សហរដ្ឋអាមេរិក បញ្ចេញនាវាពេទ្យយោធាមកជួយព្យាបាលជំងឺកូវីដ១៩
តាំងពីអឺរ៉ុប ដល់អូស្ត្រាលី ព្រមទាំងសហរដ្ឋអាមេរិក សុទ្ធតែស្ថិតក្នុងស្ថានភាពត្រៀមអាសន្ន កំរិតខ្ពស់។ ដើម្បីប្រយុទ្ធប្រឆាំងកូវីដ១៩ដែលអង្គការសុខភាពពិភពលោកបានចាត់ទុកជា “សត្រូវរបស់មនុស្សជាតិ” (ព្រោះវាបានសម្លាប់ជីវិតមនុស្សអស់ជាង ៨៧០០នាក់ និងចម្លងលើមនុស្សជាង ២១០០០០នាក់ គិតត្រឹមព្រឹកថ្ងៃទី ១៩មីនា) សហរដ្ឋអាមេរិកបានសម្រេចប្រើច្បាប់ ដូចក្នុងសម័យសង្គ្រាមនៅក្នុងឧបទ្វីបកូរ៉េ។ នាវាពេទ្យយោធា កំពុងចេញដំណើរមកជួយសេវាសុខាភិបាលស៊ីវិល។
ចុះផ្សាយនៅថ្ងៃ៖
ស្តាប់ - ០១:២៨
ការរាតត្បាតនៃកូវីដ១៩ លើទឹកដីសហរដ្ឋអាមេរិក បានឈានចូលដំណាក់ថ្មីកាន់តែធ្ងន់ធ្ងរមួយកំរិតនៅថ្ងៃព្រហស្បតិ៍ទី ១៩មីនានេះ ដោយរាប់ឃើញមានស្លាប់១១៨នាក់ និងអ្នកឆ្លងមេរោគកូរ៉ូណាថ្មី ដល់ជាង ៧៧០០នាក់ ក្នុងនោះពីរនាក់ជាសមាជិកសភា។ ប្រធានាធិបតីដូណាល់ត្រាំ ដែលធ្លាប់មើលស្រាលកូវីដ១៩ពីដំបូង បានអំពាវនាវឱ្យពលរដ្ឋអាមេរិកគ្រប់ជំនាន់ទាំងក្មេងទាំងចាស់ ហ៊ានលះបង់ដើម្បីជាតិ និងផ្តុំកម្លាំងរួបរួមគ្នា ដូចក្នុងសម័យសង្គ្រាមលោកលើកទីពីរ។
ដោយហេតុតែអាមេរិកកំពុងធ្វើសង្គ្រាមជាមួយនឹងសត្រូវគ្មានរូប នាវាពេទ្យយោធា USNS ដែលស្ថិតក្រោមបង្គាប់ក្រសួងការពារជាតិ និងដែលមាន១០០០បន្ទប់ សម្រាប់ទទួលអ្នកជំងឺ កំពុងធ្វើដំណើរទៅញូវយ៉ក ដែលរងគ្រោះកូវីដ១៩ខ្លាំងជាងគេ។ បើតាមការប៉ាន់ស្មាន រដ្ឋញូវយ៉ក អាចនឹងត្រូវការកន្លែងសម្រាប់ព្យាបាលអ្នកជំងឺកូវីដ១៩ ចំនួន ១១ម៉ឺនគ្រែ នៅរវាង៤៥ថ្ងៃខាងមុខ តែមន្ទីរពេទ្យរបស់រដ្ឋអាចមានសមត្ថភាពទទួលត្រឹម៥៣០០តែប៉ុណ្ណោះ។ មិនតែប៉ុណ្ណោះ លោក ដូណាល់ ត្រាំ គ្រោងនឹងចេញក្រិត្យ អនុវត្តច្បាប់ Defense Production Act ដែលធ្លាប់ប្រើនៅក្នុងសម័យសង្គ្រាមក្នុងឧបទ្វីបកូរ៉េ ដើម្បីអាចបញ្ចេញកម្លាំងយោធាមករ៉ាប់រងធានាសេចក្តីត្រូវការរបស់ប្រទេស ព្រោះឧស្សាហកម្មឯកជន ភាគច្រើនបានបិទ។
ដើម្បីទ្រទ្រង់សេដ្ឋកិច្ចក្នុងបរិបទកូវីដ១៩ ក្នុងរយៈពេលតែពីរថ្ងៃ ធនាគារកណ្តាលអាមេរិកបានចេញវិធានការសង្គ្រោះបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ