិ៍ ទី២០ កុម្ភៈដែលជាថ្ងៃទី២ នៃទស្សនកិច្ច លោកប៉ុមប៉េអូបានជួបសន្ទនាជាមួយព្រះមហាក្សត្រអារ៉ាប៊ីសាអូឌីតសាម៉ាន និងបានទៅជួបសំណេះសំណាលជាមួយកងទ័ពអាមេរិកដែលឈរជើងលើទឹកដីអារ៉ាប៊ីសាអូឌីត។ វត្តមានប្រមុខការទូតអាមេរិកក្នុងទឹកដីអារ៉ាប៊ីសាអូឌីតដែលជាសត្រូវស៊ីសាច់ ហុតឈាមរបស់ប្រទេសអ៊ីរ៉ង់ពេលនេះបានធ្វើឡើង បន្ទាប់ពីអាមេរិក និងអ៊ីរ៉ង់បានស្គាល់ភាពតានតឹងដល់កំពូលរវាងគ្នាកាលពីជាង ១ខែមុននេះ។ តើទស្សនកិច្ចរបស់លោកប៉ុមប៉េអូនៅអារ៉ាប៊ីសាអូឌីតពេលនេះមានគោលដៅអ្វីខ្លះ?។
ចុះផ្សាយនៅថ្ងៃ៖
ស្តាប់ - ០២:០៤
គោលដៅនៃទស្សនកិច្ចរបស់ប្រមុខការទូតអាមេរិកក្នុងទឹកដីសម្ព័ន្ធមិត្តអារ៉ាប់នៅដើមបូព៌ាមួយនេះមិនមែនសំដៅកាត់បន្ថយភាពតានតឹងរវាងអាមេរិក និងអ៊ីរ៉ង់ ឬជួយសម្រុះសម្រួលរវាងអារ៉ាប៊ីសាអូឌីត និងអ៊ីរ៉ង់ទេ តែដើម្បីគូសបញ្ជាក់ពីទំនាក់ទំនងយូរលង់រវាងទីក្រុងរីយ៉ាដ និងទីក្រុងវ៉ាស៊ីតោន។ ទន្ទឹមគ្នានេះ អាមេរិកចង់បញ្ជាក់ជាថ្មីពីការប្តេជ្ញាចិត្តរបស់ខ្លួនក្នុងការការពារអារ៉ាប៊ីសាអូឌីតប្រឈមនឹងឥរិយាបទប្រកបដោយគ្រោះថ្នាក់របស់អ៊ីរ៉ង់នៅក្នុងតំបន់។ ជំហរទាំងនេះរបស់ក្រុងវ៉ាស៊ីនតោនត្រូវបានបញ្ជាក់ដោយក្រសួងការបរទេសអាមេរិកនៅក្នុងសេចក្តីប្រកាសព័ត៌មានមួយចេញផ្សាយក្នុងថ្ងៃព្រហស្បតិ៍ ទី២០ កុម្ភៈ។
« ដើម្បីឆ្លើយតបនឹងការវាយប្រហារ និងតាមសំណើរបស់អារ៉ាប៊ីសាអូឌីត អាមេរិកបានដាក់ពង្រាយប្រព័ន្ធការពារប្រឆាំងមីស៊ីល និងយន្តហោះចម្បាំងក្នុងក្របខ័ណ្ឌនៃបេសកកម្មដើម្បីការពាររាជាណាចក្រអារ៉ាប៊ីសាអូឌីតប្រឈមទប់នឹងការវាយប្រហារនាពេលខាងមុខ » នេះជាខ្លឹមសារដែលមានសរសេរនៅក្នុងសេចក្តីប្រកាសព័ត៌មាន។ គួររម្លឹកថា អាមេរិកបានបញ្ជូនកម្លាំងយោធាបន្ថែមទៅកាន់មជ្ឈិមបូព៌ា ពិសេសទៅអារ៉ាប៊ីសាអូឌីត បន្ទាប់ពីមានការវាយប្រហារជាបន្តបន្ទាប់នៅក្នុងតំបន់ឈូងសមុទ្រពែក្សដែលអាមេរិកបានទម្លាក់ការទទួលខុសត្រូវលើអ៊ីរ៉ង់។
បន្ទាប់មកនៅជាង ១ខែមុន ពោលក្រោយពីអាមេរិកបានបាញ់សម្លាប់ឧត្តមសេនីយអ៊ីរ៉ង់កាសឹម សូឡីម៉ានីក្នុងទឹកដីអ៊ីរ៉ាក់ក្នុងថ្ងៃទី៣ មករា និងបន្ទាប់ពីអ៊ីរ៉ង់បានបាញ់គ្រាប់មីស៊ីលទៅលើមូលដ្ឋានយោធាអាមេរិកក្នុងទឹកដីអ៊ីរ៉ាក់មក ភាពតានតឹងរវាងក្រុងវ៉ាស៊ីនតោន និងក្រុងតេហេរ៉ង់បានឡើងដល់កំពូល។ ក្រៅពីបង្ហាញជំហរគាំទ្រ និងការពារអារ៉ាប៊ីសាអូឌីតនៅចំពោះមុខឥទ្ធិពលរបស់អ៊ីរ៉ង់នៅក្នុងតំបន់ ប្រមុខការទូតអាមេរិកក៏គ្រោងលើកទៅនិយាយជាមួយថ្នាក់ដឹកនាំអារ៉ាប៊ីសាអូឌីតពីបញ្ហាសេដ្ឋកិច្ច និងសិទ្ធិមនុស្ស។ សិទ្ធិមនុស្សដែលប្រទេសអារ៉ាប់មួយនេះបានទទួលរងការរិះគន់យ៉ាងខ្លាំងពីការបង្ក្រាបលើក្រុមសកម្មជន និងក្រុមប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ