Covid-19៖ លោកត្រាំ គម្រោងបញ្ចេញប្រាក់១០០ម៉ឺនលានដុល្លារ ជួយទ្រទ្រង់សេដ្ឋកិច្ច
ប្រឈមនឹងវិបត្តិសេដ្ឋកិច្ច ដែលបង្កឡើងដោយមេរោគកូវីដ១៩ លោកដូណាល់ ត្រាំ ប្រធានាធិបតីសហរដ្ឋអាមេរិក បានប្រកាសកាលពីថ្ងៃពុធទី១៨មីនាថា រដ្ឋាភិបាលលោកមានគម្រោងស្នើបញ្ចេញទឹកប្រាក់ ដ៏សន្ធឹកសន្ធាប់ ដើម្បីជួយទ្រទ្រង់សេដ្ឋកិច្ច ក្រុមហ៊ុន និងជីវភាពរបស់ប្រជាជន។ លោកដូណាល់ ត្រាំ ក៏បានសម្រេច បិទចរាចរណ៍ឆ្លងកាត់ព្រំដែន រវាងសហរដ្ឋអាមេរិក និងកាណាដា ជាបណ្តោះអាសន្នសិន លើកលែងតែក្នុងករណីចាំបាច់ ដើម្បីទប់ស្កាត់ការឆ្លងរាលដាលមេរោគកូវីដ១៩។
ចុះផ្សាយនៅថ្ងៃ៖
ស្តាប់ - ០២:៤៤
នៅចំពោះមុខអ្នកកាសែត លោកដូណាល់ ត្រាំ បានបញ្ជាក់ថា លោករដ្ឋមន្ត្រីក្រសួងហិរញ្ញវត្ថុ កំពុងតែធ្វើការយ៉ាងមមារញឹក ជាមួយសភាទាំង២អង្គ ដើម្បីតាក់តែងច្បាប់ពិសេសមួយ អនុញ្ញាតឲ្យបញ្ចេញទឹកប្រាក់ក្នុងចំនួនដ៏ធំ មកជួយទ្រទ្រង់សេដ្ឋកិច្ចរបស់អាមេរិក។ លោកត្រាំ បានអះអាងថា នេះជាទឹកប្រាក់ដ៏ច្រើន ដែលមិនដែលធ្លាប់មាននរណាធ្វើទេពីមុន។យោងតាមការចុះផ្សាយ របស់បណ្តាញទូរទស្សន៍ CNBC កញ្ចប់ថវិកានេះ អាចមានចំនួន លើស១០០ម៉ឺនលានដុល្លារ ឯណោះ។ គម្រោងនេះ ត្រូវឆ្លងកាត់ការបោះឆ្នោតយល់ព្រម នៅសភាទាំង២។
លោក Steven Mnuchin រដ្ឋមន្ត្រីក្រសួងហិរញ្ញវត្ថុ បានរៀបរាប់ថា ដោយសារតែការឆ្លងរាតត្បាត នៃមេរោគ Covid-19 ក្រុមហ៊ុនសហគ្រាសជាច្រើន កំពុងតែជួបការលំបាក។ ហាងទំនិញ ក្រុមហ៊ុនទេសចរណ៍ ភោជនីយដ្ឋាន ហាងកាហ្វេ បារ ត្រូវបិទទ្វារ។ វិស័យដែលរងគ្រោះធំបំផុត គឺវិស័យទេសចរណ៍ ដោយសារតែក្រុមហ៊ុនអាកាសចរណ៍ ត្រូវបង្ខំចិត្ត លុបចោលជើងហោះហើរ សឹងតែទាំងស្រុង។
លោករដ្ឋមន្ត្រីក្រសួងហិរញ្ញវត្ថុ បានបញ្ជាក់ថា រដ្ឋមានគម្រោងផ្ញើជាសែកទឹកប្រាក់ ឲ្យទៅពលរដ្ឋអាមេរិក ដោយផ្ទាល់។ វិធានការរបៀបនេះ ធ្លាប់ត្រូវបានគេអនុវត្តកាលជំនាន់វិបត្តិសេដ្ឋកិច្ចឆ្នាំ២០០៨។ លោករដ្ឋមន្ត្រីអាមេរិកដដែល អះអាងថា វាជាការចាំបាច់បំផុត ដែលត្រូវចាក់បញ្ចូលទឹកប្រាក់ ទៅក្នុងសេដ្ឋកិច្ច ជួយពលរដ្ឋឯកជន និងជាពិសេស ត្រូវជួយសហគ្រាសធន់តូច ដែលងាយរងគ្រោះ។ ក្រៅពីនេះ រដ្ឋក៏អាចមានលទ្ធភាពធានាការផ្តល់ប្រាក់ឥណ្ឌទាន ដល់ក្រុមហ៊ុនមួយចំនួន ដែលជួបការលំបាកខ្លាំង ដូចជាក្រុមហ៊ុនអាកាសចរណ៍ និងសណ្ឋាគារជាដើម។
បើតាមការចុះផ្សាយរបស់ទូរទស្សន៍CNN លោករដ្ឋមន្ត្រីក្រសួងហិរញ្ញវត្ថុអាមេរិក បានប្រាប់ទៅសភាទាំង២អង្គថា ចំនួនអត្រាអ្នកអត់ការងារធ្វើ ដែលមាន៣,៥% កាលពីខែកុម្ភៈ អាចនឹងឡើងដល់២០% នៅខែខាងមុខ។ វិបត្តិសេដ្ឋកិច្ចបង្កឡើងដោយកូវីដ១៩ មានទំហំធំ និងធ្ងន់ជាងវិបត្តិហិរញ្ញវត្ថុឆ្នាំ២០០៨ ឆ្ងាយណាស់។
គួរកត់សំគាល់ថា ពេលផ្តើមផ្ទុះការឆ្លងរាលដាលមេរោគកូរូណា Covid-19 លោកដូណាល់ ត្រាំ ត្រូវបានមតិមួយចំនួនរិះគន់ ថាបានមើលស្រាលស្ថានការណ៍នេះ។ ទើបតែកាលពីថ្ងៃចន្ទទី១៦មីនា ដែលលោកត្រាំ បានទទួលស្គាល់ថា សេដ្ឋកិច្ចអាមេរិកអាចជួបហានិភ័យខ្ពស់។ គួរបញ្ជាក់ផងដែរថា ក្រៅពីគម្រោងចំណាយដ៏សន្ធឹកសន្ធាប់របស់រដ្ឋាភិបាល ក្រុមសមាជិកសភាតំណាង មកពីបក្សប្រជាធិបតេយ្យ បានដាក់ស្នើគម្រោងចំណាយ ចំនួន១ម៉ឺនលានដុល្លារ ដើម្បីជួយដល់បុគ្គលិកដែលរងផលប៉ះពាល់ដោយផ្ទាល់ ដោយសារមេរោគកូវីដ១៩។ លោក Mitch McConnell ប្រធានក្រុមសមាជិកសភា បក្សសាធារណៈរដ្ឋ បានលើកឡើងថា ពេលនេះគឺជាពេលត្រូវឯកភាពគ្នា ទុករឿងបក្សមួយឡែក ដើម្បីដោះស្រាយបញ្ហាប្រឈម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ